Obadiah

Minne Obadiah a küna lón künäan

1Iei künäen Obadiah.

Iei meet ewe SAMOL KOT a apasa ngeni Obadia fänäsengesin ewe fönü Edom -

Sia rongorong ew poraus seni ewe SAMOL: Emön chón esilesil a fen tiitiló ngeni ekkewe mwüü pwe epwe apasa, “Öüpwe amollakemiitä pwe öüsipwe feilló maun ngeni Edom.”

2Ewe SAMOL a apasa ngeni Edom, “Nengeni, ngang üpwe föri pwe en kopwe wiliti ew mwüü mi kükkün me leiin ekkewe mwüü; en kopwe fókkun küna kopwut meren aramas meinisin.

3Lamalamtekian lón lelukom a otupwuketä, en ewe mi nóm lón ekkewe fööimw mi tekia lepökün ekkewe achaw o föri leeniom wón ekkewe leeni mi tekia, en ewe ka ekieki lón lelukom, ‘Iö epwe tongeni oturueitiw lepwül?’

4Inamwo are en ka tekiatä le äkkääs usun emön ikel o föri fasom leiin ekkewe füü, ngang üpwe oturuketiw seni ikenan,” ewe SAMOL a osomänetiw.

5O me ewe feiengaw mi witiwituk! Are ekkewe chón soolä repwe wareituk, are ekkewe chón angei pisek fän pöchökkül repwe tori imwom lepwin, ifa usun, resap sooläni chök minne iir ra mochen? Are ekkewe chón kinikin föün irän wain repwe wareituk, ifa usun, resap likitätiw ekkóch föün irän wain? Nge chón opwutom kana repwe angealó meinisin minne óm.

6Iir repwe küttä än Esau kewe leenien iseis o sooläni an pisek öüchchea meinisin.

7Iwe, peliom kana meinisin repwe tapwerukeló seni fönüwom; chiechiom kana repwe otupwuketä o repwe üüngenuk; iir repwe pwon ngenuk kinamwe, nge i ra rawei ar repwe efeiengawók; chókana mi fituk le mwöngö repwe anómwu ew ssär fänitom, nge en kosap silei usun.

8“Lón ena ränin,” ewe SAMOL a osomänetiw, “ifa usun, ngang üsap arosaló ekkewe aramas mi miriit seni lón ewe fönü Edom, chókana mi tipächchem mi nóm wón ekkewe chukun Esau?

9En Teman, noum kewe sounfiu mi pwora repwe rüükö, nge iteiten emön me emön mi nóm wón ekkewe chukun Esau epwe ninniiló. Chómmóng aramas repwe ninniiló.

10Pwokiten ewe föfförün mwänesol en ka föri ngeni Jakob pwiim we, iei minne kopwe uren sääw o kopwe kääriló tori feilfeilló chök.

11Lón ewe ränin, lupwen ekkewe chón ekis ra uwealó wöwün Israel, en ka chök üütäló o märisiir. Lupwen ekkewe chón ekis ra tolong lón asamalapen tittin än Israel we telinimw o ra üttüüt pwe repwe filätä ika menni kinikinin Jerusalem repwe angei, en ka chök usun emön leiir o witiwit pwe kopwe angei inetum.

12Nge esap mwirinnö óm tunoämängaw ngeni pwiimw kewe chón Judah lón ränin ar weires, esap öch óm meseik lón ränin ar feiengaw, esap pwal öch óm tunosikesik lón ränin ar riäfföü.

13Esap öch óm tolong lón asamalapen ewe telinimw än neii kewe aramas lón ränin ar feiengaw, esap pwal öch óm tunoämängaw ngeniir lón ränin ar feiengaw o sooläni seniir wöwür.

14Esap öch óm üütä o witiwit lón ekkewe älepenges o niieló ekkewe chón Judah mi sótuni ar repwe sü. Esap pwal öch óm turufi ekkewe mi chüen manaw o afangamä iir lón ränin ar riäfföü.

15“Ewe ränin ewe SAMOL a arapoto lupwen ngang ewe SAMOL üpwe öpwüngü chón ekkewe mwüü meinisin resap nuokkus Kot. Usun minne en Edom ka föri ngeni Israel, iei usun epwe pwal fis ngenuk. Òm kewe föfför meinisin repwe liwinsäfälituk o püngütiw wón mökürom.

16Pün usun chök óm ka oromaló neii kewe aramas me wón chuki we mi pin, iei usun en me ekkewe mwüü mi nóm pwellin ünükkum öüpwe oromaló ewe köpwüng ngang üpwe niinätiw wóómi. Ewer, ämi ekkewe mwüü öüpwe wün o taroporop. Mwirin, öüpwe morukoló seni uruwon fönüfan usun chök nge öüsap fis.

17Nge ewe chuuk Zion epwe wiliti ew leenien op fäniten chókana mi sü; ewe chuuk epwe ew leeni mi pin, iwe, ekkewe mwirimwirin Jakob repwe liwinsäfälito o angeisäfäli pwisin fönüwer.

18Iwe, ekkewe mwirimwirin Jakob repwe wewe ngeni ew ekkei nge ekkewe mwirimwirin Josef repwe wewe ngeni och pulopulen ekkei; iwe, ekkewe mwirimwirin Esau repwe wewe ngeni fetilipwas. Ekkewe aramasen Judah repwe kenaló Edom o repwe ataeló. Mwirin, esap chüen wor emön mi manaw me leiin ekkewe mwirimwirin Esau.” Iei usun meet epwe fis pwokiten ngang ewe SAMOL üwa apasa pwe epwe ina usun.

19Ekkewe aramas seni ewe fönü Nekev repwe fönüweni ekkewe chukun Esau, nge chókana seni Shefela repwe fönüweni ewe fönüwen chón Filistia; chón Israel repwe angeisäfäli ekkewe leenien tännipi lón Efraim me Samaria, nge ekkewe aramasen Benjamin repwe fönüweni Kilead.

20Ewe mwiichen chón ooló seni Israel mi liwinsäfäl repwe fönüweni fönüwen ekkewe chón Kanaan atooraló ngeni Zarefath; nge ekkewe chón ooló seni Jerusalem mi nóm lón Sefarad, repwe liwinsäfäl ngeni leenier o angeisäfäli ekkewe telinimw mi nóm lón ewe fönü Nekev.

21Iwe, ekkewe chón sele repwe feittä wón ewe chuuk Zion lón Jerusalem pwe repwe öpwüngü ekkewe aramas mi nóm wón ekkewe chukun Esau. Iwe, ewe mwüü epwe mwüün ewe SAMOL.