Ekklesiastes

(Ewe Chón Afalafal)

Mettóch meinisin ra lamwotmwäl

1 Ikkeei ekkewe kapas än ewe Chón afalafal, nöün David we mwän, ewe king lón Jerusalem:

2Ewe Chón afalafal a apasa, “Esap wor lamwotan! Esap wor lamwotan! Ese fókkun wor wewen! Mettóch meinisin ese wor wewer!”

3Meet emön aramas a angei seni an angang weires meinisin i a pekkus le föri lón iteiten ränin manawan ikeei wón ei fönüfan?

4Ew pilóón aramas a ló, pwal ew pilóón a määritä, nge fönüfan a chök nóm fóchófóch.

5Akkar a töötä, a pwal tupwutiw o a mwittir liwinsäfäliti ewe ia e töötä me ia.

6Äsäpwääl a enien ngeni öör o kul ngeni efeng, a chök morokukkul feil o liwinsäfäliti pwüngün fätälin.

7Ekkewe chönüpwuupwu meinisin ra pwuuwu lemataw, nge ewe mataw esap tongeni epwe ur; iwe, ewe kólik a pwal liwinsäfäl ngeni ekkewe chönüpwuupwu, mwirin, ra pwal pwuusäfäliwu lemataw.

8Mettóch meinisin ra men eweires lap seni än emön aramas epwe tongeni kapas usun; ese lifilifil ika ifa üküükün meet sia nengeni, nge mesach esap ku ren meet a küna. Ese lifilifil ika ifa üküükün meet sia rongorong, nge selingach esap ur ren meet sia rong.

9Meet a fen piin wor epwe pwal wor säfäl, nge meet a fen föör epwe pwal försäfäl. Esap wor och mettóch mi sööfö iteiten ränin manaw ikeei wón ei fönüfan.

10Meet sia tongeni itini pwe ina och mettóch mi fö? Pwata sia silei pwe esap fen nóm chök ikeei melóóm me mwen ach upwutiw?

11Sisap chechchemeni meet a fis lón ekkewe fansoun lóóm; iwe, lón ekkewe pilóón aramas repwe feitto me mwirin, esap wor emön epwe chechchemeni meet sia föri iei.

Lamwotmwälin tipächchem

12Ngang, ewe Chón afalafal, üwa kingen Israel lón Jerusalem. 13Ngang üwa fangelong inisi pwe üpwe käeö pwal äi üpwe kütta fichi ren äi tipächchem meinisin minne aramas ra föri iteiten rän wón ei fönüfan. Iwe, a iaan me choun ewe angang Kot a isettä wón aramas! 14Ngang üwa küna ekkewe mettóch meinisin mi fis iteiten rän ikeei wón ei fönüfan, iwe, esap wor lamwoter meinisin, o ra usun chök nge emön a turufi äsäpwääl.

15Meet mi pwór esap tongeni an epwe äwenechchar, pwal meet esap wor esap tongeni epwe ällea.

16Üwa pwisin ekiekielong lón letipei, “Nengeni, ngang üwa nóm lón wiis tekia, ngang üwa tipächchem seni ekkewe king meinisin mi akkomw mwei le nemenem lón Jerusalem; ngang üwa mwokos lón wätten tipächchem me silelap lap seni emön me emön leiir.” 17Iei minne, ngang üwa fiseetä lón äi ekiek pwe üpwe weweiti le älefiila sakkofesenin tipächchem me umwes. Nge iei üwa küna pwe pwal ei mwo nge a usun chök än emön tapweei äsäpwääl.

18Pün wätten letipeta a fitato wätten tipächchem; lupwen silelap a lapaló, a pwal lapaló letipeta.

Lamwotmwälin pwapwan fönüfan

2 Ngang üwa pwisin apasa ngeniei, “Ngang üpwe sótuni pwapwan fönüfan pwe üpwe pii ika meet mi mwirinnö me lón ei manaw.” Nge üwa küna pwe pwal ei esap wor lamwotan. 2Ngang üwa apasa pwe atakirikir a umwes, üwa pwal apasa, “Meet chök pwapwan fönüfan a tongeni föri?” 3Mwirin äi üwa ekkekiek, üwa filätä pwe üpwe sótuni äi üpwe apwaapwaei ren wain. Üwa pwal sótuni le föri föfför mi umwes – nge äi ekiek mi chök chüen emmweniei ren miriit. Pün ngang üwa mochen üpwe küna meet mi lamwot fäniten aramas ar repwe föri lón fansoun ränin manawer mi chök chóókisikiis wón ei fönüfan.

4Ngang üwa pwal sótuni pwe üpwe kütta minne mi lamwot ren äi öüwetä chómmóng imw mi wätte fänitei, pwal ren äi fótukätiw irän wain lón tännipin irän wain. 5Ngang üwa förätä ekkewe atake me ekkewe leenien fót irän ochooch o üwa fótukätiw meinisin ekkewe sókkun irän ochooch lóór. 6Ngang üwa föri ekkewe wätten leenien kólik fäniten atüütün ekkewe chómmóngun irä mi märitä. 7Ngang üwa kamö neii amanaw mwän me fefin, nge mi wor ekkewe pwal ekkóch amanaw ra upwutiw me lón imwei. Mi pwal wor chómmóng neii pwiin kowu me pwiin siip lap seni ekkewe king mi akkomw mwei le nónnóm lón Jerusalem. 8Ngang üwa pwal ionifengeni chómmóng silifer me kolt, ikkeei ekkewe pisek öüchchea än chómmóng king me fönü. Üwa pwal mööni chón kööl mwän me fefin. A pwal wor chómmóng wünüpwülüwei. A wor reei ekkewe mettóch meinisin mi tongeni apwaapwai letipen emön mwän. 9Iei minne, ngang üwa wiliti emön aramas mi tekia lap seni ekkewe king meinisin mi akkomw mwei le nemenem lón Jerusalem. Nge lón ekkeei mettóch meinisin, äi miriit a chök nóm reei pwe üpwe tongeni oorifichi ekkeei mettóch meinisin.

10Ese lifilifil meet mettóch ngang üwa mochen, üwa angei; esap wor och pwapwan fönüfan üpwe ömwöchü seni letipei, pün iei liwinin äi kana angang weires meinisin.

11Nge mwirin, lupwen üwa nennengeni meinisin minne peii kana ra föri, pwal meet ngang üwa angang weires fänitan pwe üpwe tori, meinisin ra chök lamwotmwäl, a usun chök än emön turufi äsäpwääl. Esap wor och minne emön a willeni seni meet i a föri lón ränin manawan ikeei wón ei fönüfan.

Usun sópwólón chón miriit me chón umwes

12Mwirin, ngang üwa filätä pwe üpwe ekieki usun meet wewen tipächchem ika tiparoch ika umwes. Iwe, üwa ekieki usun ewe emön epwe tapw le wiiseni ewe wiisen king. Ewe king mi fö epwe föri pwal usun chök minne ekkewe king mi akkomw mwan ra föri.

13Üwa küna pwe tipächchem a mwirinnö lap seni umwes, usun chök saram a mwirinnö lap seni rochopwaak.

14Pün emön aramas mi miriit a tongeni küna mwan, nge emön mi umwes a chuun. Nge ngang üwa küna pwe aramas mi tipächchem me aramas mi umwes mi chök löllö fengen minne epwe fis ngeniir lesópwólón.

15Iir me rüwömön repwe mäló. Usun chök än ewe mi umwes epwe mäló, pwal ngang üpwe mäló. Iwe, meet chök öüchchean äi tipächchem? Mwirin, ngang üwa apasalong lón letipei, “Pwal ei ese wor wewen.”

16Pün ewe aramas mi miriit me ewe aramas mi umwes repwe mäló me rüwömön; lón ekkewe fansoun repwe feitto, iir me rüwömön repwe mönlüküló.

Lamwotmwälin angang weires

17Iei minne, ngang üwa opwut manaw, pwokiten ekkewe angang üwa föri lón ränin manawei ikeei wón ei fönüfan ra eletipengawaei. Meinisin esap wor wewer, a usun chök än emön turufi äsäpwääl. 18Ngang üwa opwut ekkewe mettóch meinisin üwa angang weires fäniter ikeei wón ei fönüfan, pwokiten ngang üpwe likitiretiw ngeni emön epwe tapweto mwiri. 19Iwe, iö a silei ika i epwe emön aramas mi miriit ika emön mi umwes? Iwe, inamwo nge i epwe nemeni ekkewe angang meinisin ngang üwa atooto wón fönüfan ren äi angang weires me äi lipwääköch. Pwal ei ese wor wewen. 20Iei minne, letipei a poputä le apilükülükingngaw pwokiten äi pekkusun angang weires meinisin ikeei wón ei fönüfan; pün sap iei pölüwen äi kütta minne üpwe menemenöch ren lón ei manaw. 21Pün emön aramas a tongeni föri an angang fän tipächchem, silelap me lipwääköch, nge mwirin, epwe likitätiw meinisin minne a liäpeni, ngeni emön esap angang weires fänitan. Pwal ei ese wor wewen, iei och wätten angangen lussumwääl. 22Meet feiöch emön aramas a angei fäniten an angang weires me an achoochomaaw ngeni ekkewe angang i a föri ikeei wón ei fönüfan? 23Lón ränin manawan meinisin, an angang a uren metek me letipeta; lepwin mwo nge an ekiek esap tongeni asöösö. Meinisin ese wor wewen.

24Iei minne, ngang üwa filätä pwe esap wor och epwe mwirinnö seni än emön aramas epwe chök apwaapwai le mwömwöngö o ükkün o menemenöch lón an angang. Nge mwirin, üwa küna pwe pwal ekkeei ra feitto seni pöün Kot. 25Pün lükün Kot, iö a tongeni mwöngö ika küna an pwapwa? 26Kot a fang tipächchem, silelap me pwapwa ngeni ewe aramas mi apwaapwai letipen Kot. Nge emön chón tipis mi pisekisekiló, Kot a angealó wöwün o ngeni ewe emön mi apwapwai letipan pwe epwe wöwüni. Pwal ei ese wor wewen, a usun chök än emön turufi äsäpwääl.

Mettóch meinisin a wor en me fansoun

3 A wor ew me ew fansoun fäniten iteiten ew me ew mettóch, a pwal wor ew me ew kinikinin fansoun fäniten iteiten ew me ew angang wón fönüfan.

2A wor fansoun upwutiw, a pwal wor fansoun mäló. A wor fansoun fóffót a pwal wor fansoun kinikin.

3A wor fansoun ninni a pwal wor fansoun echikarasäfäli. A wor fansoun ataetiw a pwal wor fansoun öüüwsäfälietä.

4A wor fansoun kechiw a pwal wor fansoun takir. A wor fansoun letipeta a pwal wor fansoun pwörük.

5A wor fansoun atoropassafeili faaw, a pwal wor fansoun ionifengeni faaw. A wor fansoun ach sipwe róómi fengeni kich, a pwal wor fansoun ach sipwe säpe fesen.

6A wor fansoun kükküüt a pwal wor fansoun pöütüló. A wor fansoun ömwöchü, a pwal wor fansoun likitaló.

7A wor fansoun kamwei, a pwal wor fansoun eppinasa. A wor fansoun fanafanaló, a pwal wor fansoun kapas.

8A wor fansoun tong, a pwal wor fansoun opwut. A wor fansoun maun, a pwal wor fansoun kinamwe.

Angang Kot a ewiisa ngeni aramas

9Meet emön chón angang a angei seni an angang weires? 10Ngang üwa ekieki usun ei fäniten ekkewe sakkopaaten angang Kot a ngeni aramas pwe repwe föri. 11Kot a föri iteiten mettóch meinisin pwe repwe ling lón en me pwisin an fansoun. I a pwal atolonga lón letipen aramas ekiekin fansoun ese mwüch. Iwe, inamwo nge resap chök tongeni ar repwe weweiti öüküükün meet Kot a fen föri seni lepoputän tori lesópwólón. 12Ngang üwa öpwüngaló lón äi ekiek pwe esap wor och epwe mwirinnö fäniten aramas lap seni ar repwe chök pwapwa o föri minne mi mwirinnö lón üküükün ar tongeni lupwen ra manaw. 13Iwe, aramas repwe mwöngö o wün o apwaapwar ren üwään ar kana angang weires meinisin pün ikkeei ekkewe liffang meren Kot. 14Ngang üwa silei pwe iteiten mettóch Kot a föri epwe nónnóm tori feilfeilló chök. Esap wor och epwe kapachatä ngeni, esap pwal wor och epwe äimwüló seni. Iei än Kot akkóót pwe aramas repwe meniniti i.

15Meet a fis iei, a fen fis me mwan, nge meet epwe fis lón ekkaan fansoun repwe feitto, a fen fis me mwan, pwokiten Kot a föri ekkewe chök pwal mettóch ar repwe ekkeliwin le fis säfäl lón en me äwenewenen an fansoun.

Usun itä nge pwüngingngaw epwe lapaló

16Iwe, üwa pwal küna och a fis ikeei wón ei fönüfan, pwe a wor föfföringaw lón imwen köpwüng. Ewer, pwüngingaw a pwal nóm lón köpwüng, nge fen iei ewe leenien öpwüngüwen.

17Iwe, üwa ekiekielong lón letipei,

“Kot a akkóóta fansoun fäniten mettóch meinisin mi fisitä; i a akkóóta ew fansoun pwe epwe öpwüngü aramas meinisin fäniten ar kewe föfför meinisin; epwe öpwüngü chon föfför mwirinnö me chón föfföringaw.”

18Mwirin, ngang üwa pwal ekieki lón letipei usun nónnómwun aramas - usun än Kot älleta ngeni aramas pwe iir resap mwirinnö seni maan. 19Pün a chök löllö fengen minne mi sousou ngeni aramas me minne mi sousou ngeni ekkana maan - iir ppök ra ngasangas pwal iir ppök repwe mäló. Iei minne, esap wor meet aramas epwe koon öchchüló seni maan wón. A ifa me an ese wor wewen. 20Iir ppök repwe feilló ngeni ewe leeni mi chök löllö fengen; iir ra feitto seni pwül mworomwor; iwe, iir repwe pwal liwinsäfäliti pwül mworomwor. 21Pün iö a tongeni älleta are ngünün aramas a feittä nge ngünün maan a feittiw leutun fönüfan?

22Iei minne, üwa küna pwe esap wor och mettóch epwe mwirinnö fäniten emön aramas lap seni an epwe chök apwaapwai lón an angang, pwokiten iei meet popun an nóm ikeei. Pün esap wor emön epwe tongeni epwe eliwini säfälikicheto seni mäló pwe sipwe apwaapwai manawach mwirin ach mäló.

4 Mwirin, ngang üwa pwal nennengeni o küna ekkewe riäfföü meinisin mi fis ikeei wón ei fönüfan.

Ngang üwa küna pwe ekkewe mi riäfföü ra kechiw nge esap wor emön a echiper. Ekkewe chon eriäfföüür, a wor ar pöchökkül mi wätte; iei minne esap wor chon älisi ekkewe mi riäfföü.

2Iei minne, ngang üwa öpwüngaló pwe ekkewe sootup ra mwirinnö seni ekkewe mi manaw.

3Nge chókana resap mwo upwutiw ra feiöch seni meinisin. Pün resap mwo küna ekkewe föfföringaw meinisin mi fis ikeei wón ei fönüfan ra fis ngeni ekkewe ra fen mäló me ekkewe mi chüen manaw.

Lamwotmwälin angang fän ekingngawen letip

4Mwirin, üwa pwal küna pwe lap ngeni chómmóng aramas ra mwasangasang ngeni ar repwe tori minne ra mochen pwokiten ra lólówóiti chon óruur. Nge pwal ei esap wor wewen - a usun chök än emön turufi äsäpwääl.

5Emön mi umwes a efitaló pöün ren an esap mochen epwe angang, a pwisin atolonga lón feiengaw.

6Iwe nge, mi fen mwirinnö an epwe masow ew chök kumwuchun emön ren pisekin nge i mi kinamwe, lap seni an epwe masow kumwuchun me ruofóch ren an angang weires nge a chök turufi äsäpwääl.

7Ngang üwa pwal küna pwal och äwewe usun och mettóch esap wor wewen ikeei wón ei fönüfan.

8Ei a fis ngeni emön mwän mi emönüló chök wón an, esap wor noun, esap pwal wor pwiin, nge esap ükütiw le angang weires, pün a mochen epwe alapaló wöwün üküükün an tongeni. Nge mwirin, i a kapas eiis ngeni pwisin manawan, “Iö ngang üwa angang weires fänitan? Pwata ngang üwa fangatäni chómmóng äi pwapwa iei?” Ei esap pwal fókkun wor wewen o a elichippüng.

Lamwoten chiechi

9Rüömön aramas ra mwirinnö seni emön, pün iir ra tongeni älillis fengen ar repwe feffeitä.

10Are emön epwe turuló, ewe pwal emön a tongeni angetiwei o älisätä. Nge emön mi turuló lón an emönüló chök, a nóm lón enletin osupwang.

11Iwe, pwal ina chök usun, rüömön aramas mi kóón fengen ra tongeni epwichikara fengenir. Nge epwe ifa usun än emön epwe pwichikkar ika i epwe emönüló chök wón an?

12Emön aramas mi emönüló chök le üütä, a tongeni kuf ika emön epwe efeiengawa i, nge rüömön ra tongeni üütä o äsepa fengeni sökürüür o eppeti seniir feiengaw. Nge a fen koon lapaló mwirinnön are a wor ülümön aramas, pün efóch sääl mi wor ülüfóch firesin esap mecheres le mmwü.

Iteföüló meren aramas mi móróló

13A mwirinnö än emön ölüwöl epwe wöwingaw nge i emön mi miriit lap seni emön king mi chinlap o umwes, esap mochen öüseling ngeni kapasen öüröür. 14Pün ei sókkun ölüwöl a tongeni toowu seni lón an wöwingaw o feffeitä. I a fen tongeni an epwe wiliti emön king, inamwo are i a fen piin nóm lón kalapwuus. 15Nge mwirin, iteiten emön me emön ra kiiló ngeni peekin pwal ewe örüwömönün ölüwöl mi siwili ätewe lón leenian 16Chómmóng mwiichen aramas rese tongeni lea ra üütä ünükkün ätei, nge mwirin, pwal ew pilóón aramas repwe määritä me mwirin o repwe opwut ätei! Iei minne, meinisin ei esap wor wewen - a usun chök än emön turufi äsäpwääl.

Nuokkus Kot, öpwönüetä óm kewe pwon

5 Lupwen kopwe tolong lón ewe imwen Kot, kopwe suuki selingom o esipaló awom. Iei och föfför mi ngaw óm kopwe ääni ekkewe asór ngeni Kot nge esap fiti ekiekum.

2Kosap chiekäi le ääni pwon ngeni Kot, kosap pwal atapwanapwan le uweato ekkóch lapalap fän mesen Kot.

Chechchemeni, Kot a nóm läng, nge en ka nóm ikeei wón fönüfan. Iei minne, kopwe chök achókisikisi óm kapas.

3Chómmóngun angang a awara ngenuk óm onokkin;

chómmóng kapas ra föri pwe en kopwe emön mi umwes.

4Lupwen ka ääni ew pwon ngeni Kot, kosap mang ngeni óm kopwe öpwönüetä, pün Kot esap pwapwaiti ekkana mi umwes. Kopwe öpwönüetä óm pwon meinisin en ka ääni ngeni Kot. 5Mi fen mwirinnö óm kosap apasa och lap seni óm kopwe pwon nge kosap öpwönüetä. 6Kosap mwüüt ngeni awom epwe emmwenukelong lón tipis. Kosap pwisin penuketä ren óm kopwe apasa ngeni ewe chón ökkünön ewe Imwenfel pwe en ka chök mwäliló le föri ewe pwon. Ei epwe föri pwe Kot epwe soong o i a tongeni an epwe ataeló iteiten meinisin minne en ka fen tori le öpwönüwetä. 7Kapas ese kamö, usun chök onottan me pwal ekkóch sókkun föfför mi lamwotongaw.

Lamwotmwälin wiil me iteföüló

8Kosap rukäsini are kopwe küna emön aramas mi wöwingaw a tolong lón riäfföü ren ekkana mi wor maner, pwal are esap pwönüwetä minne mi pwüng me leemelen ewe fönü. Pün iteiten nöüwiis ra nóm fän öllük meren ekkana mi tekia mweer, iwe, ekkewe föfförün pwüng ra pöütüló me lón ekkana sókkun teketekpaaten tettelin pwüngün angangen wiis. 9Ewe mwo king nge a aea an pöchökkül le angei an feiöch seni ewe fönü fäniten pwisin an feiöch.

10Chókana mi echeni mooni, resap menemenöch ren nöüür mooni.

A ifa me an esap wor wewen än emön epwe ekieki pwe wöw a awarato enletin pwapwa!

11Lupwen a chómmóngóló wöwün emön aramas, a pwal chómmóngóló aramas ra feitto pwe repwe älisi i le nöüni wöwün.

Iwe, fen meet chök lamwoten ewe wöw ngeni ewe minne an ewe wöw - chiilón chök eli ika epwe attola wöwün an a mititiw leefilen achefen pöün.

12Aramas mi angang weires, ra möür kinamwe, ese lifilifil ika ra mwöngö kükkün ika mwöngö mmóng.

Nge esap chómmóng fansoun än ekkana aramas mi pisekisek ra möür kinamwe.

13Ngang üwa küna pwal och mi ingaw o alóllilen ikeei wón ei fönüfan:

Än emön a ochukuchukätä wöwün, nge a pwisin feiengaw ren;

14ika an a okullu wöwün pwe epwe angei willan nge a pöüt seni meinisin ren och sókkun feiengaw a sereni.

Iwe, lesópwólón, esap chüen wor och epwe likitätiw fäniten nöün.

15Kich meinisin sipwe tori lesópwólón manawach nge sipwe seleló o ösöülapö usun chök lón ewe rän sia upwutiw.

Sisap tongeni uweei wöwüch pwe epwe fiti kich.

16Iwe, pwal iei och mettóch mi ngaw o alólillen:

Aramas mi toowu seni ei fönüfan resap mwirinnöló seni lupwen ra wareto.

Ar kana angang weires meinisin esap wor och lamwotan - usun chök nge re angang fäniten äsäpwääl.

17Lón unusen manawer, usun chök nge ra nóm fän ew kuchu - ra tinissuk, ra letipengaw, ra soong.

18Iei mwo nge üwa küna ew chök mettóch mi ekis mwirinnö. A mwirinnö fäniten aramas pwe repwe mwöngö, wün, o pwapwaiti ar anagang ikeei wón ei fönüfan lón atun ewe manaw mi mwochomwooch Kot a fang ngeniir, o repwe etiwa seren inetiir me lón ei manaw. 19Iwe pwal och, lupwen Kot a fang ngeni ekkóch wöwür me pöchökkülen inisir pwal ar tüfichin repwe emeseiker lóór, repwe etiwa seren inetiir me lón ei manaw o pwapwa lón ar angang - repwe silei pwe iei ew liffang meren Kot 20Kot a föri pwe ekkeei sókkun aramas repwe mwöchüló le apwaapwai manawer pwe esap wor ar fansoun pwe repwe nóm nge öüreki usun minne a fis lón fansoun lóóm.

6 Mi wor pwal och feiengaw mi ngaw ngang üwa küna ikeei wón ei fönüfan, a fókkun chouiti aramas: 2Kot a fang ngeni ekkóch aramas wöwür, pisekiir, me iteüöchür, pwe resap osupwangen och minne letiper a mochen, nge mwirin, i esap mwüüt ngeniir ar fansoun pwe repwe alamwota le ääni pwapwan ekkeei mettóch. Iwe, ra mäló nge fen ekkóch chon ekis ra üri lamwoten wöwür. Ei esap wor wewen - ew feiengaw mi enniopwut.

3Emön mwän a tongeni wor ipwükü noun o manaw tori an a fókkun chinlap. Nge are esap menemenöch ren meet a wor lón manawan o lesópwólón esap likiliköch angangen peiasan; iwe, üpwe apasa pwe efen mwirinnö an epwe upwutiw nge mi mäló. 4An upwutiw esap wor wewen o epwe sópwolong lón rochopwaak. Esap pwal wor itan, 5o esap pwal küna saramen akkar ika silei pwe i mi fis. Nge a chök wor an kinamwe lap seni an epwe manaw o määritä o wiliti emön mwän esap wor an pwapwa. 6I mi tongeni epwe manaw lón üküükün engöröw ier fän ruu, nge esap wor an menemenöch. Iwe, pwokiten i epwe mäló usun chök pwal emön me emön aramas, iwe, meet lamwotan?

7Aramas meinisin ra alapa ar fansoun fäniten ar angangen eneer mwöngö, iwe, usun ita nge ese fen naaf eneer mwöngö.

8Kopwe mwo ekieki usun ei. Ifa usun, aramas mi miriit ra mwirinnö seni aramas mi umwes?

Ifa usun, aramas mi mweleele ra willeni och mettóch ren ar tipächchemeló o silei usun ar repwe föri pwomwan me fän mesen ekkóch?

9Kopwe apwaapwók ren meet a wor reemw lap seni óm kopwe tipeni meet esap wor reemw.

Òm kopwe chök äneänei usun mettóch mi mwirinnö, iwe,ese wor wewen - a usun chök än emön turufi äsäpwääl.

10Meinisin minne a fis, a fen akkóót seni chök lóóm. Kot a fen silei chök melóóm meet nónnómwun emön me emön aramas.

Iei minne, ese wor lamwoten än emön epwe äniini ngeni Kot usun meet sópwólón.

11Ke fen achómmónga ekkewe kapas ke apasa, a fen ina kisilón wewer.

Iwe, ifa lamwoten än emön aramas epwe kapas chómmóng?

12Lón ekkewe ränin manawach mi chókükkün esap wor wewen, iö a silei ika epwe ifa usun ach sipwe alamwota nöünöün ekkana rän? Manawach ra usun chök och nnür. Iö a tongeni silei meet epwe fis wón ei fönüfan me mwirin ach sia mäló?

Usun öüchchean tipächchem

7 Iteöch a öüchchea lap seni löö pwokkus mi möömmóng.

Pwal ewe ränin mäló a mwirinnö lap seni ewe ränin upwutiw.

2A mwirinnö än emön epwe feilló ngeni ew imwen letipeta lap seni an epwe feilló ngeni ew imwen kamwetip, pün aramas meinisin repwe fatal ngeni mäló.

Iwe, ekkewe mi manaw repwe ekieki usun mäló lupwen a chüen wor ar fansoun.

3Letipeta a mwirinnö lap seni takirikir, pün letip a limelim ren pwichikkaren lóllilen.

4Emön aramas mi miriit a ekieki usun mäló, nge emön mi umwes a chök ekieki usun an epwe apwaapwai manawan iei.

5A mwirinnö än emön aramas epwe öüseling ngeni än emön aramas mi miriit kapasen ffön lap seni an epwe öüseling ngeni än ekkewe mi umwes kööl.

6Än ekkewe mi umwes atakirikir epwe mwittir mwüch usun chök karakkäin ekkaan iräfölüföl me lón ekkein fän kama. Pwal ei, esap wor wewen.

7Angei mooni fän pöchökkül a föri pwe emön aramas mi miriit epwe wiliti emön mi umwes, pwal och liffangen emichimich a angawaló letip.

8Lesópwólón och mettóch a mwirinnö lap seni lepoputän, pwal mökürochchow a mwirinnö lap seni lamalamtekia.

9Kosap mwittir le soong lón letipom, pün soong a nóm wón aföön ekkana mi umwes.

10Kosap apasa, “Pwata ekkewe fansoun lóóm ra mwirinnö seni ekkeei fansoun iei?” Pün emön mi ääni ei sókkun kapas eiis esap miriit.

11Miriit a fen koon lapaló mwirinnöön lupwen a wor noum mooni. Nge iir me ruu ra efisätä óm feiöch lupwen kopwe fäffätäleló lón manawom.

12Miriit me mooni ra tongeni ar repwe ngenuk arapakkan mettóch menisin. Nge miriit chök a tongeni amanawa manawom.

13Kopwe ekieki usun än Kot kewe föfför,

pün iö a tongeni epwe äwena meet i a fen pwórei?

14Kopwe apwaapwók lón fansoun óm feiöch. Nge lupwen kopwe tolong lón fansoun mi weires, kopwe silei pwe feiöch me weires ra feitto seni Kot. Ren ei, kopwe silei pwe esap wor emön epwe silei meet epwe fis lón ekkaan fansoun repwe feitto.

15Ngang üwa küna mettóch meinisin lón ei manaw esap wor wewen pwal pacholong ekkeei ruu lapalap:

Üwa küna pwe ekkóch aramas mi pwüng ra mäló nge ra chüen chök ier kükkün, nge ekkóch aramasingaw ra manawattam.

16Kosap koon pwal esselükaló óm pwüng, kosap koon pwal esselükaló óm tipächchem – pün pwata kopwe pwisin efeiengawók?

17Kosap koon pwal esselükaló óm föfföringaw, kosap pwal wiliti emön mi umwes – pün pwata kopwe mäló nge esamwo tori óm fansoun?

18Mi mwirinnö óm kopwe äfälli ekkeei kapasen öüröür, pün emön aramas mi nuokusiti Kot epwe föri me ruu ekkeei kapasen öüröür lón manawan.

19Tipächchem a föri pwe emön aramas mi miriit epwe wor manan lap seni engol samol lón ew telinimw.

20Esap wor emön aramas mi pwüng wón fönüfan a chök föfföri minne mi pwüng, nge esap mwo wor an tipis.

21Kosap operi le öüseling ngeni minne ekkóch aramas ra apasa, pün ina kopwe rong än noum chón angang ra takiriik,

22pün en ka silei fän fitu pwisin en ka takiri ekkóch.

23Lón ränin manawei, ngang üwa achoocho ngeni äi üpwe mwüüt ngeni tipächchem epwe emmweni äi ekiek me föfför. Iwe, üwa pwisin apasa ngeniei,

“Ngang üwa fiseetä pwe üpwe miriit.” Nge ei esap pwääk ngeniei.

24Iteiten fansoun, tipächchem a toowaweló o fókkun weires ach sipwe küna.

25Ngang üwa ouwasacha ekis meinisin o fiseetä äi üpwe küna tipächchem pwal äi üpwe weweiti wewen popun mettóch. Ngang üwa fiseetä pwe üpwe pwisin älleta ngeniei pwe föfföringaw a umwes nge umwes a efeiengaw.

26Iwe, üwa küna pwe emön fefin mi silelap emichimich a efeiengaw lap seni mäló. Tipefirän letipan a wewe ngeni ew chünnümei, pöün kana mi pweteete ra wewe ngeni kana sein mächä ra tongeni fööti emön. Emön mwän mi apwaapwai letipen Kot epwe tongeni süü seni ei sókkun fefin, nge ekkana chón tipis repwe tupw lón än neminnei ssär.

27Iwe, ewe Chón afalafal a apasa,

“Nengeni, iei meet ngang üwa küna, lupwen ngang üwa apacha och mettóch ngeni pwal och pwe üpwe küna rawen ekkewe mettóch.

28Inamwo are ngang üwa ekkeliwini le küüt, nge ngang üsap küna meet ngang üwa kütta. Ngang üwa küna emön mwän mi wenechchar me leiin engöröw aramas, nge üsap küna emön fefin mi wenechchar me leiin ekkeei meinisin.

29Nge iei meet ngang üwa küna: Kot a föri aramas pwe repwe wenechchar, nge aramas ra tókkóló o ra en me tapweló mwirin ar kana aal mi ngaw.”

8 A men amwaraar än emön aramas epwe miriit, pwe epwe etittinafichi me äwewei mettóch. Än emön aramas miriit a asarama wón mesan o äpweteteló wóópöchökkülen wón mesan.

Älleasochis ngeni nöüwis fänäsengesin Kot

2Ngang üwa apasa, Kopwe älleasochisi än ewe king öllük, pwokiten iei meet en ka ääni pwon fän mesen Kot pwe kopwe föri. 3Kosap sótuni óm kopwe rikiló seni óm kopwe föri wiisom; kosap pwal penätä chókana mi ekiekietä pwe repwe föri föfför mi ngaw. Pün ewe king epwe öpwüngü chókana mi älleasolap ngeni. 4Än ewe king öllük a pesepes seni an pöchökkülen nemenem mi lapalaap. Ese wor emön a tongeni üüngeni ika kapas eiis usun.

5Iö a älleasochisi än ewe king öllük esap tolong lón köpwüng. Chókana mi miriit repwe kütta ew fansoun me efóch alen ar repwe föri meet mi pwüng.

6Pün mi wor ew fansoun mi fich fäniten iteiten mettóch meinisin, mi pwal wor efóch aal mi pwüng fäniten iteiten mettóch meinisin, inamwo ika emön aramas a nóm fän chöün an riäfföü.

7Pün epwe ifa usun än aramas repwe tongeni süü seni meet resap silei pwe epwe fis?

8Esap wor emön leiich a tongeni an epwe ömwöchüsäfäli ngünün pwe esap feilló; esap pwal wor emön leiich a wor an manaman pwe epwe ürüweló ränin an mäló. Lupwen fansoun maun, esap mwüümwütä ngeni emön sounfiu an epwe feilló ia i a mochen feilló ie. Iwe, pwal ina chök usun ren minne mi ngaw, pün esap mwüüt ngeni emön mi föri meet mi ngaw epwe ngasaló.

9Ngang üwa küna ekkeei mettóch meinisin o üwa ekieki usun iteiten föfför mi fis ikeei wón ei fönüfan lupwen emön aramas a nemeni ekkóch aramas o eriäfföüür.

Mäló a tori aramas meinisin

10Lón ei sókkun lapalap, üwa küna pwe ekkewe chón föfföringaw ra peias. Iwe, a wor aramas ra feitto o fiti peiaser. Iwe, aramas ra mwareitiir me lón ewe telinimw ia ra föri ie ar föfföringaw. Pwal ei esap wor wewen.

11Pwokiten chappen än emön föri och tipis esap mwittir fis, aramas ra meefi pwe ra tongeni föri uwener ar repwe föri minne mi ngaw. 12Ina mwo ika emön chón tipis a föfföringaw fän ipwükü o a pwal manawattam, nge ngang mi chök silei pwe chókana mi nuokkusiti Kot o meniniti i, ra feiöch lap seniir. 13Nge ekkewe chón föfföringaw resap feiöch, resap pwal manawattam, repwe usun chök och nürün, pwokiten resap nuokkus me fän mesen Kot.

14Esap ikkeei chök ekkewe mettóch esap wor wewer wón ei fönüfan: Lón ei manaw, ekkewe aramas mi pwüng ra angei minne mi fich ngeni än ekkewe aramasingaw repwe angei, nge ekkewe aramas mi föfföringaw ra angei meet mi fich ngeni än ekkewe chón pwüng repwe angei. Pwal iei och, üwa apasa, pwe ese fen wor wewen. 15Iei minne, üwa peseei ngeni aramas pwe repwe eneen le apwapwaar, pwokiten esap wor och mi mwirinnö fäniten än aramas repwe föri ikeei wón ei fönüfan lap seni ar repwe chök mwöngö, wün o apwaapwai manawer. Ren ei lapalap, repwe ääni ekkóch pwapwa fiti ekkewe angang weires meinisin Kot a fang ngeniir.

16Lón äi küttafeili tipächchem, ngang üwa sótuni äi üpwe nengeni iteiten mettóch meinisin mi fis wón unusen fönüfan. Iwe, üwa küna pwe a wor angang esap ükütiw, rän me pwiin. 17Ei a ächchema ngeniei pwe esap wor emön a tongeni küna iteiten mettóch meinisin Kot a föri wón ach ei fönüfan. Esap wor emön a tongeni weweiti meet a fis ikeei wón ei fönüfan. Pün ika mwo emön aramas epwe achoocho ngeni le kütta fichi an epwe küna, nge esap chök küna wewen. Ekkewe mwo aramas mi fókkun tipächchem nge resap silei iteiten mettóch meinisin, inamwo are ra apasa pwe iir ra silei.

9 Iwe, pwal iei och ngang üwa nengeni fichi: Inamwo are föfförün ekkewe chón pwüng me ekkewe mi miriit ra nóm lón pöün Kot, nge esap wor emön aramas a silei ika Kot epwe pwääri ngeniir ümöümöch lón ei manaw ika esap. 2Mi chók löllöfengen minne a fen köpwüngüló pwe epwe witiwiti iteiten aramas meinisin, ese lifilifil ika iir chon pwüng ika chón föfföringaw, iir mi mwirinnö ika mi ngaw, iir ekkewe mi nóm lón tettelin chón limöch ika mi nóm lón tettelin chón limengngaw, iir chókana mi föri ar asór ika chókana resap föri.

Minne epwe fis ngeni aramas mi mwirinnö epwe usun chök minne epwe fis ngeni chón tipis, pwal minne epwe fis ngeni chókana mi pwon fän ökköpöl, epwe usun chök minne epwe fis ngeni chókana mi nuokkus ar repwe pwon fän ökköpöl.

3Iei ewe mettóch mi ngaw a fis ngeni mettóch meinisin ikeei wón ei fönüfan, pwe a chök löllö fengen minne a fen köpwüngüló pwe epwe fis ngeni aramas meinisin. Iei popun pwe aramas resap koon tümwünüfichi ar repwe föfför mwirinnö, nge ra fen filätä pwisin fätälin manawer, pün esap wor ar apilüköch. Esap wor och a sousou mweer nge i mäló chök. 4A wor apilüköch fäniten ekkewe chök mi manaw. Pün usun ra apasa, “Emön kolaak mi manaw a mwirinnö lap seni emön laion mi mä!”

5Pün ekkewe mi manaw ra silei pwe repwe mäló, nge ekkewe chon mäló resap silei och. Esap chüen wor liwinin ar angang, pün a pwal mwo nge mönlüküló än emön epwe chüen chechchemeniir.

6Ese lifilifil meet ra föri lupwen fansoun ar manaw - ar tong, ar opwut me ar lólówo - meinisin ra fen móróló chök me loom. Esap pwal chüen wor wiiser ngeni ekkewe angang mi fis ikeei wón ei fönüfan.

7Kopwe feilló, mwöngö onom mwöngö o wün ünümwom wain fän pwapwan letipom, pün iei chök Kot a etiwa minne ka föri. 8Kopwe üföüf üüf mi pwechepwech fansoun meinisin, kopwe pwal epiti ngeni mökürom löömmis fansoun meinisin. 9Kopwe eneen le apwaapwai manawom ren pwülüwom we ka tongei lón ränin manawom meinisin esap wor wewen Kot a fen fang ngenuk ikeei wón ei fönüfan, pwokiten ina wiisom lón ei manaw pwal lón óm angang weires en ka ääni angang weires ikeei wón ei fönüfan. 10Ese lifilifil meet ka föri, kopwe föri ren unusen óm tüfich, pün lupwen kopwe feilló lón peias, esap wor angang ika akkóót, esap pwal wor silelap ika tipächchem.

11Ngang üwa küna pwal och mettóch mi fis ikeei wón ei fönüfan:

Emön mi mwittir le kitir, esap chök wiwiil fansoun meinisin, ika emön sounfiu mi pöchökkül esap chök wiwiil lón maun. Emön mi miriit esap chök wokkor anan mwöngö fansoun meinisin, pwal emön mi tipächchem esap pwal chök pipisekisek fansoun meinisin. Aramas mi wor ar käeö resap pwal tiw fansoun meinisin. Ekkeei meinisin ra chök fis fän sereseröch are a pwüng ewe leeni lón ewe fansoun mi pwüngiti.

12Pün esap wor emön aramas a silei ineet an fansoun epwe war. Usun kana iik ra ttup lón ew cheew mi efeiengaw, ika kana machchang ra wo lón ew ssär; iwe, ina usun aramas ra sap lón ekkana fansoun mi ngaw ra toriir nge resap ürüfit reer.

Miriit a mwirinnö lap seni umwes

13Ngang üwa pwal küna ei minen appiru usun än emön aramas föri och mettóch mi tipächchem me wón ei fönüfan ngang üwa fókkun ingeló ren. 14Melóóm a wor ew kükkün telinimw mi wor ekkóch chök aramas ra nóm lón. Iwe, emön king a feitto fiti noun sounfiu pwe epwe maun ngeni ei telinimw o ra rokopwällieló fän pisekin maun. 15Nge a wor emön mi wöwingaw, i emön mwän mi tipächchem a nónnóm lón ewe telinimw. Ätei a silei usun an epwe amanawa ewe telinimw ren an tipächchem. Iei minne, i a chimanüw ewe telinimw. Nge mwirin, esap chüen wor emön a ekieki usun ewe mwän mi wöwingngaw. 16Mwirin, ngang üwa meefi pwe inamwo are tipächchem a mwirinö lap seni pöchökkül, nge chókana mi tipächchem repwe küna kopwut are ra wöwingaw. Esap wor emön epwe öüchcheani meet ra apasa.

17Iwe, iei mwo nge än emön aramas mi miriit kapas mi pweteete, a mwirinnö lap seni än emön samol mi umwes leüommóng le kapas.

18Miriit a mwirinnö lap seni pisekin maun, nge emön chon tipis a ataeló chómmóng mettóch mi mwirinnö.

10 Ew löö mi pwokkus epwe pwongawaeló, lupwen lóóng mi mä ra nónnóm lón. Iwe, ina usun ekis chök föfförün umwes a pwölüweló öüchchean miriit me iteüöch.

2Letipen emön mi miriit a chök emmweni ngeni an epwe föri minne mi pwüng, nge letipen emön mi umwes a emmweni ngeni an epwe föri minne mi ngaw.

3Ka tongeni silleni kana mi umwes ren sääsän ar fätäl won aal.

4Are noum pwoos a soong ngenuk, kosap pwisin likitaló wiisom, pwokiten emön mi mósónósón a tongeni öükätiw och mwääl mi wätte.

5Mi wor pwal och mi ingaw ngang üwa küna lupwen üwa kakkatol meet a fis ikeei wón ei fönüfan mi pop seni mwäälin emön samol:

6Chón umwes ra nóm lón wiis mi tekia nge chón pisekisek ra nóm lón wiis mi tekisón.

7Üwa küna ekkewe amanaw ra fen wawa óris, nge ekkewe nöün samol ra chök fätäl wón pecheer usun ekkewe amanaw.

8Iö a tuuw ew pwaang epwe pwisin turulong lón; iö a ataetiw ew etiip minen lóóm, serepenit epwe küüw.

9Iö a angang lón ew leenien ömmök faaw epwe pwisin feiengaw ren faaw; iö a ässät mwüüch epwe tongeni feieingaw ren nöün kouk. Ese lifilifil meet emön a föri, mi wor feiengawan.

10Are efóch kouk a kkop nge kosap seimi iwe, kopwe aea óm pöchökkül lupwen kopwe pöküpök wón. Kopwe seimi ewe kouk. Iei lamwoten tipächchem pün epwe awarato än emön lipwäköch.

11Are emön serepenit a fen kuuw emön aramas, iwe a ser lupwen än ewe sourong epwe köölün pöüt ngeni.

12Kapas mi toowu seni awen emön mi miriit ra men kirekiröch, nge kapasen tinnawen emön mi umwes a pwisin atooto feiengaw wón.

13Emön mi umwes a poputäni an kapas wón ekiek mi umwes; iei minne, minne a asopwa ngeni an kapas ra ingaw fiti umwes.

14Aramas mi umwes ra apasa pwe ra silei meinisin usun ewe fansoun epwe feitto o ra aporausa ngeni aramas tichikkin meet epwe fis. Nge iö a tongeni wesewesen silei meet epwe fis me mwirin?

15Emön mi umwes a meefi an pekkus ren an angang mi chök kükkün, ina pwata esap mwo nge wor an pöchökkül fäniten ew angang mi chök mecheres.

16Ewe fönü epwe fókkun tolong lón feiengaw lupwen a nöüni king emön semirit, pwal are noun kewe nöüwiis ra chök kakametip lesossor.

17Ewe fönü a pwapwa lupwen a nöüni king emön mi upwu-samol, pwal lupwen nöün kewe nöüwiis ra mwöngö lón fansoun mi pwüng ngeni, pwe repwe pöchökkül fäniten ar angang nge sap fäniten ar repwe pwuchóló.

18Are emön aramas a chipwang, ekkewe woo wón imwan repwe taatiw. Are pöün kana ra chök fanafanaló, imwan epwe lich.

19Aramas ra amollätä mwöngö fäniten apwaapwa, wain a atooto mwänek, nge mooni a awora liwiniir me ruu.

20Kosap apasa mettóch mi ngaw usun ewe king; kosap mwo nge ekieki och mettóch mi ngaw usun ewe king. Kosap pwal apasa mettóch mi ngaw usun emön mi pisekisek, sap mwo nge are lupwen ka chök älemönüló lón ruumwom, pwokiten emön machchang mi kükkün mi ääs lón äsäpwääl a tongeni uwealó óm kewe kapas o aporausa ngeniir meet ka apasa.

Öüchchean tilikken

11 Kopwe atoropasaló onom mwöngö wón ekkewe kólik, pün mwirin chómmóng rän kopwe küna säfäli pwe a pas säfälito reemw.

2Kopwe ineti wiisom ngeni füümön aramas, ewer, fen pwal ngeni walümön, pün kosap silei meet sókkun feiengaw epwe tongeni wareiti ewe fönü.

3Are ekkewe kuchu ra ur ren kólik, ra öpüngätiw üüt wón fönüfan. Ese lifilifil ika efóch irä a turuló ngeni öör ika efeng, epwe chök kóónóló lón ewe leeni ia we a turuló ie.

4Iö a chök akkatola enienin äsäpwääl fäniten an epwe witi rän mi mwirinnö, esap fóffót, nge iö a nennengeni ekkewe kuchu esap kini uwään fótaan.

5Usun chök óm kosap silei ia äsäpwääl a enito me ie, ika usun mwónómwónun an a fis ewe mönüköl me lón än ewe inelap leenien mönukól; iwe, ina usun óm kosap tongeni weweiti ekkewe angang än Kot, ewe Chón föri mettóch meinisin.

6Kopwe fótuki fótóóm föün irä lesossor, nge kosap mwüüt ngeni poum repwe chök fanafanaló lekkuniól, pün kosap silei menni leiir repwe määröch. Kosap silei ika ekkeei ika ekkenan, ika iir meinisin repwe määrippökütä.

7Saram a mwirinnö o a men apwaapwa ngeni maas ar repwe küna tinen akkar.

8Ese lifilifil ika fite ier emön aramas a manaw lón, epwe chök föri meet epwe pwapwa ren lóór meinisin. Nge epwe chök chechchemeni pwe ekkewe ränin an epwe nóm lón rochopwaak repwe chómmóng. Meinisin minne epwe feitto esap wor wewen.

9En enaan ölüwöl, kopwe pwapwa lupwen ka chüen emön säräfö. Kopwe eneen le apwaapwai letipom lón fansoun óm ölüwöl. Kopwe föri ekkewe mettóch letipom a tipeni me mesom ra küna. Nge kopwe chechchemeni pwe Kot epwe öpwünguk fäniten ekkewe mettóch meinisin en ka föri.

10Ina minne, kopwe oturawu öürek seni lón letipom, nge kopwe tümwünü pwe inisum epwe pöchökkül. Nge kopwe chechchemeni pwe fansoun säräfö fiti unusen ewe manaw mi nóm mwom, esap wor wewen.

12 Kopwe chechchemeni ewe Chón föruk lupwen fansoun en mi chök chüen emön säräfö, me mwen ekkewe fansoun mi ngaw repwe feitto me ekkewe ier repwe arapeto lupwen kopwe apasa, “Esap chüen wor äi pwapwa lón ekkeei fansoun.”

2Kopwe chechchemeni ewe Chón föruk me mwen än saramen ewe akkar me ewe maram me ekkewe füü repwe topwutopwuló me lón mesom, pwal me mwen än ekkewe kuchu repwe liwinsäfäl me mwirin ewe üüt;

3lupwen ekkewe chon tümwünü ewe imw repwe chechchech; pwal ekkewe mwän mi pöchökkül repwe pwóretiw o ekkewe fefin chón kata föün wiit repwe le ükütiw pün ra chókükkünüló, pwal ekkana fefin mi nennelong me lón ekkewe asammwacho ra topwutopwuló;

4lupwen ekkewe asam ngeni ewe aal ra kesipeló, o ökürangen ekkewe leenien angang ra miiniiniló, lupwen aramas ra pwök ren tikitikin machchang, pwal meinisin ekkewe föpwül chón kööl ra fanafanaló;

5lupwen aramas ra nuokkus ar repwe nóm wón leeni mi kükkütä, ra pwal nuokkusiti efeiengawen lón ekkewe aal;

lupwen ewe irä itan almond mi pwechepwech pöön irän a pöppöön irä o ewe liffichimas a chök etekini inisin nge ewe irä itan keipperi esap chüen wor lamwotan. Pün aramas ra feilló ngeni leenier feilfeilló chök, nge ekkewe chon kechiw ra ekkeliwin le fätäl lón ekkewe aal.

6Kopwe chechchemeni ewe Chón föruk me mwen än ewe sääl silifer epwe mmwü me ewe sepi kolt epwe mmök. Kosap witiwit tori än ewe leenien alöölö kólik epwe mökükkisitiw me ünükkün ewe pwuachchen kólik, nge ewe pisekin äkkuul mi wor sääl wón epwe ta me órun ewe weel.

7Pün mwirin, ewe pwül mworomwor epwe liwinitisäfäliti ewe pwül eweia a feitto seni ie, nge ewe ngüün epwe liwinsäfäl ngeni Kot, ewe mi fangeto ewe ngüün.

8“Mettóch meinisin esap wor weweer!” ewe Chón afalafal a apasa. “Esap fókkun wor weweer!”

Ekkewe kósópwólón ekiek

9Kopwe anómwu ei lón óm ekiek: Ewe Chón afalafal esap chök miriit, nge i a pwal äiti ngeni aramas silelap. I a ekieki fichi chómmóng kapasen emiriit o kütta fichi wewer o a akkóótaöchchür. 10Ewe Chón afalafal a achoocho le kütta fichi ekkewe kapas mi pwüng, iei minne, meet i a makkeetiw ra wenechchar o let.

11Än ekkewe mi miriit kapas ra usun chök ekkewe wókuwókun emiriit mi fölüföl ekkewe chon mas siip ra wókuwók. Ar kewe kapas mi miriit iir ra ionifengeni ra usun chök nüküchcharen chüüföl–ewe emön Chón Masen Siip a ngeniir. 12Nge neii, kopwe tümwünüöchchuk ren meet mi pwal kapach ngeni ekkeei.

Pün esap ükütiw förütän chómmóng pwuk, nge wätten käeö epwe efisätä pekkusun inis.

13Öüwa rong ekkeei mettóch meinisin. Iwe, iei äi kapasen kósóp: Öüpwe nuokkusiti Kot o ömwöchünükü an kewe öllük pün iei wiisen aramas meinisin.

14Pün Kot epwe öpwüngü iteiten föfför meinisin, pwal pachelong iteiten föfför meinisin mi fis lemwónómwón, ese lifilifil are föfför mi mwirinnö ika mi ngaw.