Deuteronomy

Än Kot pwon ngeni chón Israel pwe repwe tolong lón Kanaan

1 A makketiw lón ei pwuk ekkewe kapas Moses a apasa ngeni ekkewe aramasen Israel meinisin lupwen ra nóm lón ewe fönüpöön öötiwen ewe chaanpwuupwu Jordan. Ra öüüwetä imwer imw mangaku lón ewe leemólun Jordan arap ngeni Suf. Suf a nóm lefiilen ewe fönüpöön Paran me ekkewe telinimw Tofel, Laban, Hazeroth, me Dizahab. 2Ekan chök üküükün engol me ew ränin än aramas repwe sääi seni Horeb tori Kadesh Barnea are repwe pwereló wón ewe aleló ren ewe Chuuk Seir.

3Nge fääik ier me mwirin än ekkewe chón Israel ra feilló seni ewe Chuuk Horeb, lón äewin ränin ewe engol me äewin maram lón ewe äfääiken ier, Moses a kapas ngeni ekkewe aramasen Israel meinisin o üreniir ekkewe mettóch meinisin ewe SAMOL a fen öllük ngeni pwe epwe apasa. 4Ei a fis mwirin an niieló Sihon nöün chón Amor we king mi nemenem lón Heshbon, pwal mwirin an niieló Ok ewe kingen Bashan mi nemenem lón Ashtaroth me Edrei.

5Moses a kapas ngeni ekkewe aramasen Israel lupwen ra nóm lón ewe fönü Moab öötiwen ewe chaanpwuupwu Jordan. Moses a popuetä le äwewei minne Kot a ääni öllük o apasa,

6Lupwen sia nóm ren ewe Chuuk Horeb, ewe SAMOL ach we Kot a apasa ngeni kich: “A naf fansoun ämi nónnóm ren ei chuuk. 7A tori fansoun pwe öüpwe mwökütüló lón ämi sääi. Öüpwe feilló ngeni ekkewe fönü mi chukuchukutä fönüwen ekkewe chón Amor, pwal ngeni ekkewe leeni meinisin mi nóm lón ewe kinikin - ewe leemólun Jordan, ewe fönü mi chukuchukutä, ekkewe palapalatä mi nóm lotow, Nekev me ekkewe fönü mi nóm arosset. Öüpwe feilló ngeni ewe fönü fönüwen ekkewe chón Kanaan pwal tori Lebanon keiiló ngeni ewe chaanpwuupwu mi lapalaap, iei ewe Chaanpwuupwu Eufreitis. 8Nengeni, ngang üwa fen ngeni kemi unusen ewe fönü. Öüpwe tolong lón o fönüweni ewe fönü, pün iei ewe fönü ngang ewe SAMOL üwa pwon fän okköpöl ngeni ämi kewe leewo Abraham, Isaak me Jakob pwe üpwe ngeniir me mwirimwiriir kana meinisin repwe tapweto mwiriir pwe fönüwer.”

Ekkewe souemmwenin einang ra kefilitä

9Iwe, lón ena fansoun, ngang üwa üreni kemi: “Ngang üsap tongeni äi üpwe äkkälämön chök wón äi le mwärelong fän choun wiisei ngeni kemi. 10Ewe SAMOL ämi we Kot a achómmóngakemiiló; ina minne ikenäi öüwa usun chómmóngun ekkewe füün läng. 11Amwo ewe SAMOL, ewe Kot än ämi kewe leewo, epwe föri pwe öüpwe chómmóngóló fän engöröw lap seni iteitemi iei. Amwo epwe pwal efeiöchüw kemi usun i a pwon ngeni kemi! 12Epwe ifa usun äi üpwe tongeni äkkälämön le mwärei ämi osukosuk o mwärelong fän ämi fitikoko? 13Öüpwe filätä ekkóch mwän mi miriit, weweöch me silelap seni ew me ew ämi kewe einang. Iwe, ngang üpwe seikiiretä pwe repwe nöümi souemmwen.”

14Iwe, ämi öüwa pölüweniei o apasa, “Ewe mettóch en ka apasa ngeni keem pwe aipwe föri a mwirinnö.”

15Ina minne, ngang üwa angei ekkewe mwän mi miriit me silelap ämi öüwa filiretä seni ämi kewe einang, iwe, ngang üwa seikiiretä pwe repwe nöümi souköpwüng me nöüwiis. Ekkóch repwe wiisen chón emmwen wón engöröw aramas, ekkóch repwe chón emmwen wón pwükü, ekkóch repwe chón emmwen wón ekkelime, ekkóch repwe chón emmwen wón äkkäengol, pwal ekkóch repwe meilapen ämi kewe einang. 16“Mwirin, ngang üwa öüröüra nöümi kewe souköpwüng lón ewe fansoun o apasa, ‘Öüpwe unusen ääni wenechchar fansoun meinisin sap chök ngeni chiechiemi kewe chón Israel, nge pwal ngeni ekkewe chón ekis mi nóm leiimi lupwen öüpwe rongorong ngeni ekkewe fitikoko. 17Lupwen öüpwe filätä pwüngün ämi köpwüng, öüsap lifilifil aramas ren ämi öüpwe peni chókana mi pisekisek. Öüpwe öüseling ngeni ekkewe mi kis pwal usun chök ngeni ekkewe mi lap. Öüsap nuokkus me fän mesen emön aramas, pün ämi öüwa nóm lón leenien Kot lupwen öüwa ääni köpwüng. Och köpwüngün fitikoko a koon weires ngeni kemi, öüpwe uwato reei; iwe, ngang üpwe rongorong ngeni.” 18Lón ena fansoun, ngang üwa ngeni kemi ekkewe kapasen öüröür usun ekkewe mettóch meinisin öüpwe föri.

Israel esap mochen tolong lón ewe fönü

19Mwirin, sia sääi seni ewe chuuk Horeb, usun chök minne ewe SAMOL ach we Kot a öüröüra ngeni kich, o sia feilló leemelen unusen ewe fönüpöön mi lapalaap o eniwokkus ämi öüwa pwisin küna. Iwe, sia pwereló wón ewe aal ngeni ekkewe fönü mi chukuchukutä fönüwen ekkewe chón Amor. Iwe, lupwen sia wareiti Kadesh Barnea, 20ngang üwa apasa ngeni kemi, “Iei ämi öüwa tori ewe fönü ewe SAMOL ach we Kot a ngeni kich. 21Nengeni, ewe SAMOL ämi we Kot a fen anómwu ewe fönü mwemi. Öüpwe feittä o angei pwe fönüwemi, usun ewe SAMOL, ewe Kot än ämi kewe leewo a fen pwon ngeni kemi. Öüsap nuokkus. Öüsap apilükingaw!”

22Nge iteiten emön me emön leiimi a feitto reei o apasa, “Akkomwan, kopwe mwüüt ngeni keem pwe aipwe tiinaló ekkóch mwän mweem pwe repwe ouwasacha ewe fönü fäniteem. Iwe, repwe öüröüra ngeni kich usun ewe aal epwe mwirinnö ach sipwe feittä wón o filätä menni telinimw sipwe maunei.”

23Iwe, ei a usun ew ekiek mi mwirinnö merei. Ina minne, ngang üwa filätä engol me rüwömön mwän me leiimi, emön mwän seni ew me ew ämi kewe einang. 24Iwe, ra feilló o feitta wón ekkewe fönü mi chukuchukutä. Iwe, ra tori ewe Lemólun Eshkol o ra sacheei. 25Ra angei ekkóch föün irän ochooch seni ewe fönü o ra uweiireto reech. Iwe, ra aporausa ngeni kich pwe ewe fönü ewe SAMOL ach we Kot a ngeni kich, ew fönü mi fókkun mwirinnö.

26Iwe, inamwo nge öüwa fen üüngeni ewe öllük än ewe SAMOL ämi we Kot o öüsap mochen öüpwe feittä. 27Iwe, öüwa tunoppwen o ngününgün me lón imwemi kewe imw mangaku o apasa, “Pwokiten ewe SAMOL a opwut kich, iei minne i a emmwenikichewu ikeei seni ewe fönü Egypt pwe epwe atolonga kich lepöün ekkewe chón Amor pwe repwe niikicheló. 28Epwe ifa usun ach sipwe tongeni feittä? Ekkewe chón sachei ewe fönü ra ekisikiisaló letipach ren ar poraus. Ra apasa pwe ekkewe aramasen ewe fönü ra fókkun wätte o langattam seni kich. Tittin ar kewe telinimw ra fókkun tekiatä tori fän kuchu. Iwe, pwal och, ra küna ekkewe mwänämmóng me ikenan, ekkewe mwirimwirin Anak!”

29Nge ngang üwa apasa ngeni kemi, “Öüsap rüükö ika nuokkusitiir. 30Ewe SAMOL ämi we Kot mi akkomw mwemi. I epwe fiu fänitemi, usun chök öüwa küna i a föri me lón Egypt. 31Iwe, öüwa küna usun än ewe SAMOL ämi we Kot a tümwünü kemi fän chómmóng me ikeei lón ei fönüpöön, usun chök emön saam a tümwünü nöün mönükól. Iwe, iei i a emmwenikemiito ngeni ei leeni.”

32Nge mwirin meinisin minne ewe SAMOL ämi we Kot a föri, ämi öüsap mochen anómwu ämi apilükülük wón, 33i ewe mi akkomweló mwemi lón ewe aal pwe epwe kütta ew leeni fänitemi ia öüpwe köüütä imwemi imw mangaku ie. A emmweni kemi ren ew üren ekkei lepwin me ew üren kuchu lerän.

Chappen än ekkewe aramasen Israel üleförea

34Iwe, lupwen ewe SAMOL a rongorong ämi tunopwen; iwe, a fókkun soong. I a pwon fän ökköpöl o apasa, 35“Enlet, esap wor emön aramas me lón ei pilóón aramas mi föfföringaw epwe manaw an epwe küna enan fönü mi mwirinnö ngang üwa pwon fän ökköpöl pwe üpwe ngeni ämi kewe leewo, 36chiilón chök Kaleb nöün Jefunne we mwän. I epwe küna ewe fönü pwokiten i a unusen tapweló mwiri ngang ewe SAMOL. Iwe, ngang üpwe ngeni i me mwirimwirin kana och ewe fönü i a fätäl wón lupwen a feitto sachei.”

37Iwe, ewe SAMOL a pwal soong ngeniei fänäsengesimi. Iwe, a apasa ngeniei, “En kosap fókkun tolong lón ewe Fönüwen Pwon! 38Nge Joshua nöün Nun we mwän ewe kisin fóóm, epwe emmwenalong ekkewe aramas lón ewe fönü. Kopwe öpöchchökülätä letipan lupwen a amollätä pwe epwe tolong lón ewe fönü. 39Ngang üpwe ngeni nöümi kana semiriit resap mwo silei sakkofesenin meet mi öch me meet mi ngaw ewe fönü. Ämi öüwa nuokkus pwe repwe ooló, nge fen iir ekkewe repwe fönüweni ewe fönü. Ngang üpwe ngeniir pwe repwe fönüweni. 40Nge ämi, öüpwe kulsäfäl iei o liwinsäfäliló lón ewe fönüpöön wón ewe aal mi ale ngeni ewe Setipar.”

41Mwirin, ämi öüwa pölüweni o apasa ngeniei, “Äm aia tipis ngeni ewe SAMOL. Äm aipwe üütä o feillong lón ewe fönü o maun fänitan, usun minne ewe SAMOL äm we Kot a üreni keem.” Iei minne, ekkewe mwän ra riietä ar kewe pisekin maun o mollotä ar repwe maun, pün ra ekieki pwe epwe mecheres ar repwe liäpeni ewe fönü mi chukuchukutä.

42Nge ewe SAMOL a apasa ngeniei, “Kopwe üreniir pwe resap feittä, resap pwal maun, pün ngang üsap fitiir. Nge are repwe feittä o maun, repwe kuf ren chón opwuter kewe.”

43Iei meet ngang üwa üreni kemi, nge ämi öüsap mochen öüseling. Öüwa pwal üüngeni än ewe SAMOL öllük o ouucho le feittä lón ewe fönü mi chukuchukutä pwe öüpwe maun. 44Nge ekkewe chón Amor mi nónnóm lón ewe fönü mi chukuchukutä ra toowu o rangeiti kemi usun epwi pwiin achi. Iwe, ra tapweri kemi o niikemiitiw seni Seir tori Hormah. 45Mwirin, öüwa liwinsäfäl o kechiw fän mesen ewe SAMOL, nge ewe SAMOL esap mochen öüseling, esap pwal mochen rongorong ngeni kemi. 46Ina minne, ämi öüwa nómwetiw ikenan lón Kadesh lón fansoun langattam.

Ekkewe ier lón ewe fönüpöön

2 Mwirin, sia kul o sääiló lón ewe fönüpöön wón ewe aal mi alengeni ewe Setipar, usun minne ewe SAMOL a öüröüra ngeniei. Iwe, sia chök pwepwelifeil ünükkün ewe Chuuk Seir lón fansoun langattam.

2Mwirin, ewe SAMOL a apasa ngeniei, 3“A naf langattamen fansoun ämi pweppwelifeil chök lón ei fönü mi chukuchukutä. Öüpwe le kul o feilló ngeni efeng. 4Iwe, kopwe ngeni ekkewe aramas ekkeei öllük: ‘Iei öüpwe le pwerelong lón kinikinin fönüwen määrärimi kewe, iir ekkewe chón Edom mwirimwirin Esau mi nóm lón Seir. Ekkewe chón Edom repwe nuokkusiti kemi. Iei minne öüpwe pwisin tümwünüöchüw kemi. 5Öüsap aosukosuker, pün ngang üwa fen ngeniir unusen ewe fönü mi chukuchukutä pwellin ünükkün ewe Chuuk Seir pwe fönüwer. Ngang üsap ngeni kemi ew me leiin fönüwer, apwi, fókkun sap mwo nge üküükün ew pwuun peche. 6Öüpwe kamö mwöngö seniir wón mooni pwe öüpwe tongeni mwöngö. Öüpwe pwal kamö kólik seniir wón mooni pwe öüpwe tongeni wün.’ ”

7Pün ewe SAMOL ämi we Kot a efeiöchüw ekkewe mettóch meinisin öüwa föri. I a mammasa kemi lón ämi fäffätäl lón ei fönüpöön mi lapalaap. Lón ekkeei üküükün fääik ier ewe SAMOL ämi we Kot a fiffiti kemi. Ämi öüsap osun och mettóch pün i a awora fänitemi iteiten minne öüwa osupwangan.

8Iwe, sia sópweló ach sääi o feilló seni määrärich kewe ekkewe mwirimwirin Esau mi nónnóm lón Seir, sia kul seni ewe aal mi alelong ngeni ewe maasies, iei ewe aal mi feittä seni Elath me Ezion Keber. Mwirin, sia kul o pwereló peliefeng wón ewe aal lón ewe fönüpöön mi pwerelong lón Moab.

9Iwe, ewe SAMOL a apasa ngeniei, “Öüsap aosukosuka ekkewe chón Moab, öüsap pwal öpwünüpwünütä ngeniir o popuetä ew maun ngeniir, pün ngang üsap ngeni kemi ew me leiin fönüwer kewe pwe öüpwe fönüweni, pwokiten ngang üwa fen ngeni ekkewe mwirimwirin Lot ewe fönü Ar pwe fönüwer.”

10(Me lóóm, ekkewe chón Em ra nónnóm ikenan, iir ew mwiichen aramas mi wätte o chómmóng, ra pwal mwänättam usun ekkewe mwirimwirin Anak. 11Aramas ra eita ngeni ekkeei ruu mwiichen aramas, ekkewe chón Em me ekkewe chón Anak, pwe iir chón Refa mwirimwirin Anak, nge ekkewe chón Moab ra eita ngeniir chón Em. 12Lón ekkewe fansoun lóóm, ekkewe chón Hor ra pwal piin nóm lón Seir, nge ekkewe mwirimwirin Esau ra ösüüreló seni fönüwer we o arosereló. Iwe, pwal iei chök usun ren ekkewe aramas mi nóm lón Kanaan, pün ra süüló seni ewe fönü ewe SAMOL a ewiisa ngeni Israel.)

13Iwe, Moses a sópweló le kapas, “Mwirin, ewe SAMOL a üreni kich pwe sipwe feilló epeek ewe Leemólun Zered.” Ina minne sia feilló epeek ewe Leemólun Zered.

14Iwe, üküükün ewe fansoun sia feilló seni Kadesh Barnea tori sia pwereló epeek ewe pwuupwu Zered, iliik me walüw ier tori än ewe pilóón aramas, iir ekkewe mwän meinisin mi tori ierin ar repwe fiti maun, ra rosoló me lón ewe fönüpöön, usun ewe SAMOL a pwon ngeniir fän ökköpöl. 15Pün enletin pwe pöün ewe SAMOL a üüngeniir tori iir meinisin ra mäló.

16Iwe, lupwen ekkewe mwän meinisin mi tori ierin ar repwe fiti maun ra mäló, 17ewe SAMOL a apasa ngeniei, 18“Ikenäi kopwe le pwerelong lón kiänin Moab me lón Ar. 19o tolong lón ewe fönü Ammon. Nge kosap aosukosuka ekkewe chón Ammon, iir ekkewe mwirimwirin Lot, kosap pwal öpwünüpwünütä ngeniir óm kopwe popuetä ew maun ngeniir, pün ngang üwa fen ngeni ekkewe mwirimwirin Lot ei fönü pwe fönüwer. Ngang üsap ngenuk ew me leiin fönüwer pwe kopwe fönüweni.”

20(Ei fönü a pwal nóm lón tettelin fönüwen ekkewe chón Refa, pün ekkewe mwän wätte ra piin nónnóm ikenan me mwan. Nge ekkewe chón Ammon ra eita ngeniir Zamzum. 21Iir ew mwiichen aramas mi pöchökkül o chómmóng, ra mwänettam usun ekkewe mwirimwirin Anak. Nge ewe SAMOL a arosereló pwe ekkewe chón Ammon repwe tongeni fönüweni fönüwer. 22Pwal iei chök usun än ewe SAMOL a älisi ekkewe mwirimwirin Esau me lón Seir, pün i a arosaló ekkewe chón Hor pwe ekkewe mwirimwirin Esau repwe relefönüweló lón leenier. Iwe, iir ra nónnóm ikenan tori ikenäi. 23Pwal iei chök usun ewe mettóch mi fis lupwen ekkewe chón Kaftor seni ewe fönü Kreta ra tööki o niieló ekkewe chón Av mi nónnóm lón ekkewe sóóp lón ewe kinikin Kaza.)

24Iwe, Moses a pwal sópweló le kapas, “Mwirin, ewe SAMOL a apasa, ‘Kopwe üütä pwe kopwe pwereló epeek ewe Chaanpwuupwu Arnon. Nengeni, ngang üpwe älisuk pwe kopwe okkufu Sihon ewe chón Amor, kingen Heshbon o ngang üpwe ngenuk fönüwan. Kopwe maun ngeni o popuetä le fönüweni fönüwan. 25Poputä seni ikenäi, ngang üpwe föri pwe aramas meinisin wón unusen fönüfan repwe nuokkusituk. Lupwen repwe rong usun porausom; iwe, repwe chechcheech ren ar rüükö me nuokkus.”

Sihon kingen Heshbon a kuf

26Mwirin, ngang üwa tiinaló ekkóch chón künö seni ewe Fönüapöön Kedemoth ren Sihon kingen Heshbon, pwe repwe uweeló kapasen kinamwe o apasa, 27“Kopwe mwüüt ngeni keem pwe aipwe pwereló lón fönüwom. Äm aipwe chök fätäl wón wesewesen ewe aal, nge aisap pwal kul ngeni peliifich ika ngeni peliimöng. 28Äm aipwe püngütiw liwinin ekkewe mwöngö aipwe äni me liwinin ekkewe kólik aipwe ünümi. Äm aia chök mochen pwe kopwe mwüüt ngeni keem pwe aipwe pwerelong lón fönüwom ei. 29Ekkewe mwirimwirin Esau mi nónnóm ren ewe Chuuk Seir ra mwüüt ngeni keem pwe aipwe pwerelong lón fönüwer we, pwal usun chök ekkewe chón Moab mi nónnóm lón Ar. Kopwe mwüüt ngeni keem pwe aipwe pwereló lón fönüwom ei tori äm aipwe pwereló epeek ewe chaanpwuupwu Jordan o tolong lón ewe fönü ewe SAMOL äm we Kot a ngeni keem.’ 30Nge Sihon ewe kingen Heshbon esap mwüüt ngeni kich pwe sipwe pwerelong lón fönüwan we, pün ewe SAMOL ämi we Kot a öpöchökküla ngünün o föri pwe letipan epwe förea, pwe i epwe tongeni älisi kemi le okkufu Sihon, usun i a föri.”

31Mwirin, ewe SAMOL a apasa ngeniei, “Nengeni, Ngang üwa popuetä le atolonga Sihon me fönüwan fän nemeniom. Iei kopwe poputä le maun ngeni o fönüweni fönüwan.”

32Mwirin, King Sihon me nöün kewe aramas meinisin ra feiliwu pwe repwe maun ngeni kich me lón Jahaz. 33Nge ewe SAMOL ach we Kot a atolonga i fän nemeniach. Ina minne, sia okkufu i me nöün kewe mwän me nöün kewe aramas meinisin. 34Lón ena fansoun, sia liäpeni an kewe telinimw meinisin. Sia unusen arosaló ekkewe aramas meinisin lón iteiten ekkewe telinimw - mwän, fefin me ekkewe semiriit. Sisap likiti emön aramas an epwe manaw. 35Nge sia angei ekkewe chök maanfesir fänitach pwe choon wókuch, fiti ekkewe pwal ekkóch mettóch mi wor öüchchear sia angei seni ekkewe telinimw. 36Ewe SAMOL ach we Kot a älisi kich pwe sipwe okkufu Aroer mi nóm aroppen ewe Chaanpwuupwu Arnon pwal ewe telinimw mi nóm lón ewe leemól mi pwokuretiw me unusen ewe kinikin tori Kilead. Esap wor ew telinimw epwe pöchökkül tittin ach sisap tolong lón, pün ewe SAMOL ach we Kot a atolonger meinisin fän nemeniach. 37Nge kich sisap chök feilló arap ngeni ewe fönü fönüwen ekkewe chón Ammon mi nóm órun ewe Chaanpwuupwu Jabbok me ekkewe telinimw wón ewe fönü mi chukuchukutä, ekkewe leeni meinisin ewe SAMOL ach we Kot a öllük ngeni kich pwe sipwe chök likitiireló.

King Ok seni Bashan a kuf

3 Mwirin, sia kul o feittä wón ewe aal mi ale ngeni Bashan. Iwe, Ok ewe kingen Bashan me nöün mwiichen sounfiu ra feiliwu o maun ngeni kich me lón Edrei. 2Nge ewe SAMOL a apasa ngeniei, “Kosap nuokkusiti Ok, pün ngang üwa fen atolonga i me nöün mwiichen sounfiu pwal fönüwan lepöum. En kopwe föri ngeni i usun minne ka föri ngeni Sihon, nöün chón Amor we king mi nemenem lón Heshbon.”

3Iei usun, ewe SAMOL ach we Kot a atolonga lepöüch Ok ewe kingen Bashan fiti nöün kewe aramas meinisin. Iwe, sia niireló meinisin tori an esap wor emön mi chüen manaw. 4Iwe, sia liäpeni an kewe telinimw meinisin lón ena fansoun. Esap wor ew telinimw sisap liäpeni seniir. Sia liäpeni üküükün wone telinimw, unusen kinikinin ewe fönü Arkop mi nóm lón mwüün ewe king Ok lón Bashan. 5Ekkeei telinimw meinisin ra fókkun pöchökkül fiti tittiir mi tekia me asamen ekkewe tiit mi wor eppetir. Sia pwal liäpeni chómmóng sóóp mi tittiló lükün kewe telinimw. 6Iwe, sia unusen ataeló ewe mwüün Bashan, usun chök minne sia föri ngeni Sihon ewe kingen Heshbon. Sia arosaló ekkewe aramas meinisin lón iteiten ekkewe telinimw sia liäpenir - mwän, fefin me semiriit. 7Nge sia chök anómwu ekkewe maanfesir meinisin fänitach o sia angei choon wókuch seni ekkewe telinimw meinisin.

8Iwe, lón ena fansoun, sia fönüweni ekkewe fönü meinisin fönüwen ekkewe rüömön king nöün ekkewe chón Amor mi nóm öötiwen ewe chaanpwuupwu Jordan, seni ewe Chaanpwuupwu Arnon tori ewe Chuuk Hermon. 9(Iten ewe Chuuk Hermon meren ekkewe chón Sidon, Sirion, nge ekkewe chón Amor ra eita ngeni Senir.) 10Lón ei ótun, sia pwal liäpeni ekkewe telinimw meinisin mi nóm wón ewe leeni mi tekia o sóssónöch, unusen Kilead, me unusen Bashan äfätäla ngeni Salekah me Edrei, ikkeei ekkewe telinimwen mwüün ewe king Ok lón Bashan. 11(Nge a fis pwe Ok ewe kingen Bashan i chök ömwüchchülón ekkewe mwän wätte chón Rafa. An we peet mi för seni mächä a lap seni engol me ülüngät fiit langattaman nge chöölapan wonu fiit. Ei peet a chüen nóm lón Rabbah ew telinimw än chón Amor.)

Ewe fönü öötiwen Jordan a inet

12Iwe, lupwen sia fönüweni ei fönü, ngang üwa ngeni chón ekkewe einangen Reuben me Kad ewe kinikinin fönü peekilón Aroer mi nóm arun ewe pwokuretiwen Arnon kapach ngeni esóp ewe fönü mi chukuchukutä lón Kilead fiti telinimwan kewe. 13Mwirin, ngang üwa ngeni chón ewe esóp einangen Manassa lussun ewe fönü Kilead me unusen Bashan, iei mwüün ewe king Ok me mwan. (Unusen Arkob ew kinikinin lón Bashan, iei ewe fönü ra eita ngeni pwe fönüwen ekkewe mwän wätte, iir ekkewe chón Refa. 14Jair emön souemmwen seni ewe einangen Manassa a angei unusen ewe kinikinin Arkob lón Bashan äfätäla ngeni kiänin fönüwen ekkewe chón Keshur me ekkewe chón Maakath. Iwe, Jair a eita säfäli ei kinikinin Bashan ngeni pwisin itan we. Iwe, ei leeni a iteni Havoth Jair tori ikenäi.) 15Iwe, ngang üwa pwal ngeni ewe eterengesin Makir ewe fönü Kilead. 16Ngang üwa ngeni chón ekkewe einangen Reuben me Kad ewe kinikin mi keiiló seni Kilead tori lukalapen ewe pwokuretiwen Arnon äfätälaló ngeni ewe Chaanpwuupwu Jabbok mi nóm wón kiänin fönüwen ekkewe chón Ammon. 17Üwa pwal ngeniir ewe Leemólun Jordan pacholong ewe Chaanpwuupwu Jordan me peliöötiwen órun ei chaanpwuupwu äfätäla seni ewe nómwun Kalili feittiw ngeni ewe Setin Mäló (iei ewe Setin Sólt) fiti ekkewe palapalatän ewe chuuk Piskah me peliöötiw.

18Lón ena fansoun, ngang üwa ngeni chón ekkewe einang repwe nómwetiw öötiwen Jordan ei öllük: “Inamwo are ewe SAMOL ämi we Kot a ngeni kemi ei fönü pwe fönüwemi, nge nöümi kewe mwän meinisin ra tongeni maun repwe pwereló epeek ewe chaanpwuupwu Jordan fän ar pisekin maun o mollotä ngeni ar repwe älisi määrärimi kewe chón Israel. 19Nge pwülüwemi kewe me nöümi kewe semiriit, pwal nöümi kewe pwiin maan (pün ngang mi silei pwe a wor chómmóng nöümi pwiin maan) repwe chök nómwetiw lón ämi kewe telinimw ngang üwa fen ngeni kemi. 20Iwe, lupwen ewe SAMOL epwe ngeni ekkewe lussun chón Israel ar repwe nónnómöch usun chök pwal ämi, pwal lupwen repwe fönüweni ewe fönü ewe SAMOL ämi we Kot epwe ngeniir me peekilón ewe chaanpwuupwu Jordan, mwirin, öüwa tongeni liwinsäfälito ikeei ngeni ewe fönü ngang üwa fen ngeni kemi.”

21Iwe, lón ena fansoun, ngang üwa apasa ngeni Joshua, “En ka pwisin küna meinisin minne ewe SAMOL óm we Kot a föri ngeni ekkeei rüwömön king. Iwe, epwe pwal iei usun minne ewe SAMOL epwe föri ngeni ekkewe mwüü meinisin en kopwe pwereló lóór mi nóm lotowun ewe chaanpwuupwu Jordan. 22Kosap fókkun nuokkusiti chón ekkewe mwüü ikenan, pün ewe SAMOL óm we Kot, epwe pwisin maun fänitom.”

Esap mwüümwütä ngeni Moses an epwe tolong lón ewe fönü

23“Lón ena fansoun, ngang üwa tungór maaw ngeni ewe SAMOL o apasa, 24“Äi Samol KOT, ngang noum chón angang. En ka fen popuetä le pwääri ngeniei óm tekia me óm manaman. Ifa usun, mi wor emön kot lón läng ika wón fönüfan epwe tongeni föri ekkeei sókkun föfför usun en ka föri? 25Ngang üwa tungór, kose mochen kopwe mwüüt ngeniei pwe üpwe pwereló peekilón ewe chaanpwuupwu Jordan pwe üpwe küna ewe fönü mi amwaraar mi nóm epeek ewe chaanpwuupwu me ekkewe fönü mi chukuchukutä mi ling me ekkewe chukun Lebanon.”

26Nge ewe SAMOL a soong ngeniei pwokitemi o esap mochen öüseling ngeniei. Ina minne, ewe SAMOL a apasa ngeniei: “Öllüküló! Kosap chüen kapas ngeniei usun ei mettóch. 27Ka tongeni feittä wón ungen ewe chuuk Piskah o katol ewe fönü. Ka tongeni nenneló ngeni lotow, efeng, öör me öötiw. Kopwe chök nennengeni ewe fönü ren mesom, nge kosap tongeni pwereló peekilón ei chaanpwuupwu Jordan. 28Nge kopwe ewiisa Joshua o öpöchökkülätä letipan, pün i epwe emmweni ekkewe aramas le feilló epeek ewe chaanpwuupwu Jordan. I epwe ngeniir ewe fönü en ka küna iei a nóm mwom.” 29Ina minne sia chök nóm lón ewe leemól arap ngeni Beth Peor me epeek.

Moses a öllük ngeni chón Israel pwe repwe älleasochis

4 Iwe, iei ämi chón Israel, öüpwe öüselingöch ngeni ekkeei öllük me pwüüng ngang üpwe äiti ngeni kemi. Öüpwe älleasochis ngeniir pwe öüpwe manaw. Iwe, öüpwe tolong o fönüweni ewe fönü ewe SAMOL, än ämi kewe leewo we Kot a ngeni kemi. 2Öüsap apachatä och ngeni ika äimwüni och seni ekkeei öllük ngang üpwe ngeni kemi seni ewe SAMOL ämi we Kot. Öüpwe chök älleasochis ngeniir.

3Ämi öüwa küna meet ewe SAMOL a föri ngeni kemi me lón Baal Peor, ia ewe SAMOL ämi we Kot a arosaló me ie iteiten emön me emön mi fel ngeni ewe önü Baal seni Peor. 4Nge ämi meinisin ekkewe mi tupwöl wón ewe SAMOL ämi we Kot, ämi mi chüen manaw ikenäi, iteiten emön me emön leiimi.

5Öüpwe fókkun älleasochisi ekkeei öllük me pwüüng lupwen öüpwe wareiti lón ewe fönü ämi öüpwe le tolong lón pwe öüpwe fönüweni. Ewe SAMOL äi we Kot a ngeniei ekkeei öllük me pwüüng o öllük ngeniei pwe ngang üpwe atourer ngeni kemi. 6Iei minne, are öüpwe tümwünüfichi le älleasochisir, öüpwe pwääraló ämi miriit me ämi weweöch ngeni chón ekkewe mwüü mi nóm pwellin ünükkümi. Lupwen repwe rongorong usun ekkeei öllük, iwe, repwe apasa, “Menni pwal ew mwüü epwe miriit me weweöch usun ei!” 7Pün menni mwüü mi wätte a wor an kot mi kkan ngeniir, epwe usun ewe SAMOL ach we Kot a kkan ngeni kich iteiten fansoun sia kööri i? 8Nge pwal menni mwüü mi wätte a wor an ei sókkun öllük me pwüüng mi pwüng repwe usun ekkeei mi nóm lón unusen ei öllük ngang üwa isettiw mwemi ikenäi?

9Nge öüpwe chök äfälli kemi! Öüpwe fókkun tümwünüöchüw kemi pwe öüsap möllükaló meet öüwa fen küna ewe SAMOL a föri fänitemi. Öüsap mwüüt ngeni ekkeei mettóch repwe möllüküló seni lón ämi ekiek lón älein manawemi. Nge öüpwe förfichi pwe öüpwe äiti ngeni nöümi kana me nöün nöümi kana. 10Lapalón, öüpwe üreniir usun ewe rän lupwen öüwa üütä fän mesen ewe SAMOL ämi we Kot me ren ewe Chuuk Horeb, eweia ewe SAMOL a üreniei me ie, ‘Kopwe köörato ekkewe aramas fän mesei; iwe, ngang üpwe öüröürer. Ren ei lapalap, iir repwe käeö ar repwe nuokkusitiei lón älein manawer. Iwe, iir repwe tongeni äiti ngeni nöüür kana semiriit äi kewe öllük.’ 11“Mwirin, ämi öüwa kaneto o üütä lesöön ewe chuuk lupwen ewe chuuk a ngetenget ren ekkei. Ngetengeten ekkei a ngetetä fän läng fiti kuchu mi chól me rochopwak mi malüül. 12Iwe, ewe SAMOL a kapas ngeni kemi seni lukalapen ewe ekkei. Ämi öüwa rongorong an kapas, nge öüsap küna lapalapan. Öüwa chök rongorong och möngüüngü. 13Iwe, i a esile ngeni kemi an we pwon, ikkeei ekkewe engol öllük, i a öllük ngeni kemi pwe öüpwe älleasochisiir. Iwe, a makkeretiw wón ruu peekin faaw mi chööpöp. 14Ina ewe fansoun ewe SAMOL a öllük ngeniei pwe üpwe äiti ngeni kemi ekkewe öllük me pwüüng ämi öüpwe älleasochisiir me lón ewe fönü ämi öüpwe le tolong lón pwe öüpwe fönüweni.

Öüpwe äfälli kemi ren angangen fel ngeni önümwäl

15Nge öüpwe fókkun tümwünüfichi kemi! Ämi öüsap küna lapalapen ewe SAMOL lón ewe rän i a kapas ngeni kemi seni lúkalapen ewe ekkei meren ewe Chuuk Horeb. 16Ina minne, öüsap föri och föfför mi ngaw ren ämi öüpwe föri fänitemi och uluulun lón och sókkun lapalap, ese lifilifil ika lapalapen emön mwän ika emön fefin, 17lapalapen emön maan ika emön machchang, 18lapalapen emön maan mi tö ika emön iik. 19Lupwen öüwa netä fän läng o küna ewe akkar me ewe maram me ekkewe füü - ekkewe masowen fän läng meinisin - öüpwe tümwünü kemi pwe öüte fen tupwuló reer o fel ngeniir. Pün ewe SAMOL ämi we Kot a ewiisa ekkeei minen fän läng fäniten aramasen fönüfan meinisin. 20Öüpwe chechchemeni pwe ewe SAMOL a chimanü kemi seni Egypt iei ewe leeni mi wewe ngeni pwichikkaren ew leenien ketel mächä pwe ämi öüpwe nöün aramas me älemwirin mi öüchchea. Iwe, ina usun meet nónnómwumi ikenäi.

21Nge ewe SAMOL a soong ngeniei pwokitemi. Iwe, a pwon fän ökköpöl pwe ngang üsap tongeni pwereló peekilón Jordan o tolong lón ewe fönü mi mwirinnö ewe SAMOL ämi we Kot epwe ngeni kemi pwe fönüwemi. 22Inamwo ika ämi öüpwe feilló epeek ewe chaanpwuupwu Jordan, nge ngang üpwe chök mäló ikeei lón ei fönü epeek ei chaanpwuupwu. Nge ämi öüpwe feilló peekiló pwe öüpwe fönüweni ewe fönü mi mwirinnö. 23Iei minne, öüpwe pwisin äfälli kemi pwe öüsap atai ewe pwon ewe SAMOL ämi we Kot a ääni ngeni kemi. Öüpwe atai ewe pwon are öüpwe föri och uluulun önümwääl lón lapalapen ika uluulun och mettóch pün ewe SAMOL ämi we Kot esap wesewesen mwüütätä ei. 24Pün ewe SAMOL ämi we Kot a usun chök ew ekkei mi kenaló mettóch, i emön Kot mi luukommóng pün a opwut än nöün aramas repwe fel ngeni pwal ekkóch kot.

25Lón ekkewe fansoun repwe feitto, lupwen öüpwe nónnómottam lón ewe fönü o epwe wor nöümi me nöün nöümi kana, öüsap pwisin ettipisi kemi ren ämi öüpwe föri sakkopaaten uluulun önümwääl. Iei ew föfför mi ngaw me fän mesen ewe SAMOL ämi we Kot epwe atooto an soong. 26Ikenäi ngang üpwe kööri läng me fönüfan pwe repwe chón pwärätä le ettipisi kemi. Pün are öüsap älleasochisiei, öüpwe mwittir rosoló meinisin seni lón ewe fönü ämi öüpwe le feilló peekilón Jordan pwe öüpwe fönüweni. Öüpwe nónnóm ikenan lón fansoun mwochomwooch chök. Mwirin, öüpwe fókkun rosoló. 27Pün ewe SAMOL epwe atoropassafeili kemi leiin chón ekkewe mwüü, nge ekkóch chök me leiimi repwe manaw lón ekkewe fönü ia ewe SAMOL epwe ösüükemiiló ie. 28Me ikenan, lón fönüwen chón ekis, ämi öüpwe fel ngeni sakkopaaten uluulun önümwäl mi för seni mwüüch me faaw, kana kot resap tongeni küna mweer, resap pwal tongeni rongorong, resap tongeni mwöngö, resap pwal tongeni färeni pwollen och pün iir förien pöün aramas. 29Me ikenan, ämi öüpwe kütta säfäli ewe SAMOL ämi we Kot. Iwe, are öüpwe kütta i ren unusen lelukemi me ngünümi, öüpwe küna. 30Iwe, lupwen öüpwe nóm lón riäfföü o ekkeei mettóch meinisin repwe fis ngeni kemi lón ekkaan rän mwach, mwirin, öüpwe liwinsäfäl ngeni ewe SAMOL ämi we Kot o öüseling ngeni meet epwe üreni kemi. 31Pün ewe SAMOL ämi we Kot i emön Kot mi uren ümöümöch, i esap likiti kemi ika nii kemi, i esap pwal möllükaló an we pwon ngeni ämi kewe leewo i a pwon fän ökköpöl ngeniir.

32Öüpwe kütta lón uruwo, seni ewe fansoun Kot a föri aramas wón fönüfan tori iei. Mwirin, öüpwe kütta seni epeek läng tori pwal epeek. Iwe, öüpwe küna ika mi wor och mettóch mi lapalaap usun ei a fen piin fis me mwan ika aramas ra fen piin rongorong usun ei sókkun lapalap. 33Ifa usun, mi wor aramasen pwal ekkóch mwüü ra fen rongorong mwelien Kot a kapasewu seni lón ekkei, usun ämi öüwa rongorong, nge ra chüen manaw? 34Are ifa usun, mi wor pwal emön kot a fen angei chón ew mwüü fänitan ren an chimanür seni pwal ew mwüü ren manaman me pöchökkül, pwal ren föfför mi amwaraar me manaman, ren maun me osukosuk, pwal ren föfförün eniwokkus mi lapalaap? Nge iei meet ewe SAMOL ämi we Kot a föri fänitemi me mwen mesemi me lón Egypt?

35I a pwääri ngeni kemi ekkeei mettóch pwe öüpwe silei pwe i ewe SAMOL wesewesen i Kot, ese pwal wor emön kot me lükün. 36I a mwüüt ngeni kemi pwe öüpwe rong mwelian seni läng pwe epwe emiriti kemi. I a mwüüt ngeni kemi pwe öüpwe küna an we ekkei mi lapalaap me ikeei wón fönüfan pwe i epwe tongeni kapas ngeni kemi seni lón ewe ekkei. 37Iwe, pwokiten i a echeni ämi kewe leewo, iei minne i a filätä pwe epwe efeiöchüw mwirimwirir kana. Iwe, pwisin i wón inisin a emmwenikemiiwu seni Egypt ren an manaman mi lapalaap. 38I a ösüüweló me mwemi chón ekkewe mwüü mi wätte o pöchökkül lap seni kemi pwe epwe emmwenikemiilong o ngeni kemi fönüwer pwe öüpwe fönüweni, usun a fis ikenäi.

39Iei minne, öüpwe chechchemeni ei o önüküchcharatiw lón ämi ekiek pwe ewe SAMOL wesewesen i Kot peekitä lón läng o pwal peekitiw wón fönüfan. Ese pwal wor emön kot. 40Iei minne, are öüpwe älleasochisi ekkewe öllük me pwüüng meinisin ngang üpwe ngeni kemi ikenäi, ämi öüpwe feiöch me nöümi kana repwe tapweto mwirimi. Mwirin, öüpwe manawattam lón ewe fönü ewe SAMOL ämi we Kot epwe ngeni kemi pwe fönüwemi fansoun meinisin.”

Ekkewe telinimwen op seni feiengaw

41Mwirin Moses a äimwüeló ülüngät telinimwen op seni feiengaw me peliöötiwen ewe chaanpwuupwu Jordan, sässäpengeni ia akkar a töötä me ie, 42pwe ewe chón niieló aramas epwe tongeni süüló ie. Iö a niieló chón órun fän an cheechengaw, nge esap opwut i me mwan, epwe süüngeni ew me leiin ekkeei telinimw pwe epwe tongeni manaw. 43Ikkeei ekkewe telinimw: Bezer mi nóm wón ew leeni mi tekia o sóssónöch lón ewe fönüpöön fäniten chón ewe einangen Reuben. Ewe telinimw Ramoth mi nóm lón ewe fönü Kilead fäniten chón ewe einangen Kad. Ewe telinimw Kolan mi nóm lón ewe fönü Bashan fäniten chón ewe einangen Manassa.

Kapas akkomw me mwen enliwinsäfälin än Kot kewe öllük

44Iwe, iei ewe öllük Moses a isenätiw me mwen ekkewe aramasen Israel. 45Ikkeei ekkewe pwüüng me kapasen pwärätä me öllük Moses a apasa ngeni ekkewe aramasen Israel mwirin ar toowu seni Egypt, 46o ra nónnóm öötiwen ewe chaanpwuupwu Jordan lón ewe leemól arap ngeni Beth Peor. (Me mwan, ei fönü fönüen ekkewe chón Amor fän nemenien King Sihon seni Heshbon. Iei i ätewe Moses me ekkewe aramasen Israel ra niieló me nöün kewe aramas lupwen ra feittä seni Egypt. 47Ekkewe chón Israel ra liäpeni fönüwen Sihon me fönüwen Ok ewe kingen Bashan, iir ekkewe rüömön king nöün ekkewe chón Amor mi nónnóm öötiwen ewe chaanpwuupwu Jordan sässäpengeni ia akkar a töötä me ie. 48Iwe, ekkewe chón Israel ra liäpeni unusen ei kinikinin fönü seni Aroer mi nóm ünükkün ewe Chaanpwuupwu Arnon tori ewe chuuk Sirion (pwal iei Hermon). 49Ra pwal angei unusen ewe maasies mi nóm peliöötiwen ewe leemólun Jordan keiiló öör ngeni ewe Nómwun Arabah, iei ewe Setin Mäló, mi nóm fäätiwen ekkewe palapalatän ewe chuuk Piska.)

Kapasen ekkewe Engol Öllük ra enliwinsäfäl

5 Iwe, Moses a kööri fengeni ekkewe aramasen Israel meinisin o apasa ngeniir, “Ämi chón Israel, öüpwe öüselingöch ngeni ekkewe öllük me pwüüng meinisin ngang üpwe aronga ngeni kemi ikenäi, pwe öüpwe käeö ekkewe öllük o tümwünüfichi pwe öüpwe älleasochisir. 2Lupwen sia nóm ren ewe Chuuk Horeb, iei ewe chuuk Sinai, ewe SAMOL ach we Kot a ääni ew pwon ngeni kich. 3Ewe SAMOL esap ääni ei pwon ngeni ach kewe leewo melóóm nge i ngeni kich öükich meinisin ekkewe mi chüen manaw o nóm ikeei ikenäi. 4Ewe SAMOL a kapas ngeni kemi seni lukalapen ewe ekkei me wón ewe chuuk. 5Lón ena fansoun ngang üwa ü lefiilen ewe SAMOL me ämi, pwe üpwe esile ngeni kemi än ewe SAMOL kapas; pün ämi öüwa nuokkus pwokiten ewe ekkei. Iei minne ämi öüsap feittä wón ewe chuuk. Iwe, Kot a kapas ngeniei, nge ngang üwa afföüweto an kewe kapas ngeni kemi. Iwe, iei meet i a apasa:

6“Ngang ewe SAMOL óm Kot, üwa chimanukowu seni lón ewe fönü Egypt, seni ewe leeni ia ra nöünuk amanaw ie.

7“Kosap ääni pwal ekkóch me lüki.

8“Kosap föri fänitom och sókkun uluulun önümwäl, kosap pwal alapalapa lapalapen och mettóch peekitä lón läng are peekitiw wón fönüfan are lapalapen och mettóch mi nóm lón nöönön fäilól. 9Kosap fókkun fel ngeniir ika angang ngeniir, pün ngang ewe SAMOL óm Kot emön Kot mi luukommóng. Ngang üpwe awarato tipisin ekkewe saam wón ekkewe naaw tori ewe öülüngätin me örüwänüen tettelin pilóón aramas mi opwut ngang. 10Nge üpwe fókkun kirekiröch ngeni chókana mi echeniei o älleasochisi äi kewe öllük. Ngang üpwe kirekiröch ngeni ar kewe famili tori ngöröwün tettelin pilóón aramas.

11“Kosap föünimwääli iten ewe SAMOL óm Kot, pün ewe SAMOL esap likitaló an epwe öpwüngü iö mi föünimwääli itan.

12“Kopwe tümwünü ewe ränin Sabbat pwe kopwe epini, usun ewe SAMOL óm Kot a öllük ngenuk. 13Wonu rän lón ew wiik ra käimwüló fäniten óm kopwe föri wiisom iteiten rän o föri óm angang meinisin, 14nge ewe efisuuen rän iei ewe ränin Sabbat än ewe SAMOL óm Kot, ew ränin asöösö. Lón ei rän, kosap föri och sókkun angang, sapw en ika noum mwän ika fefin, sapw noum chón angang mwän ika fefin, sapw noum ätemwänin kowu me dongki ika pwal emön me leiin noum kewe maan, sapw pwal emön chón ekis mi nóm lón leeniom kewe, pwe noum kewe chón angang mwän me fefin meinisin repwe fókkun asöösö usun chök minne en ka föri. 15Kopwe chechchemeni pwe en ka fen emön amanaw fän ew lón ewe fönü Egypt, nge ewe SAMOL óm we Kot a emmwenukowu seni ikenan ren an pöchökkül mi amwaraar me föfför mi manaman. Ina popun ewe SAMOL óm Kot a öllük ngenuk pwe kopwe tümwünü ewe ränin Sabbat.

16“Kopwe asamolu semom me inom, usun ewe SAMOL óm we Kot a fen öllük ngenuk. Mwirin, kopwe manawattam me lón ewe fönü ewe SAMOL óm we Kot epwe ngenuk.

17“Kosap niieló aramas.

18“Kosap föri tipisin lisowu.

19“Kosap soolä.

20“Kosap ääni kapasen pwärätä mi mwääl le üüngeni chón órum.

21“Kosap mocheniäiti ewe fefin pwülüwen chón órum. Kosap pwal mocheniäiti imwen chón órum are fönüwan are nöün chón angang mwän ika chón angang fefin, nöün ätemwänin kowu are nöün dongki are pwal och mettóch chón órum a ääni.”

22Ewe SAMOL a apasa ekkeei kapas fän mwelian mi leüommóng ngeni kemi meinisin seni lukalapen ewe ekkei, ewe kuchu me ewe rochopwaak mi malüül. Ikkeei üküükün meinisin minne i a apasa lón ewe fansoun. Iwe, i a makkei an kewe kapas wón rüwöpeek faaw mi chööpöp o a ngeniei ekkeei faaw.

Ekkewe aramas ra nuokkusiti Kot

23Nge lupwen öüwa rongorong ewe möngüüngü seni lukalapen ewe rochopwaak, lupwen ewe chuuk a ngetenget ren ekkei, meinisin nöümi kewe souemmwenin ämi kewe einang me nöümi kewe souakkomw ra feitto reei. 24Iwe, ra apasa: “Enlet ewe SAMOL ach we Kot a pwääri ngeni kich an ling me an tekia o sia rongorong mwelian seni lukalapen ewe ekkei. Ikenäi kich sia küna pwe Kot a kapas ngeni aramas, nge kich aramas sia chüen manaw. 25Nge pwata kich sipwe mäló iei? Are ewe SAMOL ach we Kot epwe kapas säfäl ngeni kich, sipwe wesewesen mäló o kareló ren ei ekkei mi äkkälängeföw. 26Ifa usun, mi tongeni wor och mettóch mi manaw epwe rongorong möngüüngün ewe Kot mi manaw seni lukalapen ewe ekkei, nge epwe chüen manaw? 27En kopwe feilló arapakkan ngeni ewe SAMOL ach we Kot o öüseling ngeni meet i epwe apasa. Mwirin, en kopwe feitto o esile ngeni keem meinisin minne ewe SAMOL ach we Kot a apasa ngenuk. Iwe, äm aipwe öüseling o älleasochi.”

28Iwe, ewe SAMOL a rongorong ämi tungór lupwen öüwa fós ngeniei o a apasa ngeniei, “Ngang üwa rongorong meet ekkewe aramas ra apasa ngenuk. Iwe, iir ra pwüng. 29Amwo itä epwe chök iei usun leluker iteiten fansoun ar repwe nuokkusitiei o älleasochisi äi kewe öllük meinisin. Are epwe iei usun meet repwe föri, iwe, iir me mwirimwiriir kana repwe feffeitä tori feilfeilló chök!

30“Iwe, kopwe feilló o üreniir pwe repwe liwinsäfäliló ngeni imwer kewe imw mangaku. 31Nge en Moses kopwe nómwetiw reei ikeei, pwe ngang üpwe ngenuk äi kewe öllük me öüröür me pwüüng meinisin. Iwe, en kopwe äiti ngeni ekkewe aramas ekkeei öllük me öüröür me pwüüng pwe iir repwe älleasochisir me lón ewe fönü ngang üpwe ngeniir pwe fönüwer.”

32Iwe, Moses a üreni ekkewe aramas, “Ämi öüpwe fókkun älleasochisi ekkewe öllük meinisin än ewe SAMOL ämi we Kot. Öüpwe fókkun tichchik le fiti än kewe kapasen öüröür. 33Öüpwe chök fätäl wón ewe aal ewe SAMOL ämi we Kot a öllük ngeni kemi pwe öüpwe fiti. Mwirin, öüpwe manawattam o feffeitä me lón ewe fönü ämi öüpwe le tolong lón o fönüweni.”

Ewe öllük mi lap seni meinisin

6 Ikkeei ekkewe öllük me öüröür me pwüüng ewe SAMOL ämi we Kot a üreniei pwe üpwe äiti ngeni kemi pwe ämi öüpwe älleasochisir me lón ewe fönü öüpwe le tolong lón o fonuweni, 2pwe ämi me nöümi kana me nöün nöümi kana öüpwe nuokkusiti ewe SAMOL ämi we Kot lón üküükün langattamen manawemi. Are öüpwe älleasochisi an kewe öllük me pwüüng meinisin ngang üwa öllük ngeni kemi, ämi öüpwe manawattam. 3Iei minne, ämi chón Israel öüpwe öüselingöch ngeni iteiten ekkewe mettóch ngang üpwe apasa. Öüpwe tümwünüfichi pwe öüpwe älleasochis. Mwirin, öüpwe feiöch o epwe wor chómmóng nöümi semiriit me lón ewe fönü ia a pwuupwu ie milik me chönün chunen, usun ewe SAMOL än ämi kewe leewo we Kot a pwon ngeni kemi.

4Kopwe öüseling en Israel: Ewe SAMOL ach Kot, ewe SAMOL I chök emön! 5Kopwe echeni ewe SAMOL óm Kot ren unusen lelukom, ren unusen ngünum, pwal ren unusen tüfichum. 6Kopwe anómwu lón lelukom ekkeei öllük ngang üwa ngenuk ikenäi pwe kopwe chechchemenir. 7Kopwe liwowomönü le äiti ngeni noum kana semiriit ekkeei kapas. Kopwe fós usur lupwen kopwe móót lón imwom pwal lupwen óm kopwe fätäl wón aal, lupwen óm kopwe kónóló pwal lupwen óm kopwe pwäätä. 8Kopwe föötiretä wón pöum, kopwe pwal föötiretä wón leten mesom pwe repwe älisuk óm öüpwe chechchemeni ekkeei käit. 9Kopwe makkeretä wón üren penkasamen imwom pwal wón asamen tittin leeniom.”

Kapasen fön fäniten älleasolap

10Iwe, ewe SAMOL ämi we Kot epwe emmwenikemiilong lón ewe fönü i a fen pwon fän ökköpöl pwe epwe ngeni ämi kewe leewo: Abraham, Isaak me Jakob. Iei ew fönü mi ur ren telinimw wätte o mwirinnö nge sap ämi öüwa öüüretä. 11Ekkeei imw repwe ur ren chómmóng mettóch mi mwirinnö ämi öüsap aworer. Öüpwe pwal üfüüf kólik seni chönüttu ämi öüsap tuuw, öüpwe pwal ochooch seni ekkewe tännipiin irän wain me ekkewe irä olif ämi öüsap fótukiir. Iwe, lupwen öüpwe mwöngö o mötüló me lón ei fönü, 12öüpwe äfälli kemi pwe öüsap möllükaló ewe SAMOL mi chimanükemiiwu seni ewe fönü Egypt, ia ra nöüni kemi amanaw ie.

13Öüpwe nuokkusiti ewe SAMOL ämi we Kot o angang ngeni i echök. Lupwen öüpwe pwon fän ökköpöl, öüpwe chök fókkun aea itan. 14Öüsap fókkun fel ngeni emon leiin ekkewe kot än chón ekkewe mwüü mi nóm pwellin ünükkümi, 15pün ewe SAMOL ämi we Kot mi nónnóm leiimi, i emön Kot mi luukommóng. An soong epwe keni kemi o arosakemiiló seni wón fönüfan. 16Öüsap sótuni ewe SAMOL ämi we Kot, usun öüwa fen föri lupwen öüwa tunoppwen me lón Massah. 17Öüpwe fókkun achoocho le älleasochisi ekkewe öllük me pwüüng me kapasen pwärätä än ewe SAMOL ämi we Kot i a fen ngeni kemi. 18Iwe, öüpwe föri meet mi pwüng o mwirinnö me fän mesen ewe SAMOL pwe öüpwe feiöch. Mwirin, öüpwe tolong o fönüweni ewe fönü mi mwirinnö ewe SAMOL a fen pwon fän ökköpöl ngeni ämi kewe leewo. 19Iwe, öüpwe ösüüwowu chón opwutemi kewe meinisin, usun minne ewe SAMOL a fen apasa pwe öüpwe föri.

20Iwe, lón kan fansoun mwach, nöümi kana repwe eisini kemi o apasa, “Meet wewen ekkeei kapasen pwärätä me öllük me pwüüng ewe SAMOL ach we Kot a ngeni kich?” 21Mwirin, öüpwe apasa ngeni ngeniir: “Äm aia nöün Farao amanaw lón Egypt, nge ewe SAMOL a emmwenikeemiwu seni Egypt ren manaman mi amwaraar. 22Ewe SAMOL a föri me mwen meseem esissil me manaman mi lapalaap. Äm aia küna i an föri ekkewe feiengaw ngeni Egypt me Farao pwal chón leimwan meinisin. 23Mwirin i a emmwenikeemiwu seni Egypt pwe epwe ngeni keem ei fönü i a fen pwon fän ökköpöl pwe epwe ngeni ach kewe leewo. 24Iwe, ewe SAMOL ach we Kot a öllük ngeni keem pwe aipwe älleasochisi ekkeei öllük meinisin o meniniti i. Iwe, aipwe feiöch iteiten fansoun meinisin, nge i epwe tümwünü manaweem, usun a fis ikenäi. 25Are aipwe tümwünüfichi le älleasochisi ekkeei öllük meinisin me fän mesen ewe SAMOL ach we Kot usun a öllük ngeni keem; mwirin, epwe wor äm pwüng.”

Ew mwiichen aramas mi fil

7 Lupwen ewe SAMOL ämi we Kot epwe emmwenikemiilong lón ewe fönü öüpwe le tolong lón pwe öüpwe fönüweni nge i a fen ösüüweló chómmóng mwüü me mwemi, ikkeiir ekkewe chón Hit, chón Kirkas, chón Amor, chón Kanaan, chón Periz, chón Hiv me chón Jebus. Ikkeei ekkewe fisu mwüü mi wätte o pöchökkül lap seni kemi. 2Lupwen ewe SAMOL ämi we Kot epwe atolonga chón ekkeei mwüü lepöümi o ämi öüpwe okkufur, öüpwe unusen arosereló. Öüsap föri och pwonen etipeew ngeniir, öüsap pwal ääni ümöümöch ngeniir. 3Öüsap pwal pwüpwülü ngeniir. Öüsap mwüüt ngeni nöümi kana föpwül me mwän repwe pwüpwülü ngeni nöüür kana mwän me föpwül. 4Pün iir repwe attókaló nöümi kewe mwän me föpwül seni ewe SAMOL pwe repwe fel ngeni pwal ekkóch kot. Iwe, ewe SAMOL epwe soong ngeni kemi o mwittir arosakemiiló. 5Nge epwe iei usun minne öüpwe föri ngeniir: Öüpwe ataeló ar kewe róngen asór o ataatakisietiw ar kewe üür mi pin. Öüpwe pwal pöküwetiw ar kewe uluulun önü mi för seni mwüüch o kenaló ren ekkei ar kewe uluulun önümwäl mi fal. 6“Pün ämi ew mwiichen aramas mi pin fäniten ewe SAMOL ämi we Kot. Ewe SAMOL ämi we Kot a fili kemi pwe öüpwe ew mwiichen aramas fänitan, ew mwiichen aramas mi sókkóló öüchchear seni leiin aramas meinisin wón unusen fönüfan.

7Ewe SAMOL a tongeekemi o filikemi sap pwokiten ämi öüwa chómmóng seni ekkewe ekkóch mwiichen aramas, pün ämi öüwa chóókisikiis seni ekkewe mwiichen aramas meinisin, 8nge pwokiten ewe SAMOL a tongeekemi pwal pwokiten i a ömwöchü an pwon i a pwon fän ökköpöl ngeni ämi kewe leewo. Iei popun ewe SAMOL a chimanü kemi ren an manaman mi amwaraar o angasa kemi seni Egypt ewe fönü ia ra nöüni kemi amanaw ie, seni fän nemenien Farao ewe kingen Egypt. 9“Iei minne, öüpwe weweiti pwe ewe SAMOL ämi we Kot, i wesewesen Kot. I ewe Kot mi ölükülük a öpwönüwetä an pwonen ümöümöch ngeni ngöröwün pilóón aramas. A sópweló le echeni chókana mi echeni i o älleasochisi an kewe öllük.

10Nge i esap mang le öpwüngü o arosaló chókana mi opwut i.

11Iei minne, öüpwe älleasochisi ekkeei öllük me öüröür me pwüüng meinisin ngang üwa ngeni kemi ikenäi.

Feiöchün älleasochis

12Are öüpwe öüseling ngeni ekkeei öllük o likiitü le älleasochis ngeniir, ewe SAMOL ämi we Kot epwe öpwönüwetä an pwon o pwääri än ümöümöch ngeni kemi usun a fen pwon fän ökköpöl ngeni ämi kewe leewo. 13I epwe echeni kemi o efeiöchü kemi, epwe pwal föri pwe öüpwe wiliti ew mwüü mi lapalaap. I epwe fang ngeni kemi chómmóng nöümi semiriit. I epwe fang ngeni fönüwemi we pwe epwe fönüeres me nöümi kewe maan pwe repwe upw. Lupwen öüpwe wareiti lón ewe fönü i a pwon fän ökköpöl pwe epwe ngeni ämi kewe leewo, epwe wor chómmóng uwään fótäämi wiit me uwään fótäämi irän wain me apüra seni föün olif. Epwe pwal wor chómmóng nöümi pwiin kowu me nöümi pwiin siip me kuuch. 14Ämi öüpwe feiöch lap seni aramasen ekkewe mwüü meinisin wón fönüfan. Esap wor emön mwän ika emön fefin epwe riit me leiimi are me leiin nöümi kewe pwiin maan. 15Iwe, ewe SAMOL epwe tümwünü kemi seni ekkewe samwaw meinisin. I esap mwüüt ngeni kemi pwe öüpwe riäfföü ren ew me leiin ekkewe samwaw ämi öüwa silei usur me lón Egypt, nge i epwe awarato ekkewe samwaw wón chókana mi opwut ämi. 16Ämi öüpwe arosaló chón ekkewe mwüü meinisin ewe SAMOL ämi we Kot a atolonger lepöümi. Öüsap ääni kirekiröch ngeniir, öüsap pwal fel ngeni ar kewe kot. Pün are öüpwe fel ngeni ar kewe kot; iwe, repwe epwe ew leenien likottup ngeni kemi.

17Eli ina öüpwe pwisin ekiekielong lón lelukemi, ‘Epwe ifa usun äm aipwe tongeni okkufu ekkeei mwüü mi fókkun wätte ar pöchökkül lap seni keem?’ 18Öüsap nuokkusitiir! Öüpwe chök chechchemeniöchüw meet ewe SAMOL ämi we Kot a föri ngeni Farao me ngeni chón Egypt meinisin. 19Öüpwe chechchemeni ekkewe feiengaw mi lapalaap ewe SAMOL ämi we Kot a tiinato wóór. Ämi öüwa küner meinisin ren mesemi! Öüpwe chechchemeni ekkewe esissil mi manaman me ekkewe föfför mi amwaraar pwal ekkewe manaman mi amwaraar ewe SAMOL a aea lupwen a emmwenikemiiwu seni Egypt. Ewe SAMOL ämi we Kot epwe aea ei chök pwal manaman ngeni ekkewe aramas ämi öüwa nuokkusitiir. 20Iwe pwal och, ewe SAMOL ämi we Kot epwe tiinato feiengaw epwe usun achi pwe repwe ösüüweló ekkewe ekkóch lussun mi manaw mi chüen op seni kemi! 21Apwi, öüsap nuokkusiti chón ekkana mwüü, pün ewe SAMOL ämi we Kot mi nóm reemi. I ewe emön Kot mi lapalaap o äkkälängeföw. 22Ewe SAMOL ämi we Kot epwe tapweewu chón ekkewe mwüü me mwemi ekis me ekis. Ämi öüsap tongeni arosereló fän ew chök, pün are öüpwe föri ei, ekkewe maanmwacho repwe mwittir le chómmóngóló seni kemi. 23Nge ewe SAMOL ämi we Kot epwe atolonger lepöümi. I epwe atolonger lón fitikooko tori repwe rosoló. 24I epwe pwal atolonga nöüür kewe king lepöümi, nge ämi öüpwe tölaawu iter seni wón fönüfan. Esap wor emön epwe tongeni üüngeni kemi, nge ämi öüpwe arosereló meinisin. 25Ämi öüpwe kenaló ar kewe uluulun önümwäl. Öüsap mocheniäiti ewe silifer ika kolt ekkewe uluulun önümwäl ra för seni. Öüsap angei och fänitemi, pwe ina epwe wiliti och likottup ngeni kemi, pün ei mettóch a enniopwut meren ewe SAMOL ämi we Kot. 26Öüsap pwal uwealong och mettóch mi enniopwut lón imwemi pwe ina öüpwe käimwüló pwe öüpwe kata usun ewe mettóch mi enniopwut. Nge öüpwe unusen opwut ekkeei sókkun mettóch o niopwutäsiniir, pün ra käimwüló pwe repwe kata.

Chechchemeni ewe SAMOL òm Kot

8 Öüpwe fókkun tümwünüfichi ämi öüpwe älleasochisi ekkewe öllük meinisin ngang üwa öllük ngeni kemi ikenäi. Mwirin, öüpwe manaw o chómmóngóló, iwe, öüpwe tolong o fönüweni ewe fönü ewe SAMOL a pwon fän ökköpöl ngeni ämi kewe leewo. 2Öüpwe chechchemeni usun än ewe SAMOL ämi we Kot a emmwenikemi lón ewe fönüpöön lón ekkewe fääik ier, pwe epwe etekisóna kemi o sótuni kemi pwe epwe älelleta wenechcharen manawemi pün epwe küna are öüpwe wesewesen älleasochisi an kewe öllük ika öüsap. 3Ewer, i a etekisóna kemi ren an likiti kemi pwe öüpwe echik. Mwirin, i a amwöngö ngeni kemi manna, och mwöngö ämi me ämi kewe leewo öüsap sissilei me mwan. I a föri ei pwokiten i a mochen epwe äiti ngeni kemi pwe aramas resap manaw ren mwöngö chök, nge aramas ra manaw ren iteiten kapas mi toowu seni awen ewe SAMOL. 4Lón ekkeei fääik ier meinisin, üfemi kewe resap kamweló seni kemi pwal pachapachemi resap ngütütä ika pwo. 5Iei minne, öüpwe silei pwe usun chök än emön saam ika iin emiriti emön nöün, ewe SAMOL a emiriti kemi pwe epwe älisi kemi.

6Ina minne, öüpwe älleasochisi ekkewe öllük än ewe SAMOL ämi we Kot ren ämi öüpwe fätäl lón an kewe aal o meniniti i. 7Pün ewe SAMOL ämi we Kot epwe emmwenikemiilong lón ew fönü mi mwirinnö, ew fönü mi wor pwuupwun kólik, pwuachchen kólik me limiror mi pwuupwuwu seni ekkewe leemól me ekkewe chukuchukutä. 8Iei ew fönüwen wiit me barli, irän wain me irä fiik me och sókkun irä usun apel itan pómekränet, ew fönüwen ewe irä olif me chönün chunen. 9Iei ew fönü ia mwöngö a chómmóng ie, esap wor och mettóch epwe naffangaw. Iei ew fönü ia mächä a usun chök chómmóngun faaw o a wor chómmóng kapa ra tuuwetä seni wón ekkewe chukuchukutä.

10Iwe, lupwen öüpwe mwöngö o mötüló, öüpwe mwareiti ewe SAMOL ämi we Kot fäniten ewe fönü mi mwirinnö i a ngeni kemi. 11Nge iei ewe fansoun öüpwe fókkun tümwünöch. Öüpwe äfälli kemi pwe lupwen a wor reemi chómmóng, öüsap möllükaló ewe SAMOL ämi we Kot o öüwa älleasolap ngeni an kewe öllük me pwüüng me öüröür. 12Pün lupwen öüpwe mwöngö o mótüló pwal lupwen öüpwe nónnómöch o köüütä imwemi mi mwirinnö o imweimw lóór, 13pwal lupwen repwe chómmóngóló nöümi pwiin kowu me siip, pwal nöümi kolt me silifer repwe chómmóngóló, pwal meinisin minne a wor reemi repwe chómmóngóló, 14iei ewe fansoun öüpwe fókkun tümwünüfichi kemi. Öüsap lamalamtekia lón lelukemi lón ei fansoun o möllükaló ewe SAMOL ämi we Kot mi chimanü kemi seni ewe fönü Egypt, ewe fönü ia ra nöüni kemi amanaw ie. 15Öüsap möllükaló pwe i ewe a emmwenikemi lón ewe fönüpöön mi wätte o eniwokkus, ia a wor ie serepenit me inen mönnükam mi poison, iei ewe fönü mi pwichikkar o pwasapwas. Ewe SAMOL a ngeni kemi ünümemi kólik seni lón ewe achaw mi pöchökkül. 16I a pwal amwöngö kemi manna me lón ewe fönüpöön, och mwöngö ämi kewe leewo resap silei. I a föri ei pwe epwe etekisóna kemi o sótuni kemi fäniten pwisin öchchümi. 17I a föri ei pwe öüsap fókkun ekieki pwe pwisin ämi pöchökkül me tüfichin pöümi ra föri pwe öüpwe pisekisekiló. 18Öüpwe chechchemeni fansoun meinisin pwe ewe SAMOL ämi we Kot, i ewe a fang ngeni kemi ämi pöchökkül pwe öüpwe pisekisekiló. Nge i a föri ei pwe epwe öpwönüwetä ewe pwon i a ääni ngeni ämi kewe leewo.

19Nge are öüpwe möllükaló ewe SAMOL ämi we Kot o tapweló mwirin pwal ekkóch kot pwe öüpwe fel ngeniir o chappetiw ngeniir, ngang üpwe fókkun pwärätä ngeni kemi ikenäi pwe öüpwe wesewesen rosoló. 20Usun chök än ewe SAMOL a arosaló chón ekkewe mwüü me mwemi, iei usun pwal ämi öüpwe wesewesen rosoló are öüsap älleasochisi ewe SAMOL ämi we Kot.

Porausen än Israel tipeförea a enliwinsäfäl

9 Öüpwe rongorong ämi chón Israel. Ikenäi öüpwe le pwereló epeek ewe chaanpwuupwu Jordan pwe öüpwe le tolong ewe fönü fönüwen chón ekkewe mwüü mi wätte o pöchökkül lap seni kemi. Ra nónnóm lón ekkewe telinimw mi wätte o tekiatä tittiir tori fän läng. 2Ekkewe aramas ra wätte o langattam, iir ekkewe mwirimwirin Anak mi iteföüló. Ämi öüwa silei usur o rong än aramas apasa, “Iö epwe tongeni üütä me mwen ekkewe mwirimwirin Anak?” 3Nge ewe SAMOL ämi we Kot epwe pwereló epeek ewe chaanpwuupwu o akkomwoló mwemi usun chök ew ekkei mi ngetenget pwe epwe keniireló. I epwe okkufur me mwemi pwe ämi öüpwe mwittir okkufur o ösüürowu, usun ewe SAMOL a fen pwon.

4Iwe, mwirin än ewe SAMOL ämi we Kot epwe ösüreló me mwemi, öüsap ekieki lón lelukemi o apasa, “Ewe SAMOL a fang ngeni kich ei fönü pwe sipwe fönüweni, pwokiten kich sia pwüng!” Apwi, ewe SAMOL epwe föri ei pwokiten föfföringawen chón ekkewe ekkóch mwüü. 5Esap pwokiten ämi pwüng ika wenechcharen lelukemi öüpwe tolong o fönüweni fönüwer. Ewe SAMOL ämi we Kot epwe ösüüwowu chón ekkeei mwüü me mwemi pwokiten chök ar föfföringaw, pwal pwokiten an epwe öpwönüwetä ewe pwon i a ääni fän ökköpöl ngeni ämi kewe leewo Abraham, Isaak me Jakob. 6Ngang üpwe apasa säfäli ei: Ewe SAMOL ämi we Kot a ngeni kemi ei fönü mi mwirinnö pwe öüpwe fönüweni sap pwokiten ämi öüwa pwüng, pün ämi öüsap pwüng. Ämi ew mwiichen aramas mi tipeförea.

7Öüpwe chechchemeni! Öüsap möllükaló usun ämi öüwa asoonga ewe SAMOL ämi we Kot me lón ewe fönüpöön. Seni ewe rän ämi öüwa toowu seni ewe fönü Egypt tori ämi öüwa tolong lón ei leeni, öüwa chök sópweló ämi tipeförea le üüngeni ewe SAMOL. 8Öüpwe pwal chechchemeni usun ämi asoonga ewe SAMOL me ren ewe Chuuk Horeb, ia i a mollotä pwe epwe arosakemiiló me ie. 9Lón ena ótun, ngang üwa nóm wón ewe chuuk pwe üpwe angei ekkewe rüwöpeek faaw mi chööpöp ia a makketiw ie kapasen ewe pwon ewe SAMOL a ääni ngeni kemi. Ngang üwa nónnóm wón ewe chuuk lón üküükün fääik rän me fääik pwiin. Lón unusen ena fansoun, ngang üsap mwöngö och mwöngö, üsap pwal ünümi och kólik. 10Mwirin, ewe SAMOL a ngeniei ekkewe rüwöpeek faaw mi chööpöp. I a makkeetiw an kewe öllük wón ekkewe faaw ren pwisin ächefen pöün. I a makkeetiw wór ekkewe kapas meinisin i a apasa ngeni kemi seni lukalapen ewe ekkei lón ewe ränin öüwa mwiich fengen meren ewe chuuk.

11Iwe, lesópwólón ekkewe fääik rän me fääik pwiin, ewe SAMOL a eiti ngeniei ekkewe rüwöpeek faaw mi chööpöp, nge kapasen ewe pwon a makketiw wóór. 12Mwirin, ewe SAMOL a apasa ngeniei, “Kopwe üütä o mwittir feittiw seni ikeei, pwokiten noum kewe aramas en ka emmweniirewu seni Egypt ra fókkun föfföringaw. Ra fen tókkóló seni ewe sókkun manaw ngang üwa öllük ngeniir pwe repwe manaweni. Iwe, ra föri och uluulun önümwäl fäniter seni kolt mi ketel.”

13Iwe, ewe SAMOL a sópweló le apasa ngeniei, “Ngang üwa nengeni ei mwiichen aramas o küna pwe enlet iir ew mwiichen aramas mi wesewesen tipeförea. 14Kopwe likitieló pwe ngang üpwe le arosereló o amóiló iter seni wón fönüfan. Mwirin, ngang üpwe föri ew mwiichen aramas seni mwirimwirum kana, ew mwiichen aramas mi pöchökkül o chómmóng lap seniir.”

15Ina minne, ngang üwa kul o feittiw seni wón ewe chuuk mi ngetenget ren ekkei, nge üwa kömwöch lón peii ekkewe rüwöpeek faaw mi chööpöp mi makketiw kapasen ewe pwon wóór. 16Iwe lupwen üwa nennetiw, üwa küna pwe öüwa tipis ngeni ewe SAMOL ämi we Kot. Pün üwa küna ewe uluulun liälifföön kowu öüwa föri seni kolt mi ketel. Öüwa mwittir kul seni ewe aal ewe SAMOL a öllük ngeni kemi pwe öüpwe fätäl wón. 17Ina minne, ngang üwa chünäätä ekkewe rüwöpeek faaw mi chööpöp o otururetiw lepwül. Iwe, üwa ömökküür me mwen mesemi.

18Mwirin, ngang üwa chappetiw me mwen ewe SAMOL lón üküükün fääik rän me fääik pwiin. Üsap mwöngö och mwöngö, üsap pwal wün kólik. Ngang üwa föri ei pwokiten öüwa tipis ren ämi föri meet ewe SAMOL a opwut, iwe, öüwa föri pwe i epwe fókkun soong. 19Pün ngang üwa nuokkus fänitemi, pwokiten ewe SAMOL a mollotä pwe epwe arosakemiiló. Nge ewe SAMOL a öüselinga äi tungór pwal lón ei fansoun. 20Iwe, ewe SAMOL a fókkun soong ngeni pwal Aaron o a ekiekin epwe niieló i. Ina minne, ngang üwa pwal iótek fäniten Aaron lón chök pwal ewe fansoun. Iwe, ewe SAMOL esap niieló. 21Mwirin, ngang üwa angei ämi we tipis, iei ewe uluulun liälifföön kowu öüwa föri o üwa etelaló lón ewe ekkei. Iwe, üwa ataatakisietiw o pwooni ekkewe kinikinikisin tori ra usun chök süüsü. Mwirin, üwa oturalong ewe süüsü lón ewe kükkün pwuupwu mi pwuutiw seni wón ewe chuuk.

22Ämi öüwa pwal föri pwe ewe SAMOL epwe soong me lón Taperah me Massah me Kibrot Hattaavah.

23Pwal ina chök usun lupwen ewe SAMOL a tiinikemiiló seni Kadesh Barnea o apasa, “Öüpwe feittä o angei ewe fönü ngang üwa ngeni kemi pwe öüpwe fönüweni.” Nge ämi öüwa üüngeni än ewe SAMOL ämi we Kot öllük. Iwe, öüsap lükü i öüsap pwal älleasochisi i. 24Ewer, ämi öüwa chök üüngeni ewe SAMOL lón üküükün langattamen ewe fansoun ngang üwa sileekemi.

25“Ina pwata ngang üwa chappetiw fän mesen ewe SAMOL lón üküükün fääik rän me fääik pwiin, lupwen i a mollotä pwe epwe arosakemiiló. 26Ngang üwa iótek ngeni ewe SAMOL o apasa: “Äi Samol KOT, kosap arosaló noum kewe aramas. Iir älemwirum kewe en ka angaser seni Egypt ren óm manaman mi lapalaap me óm pöchökkül mi ling. 27Kosap nennengeni än ei mwiichen aramas tipeförea ika ar föfföringaw ika ar tipis, nge kopwe chechchemeni noum kewe chón angang, Abraham, Isaak me Jakob. 28Are kopwe arosaló ekkeei aramas, ekkewe chón Egypt repwe apasa, ‘Ewe SAMOL a arosereló pwokiten i esap tongeni emmwenirelong lón ewe fönü i a pwon pwe epwe ngeniir.’ Ika ina repwe pwal apasa, ‘I a arosereló pwokiten i a opwut iir. Iei minne, i a emmwenirelong lón ewe fönüpöön pwe epwe niireló.’ 29Nge iir noum aramas me chón älemwiruk, en ka mööniir seni Egypt ren óm manaman mi lapalaap me óm pöchökkül mi ling.”

Ewe oruuwen peaan faaw mi chööpöp

10 Iwe, lón ena fansoun ewe SAMOL a apasa ngeniei, “Kopwe amollätä rüwöpeek faaw mi chööpöp usun chök kewe akkomwan o kopwe föri ew pwóór mi pin seni mwüüch pwe kopwe iseniir lón. Mwirin, kopwe liwinsäfälitä reei wón ewe chuuk. 2Iwe, ngang üpwe makkei wón ekkewe faaw mi chööpöp ekkewe chök kapas mi mak wón ekkewe akkomwan en ka ömökküür. Mwirin, kopwe isenalong ekkewe faaw mi chööpöp lón ewe pwórofel, iei ewe Pwórun ewe Pwon.”

3Ina minne, ngang üwa föri ew pwóór seni mwüchün ewe irä akasia o faleei rüwöpeek faaw mi chööpöp usun chök ekkewe rüwöpeek akkomwan. Iwe, üwa feittä wón ewe chuuk nge üwa uweei ekkewe rüwöpeek faaw mi chööpöp lón peii. 4Iwe, ewe SAMOL a makkei säfäli kapasen ewe Pwon, ikkeei ekkewe Engol Öllük, wón ekkewe faaw mi chööpöp usun chök makken wón ekkewe mesemwan. Ikeei chök pwal ekkewe kapas ewe SAMOL a apasa ngeni kemi seni lukalapen ewe ekkei me wón ewe chuuk lón ewe ränin öüwa mwiichfengen lesöön ewe chuuk. Iwe, ewe SAMOL a ngeniei ekkewe faaw mi chööpöp. 5Mwirin, ngang üwa kul o feittiw seni wón ewe chuuk. Iwe, üwa isenalong ekkewe faaw mi chööpöp lón ewe pwórofel ngang üwa fen föri usun ewe SAMOL a öllük ngeniei. Iwe, ekkewe faaw mi chööpöp ra nóm ikenan lón ewe pwórofel iei.

6(Ekkewe aramasen Israel ra feilló seni ekkewe chönüttu lón Bene Jaakan o sääi ngeni Moserah, ikeweia Aaron a mäló o peias ie. Iwe, nöün we mwän itan Eleazar a wiliti emön souasór mi lap lón leenien saman we. 7Mwirin, ra sääi seni ikenän o sääi ngeni Kudkodah. Iwe, ra sääi seni Kudkodah o sääi ngeni Jotbathah, ew fönüwen chönüpwuupwun kólik. 8Lón ena fansoun, ewe SAMOL a äimwüeló chón ewe einangen Levi pwe repwe mwärei an we pwórofel, iei ewe pwórun pwon. Repwe pwal angang fän mesen ewe SAMOL o atoowu kapasen feiöch lón iten ewe SAMOL. Ikkeei ar angang ra chüen föri tori ikenäi. 9Iei minne, esap wor inetin Levi ika wiisan me leiin pwiin kewe. Pün pwisin ewe SAMOL ina wiisan, usun chök minne ewe SAMOL ämi we Kot a apasa ngeni i.

10Usun ngang üwa apasa me mwan pwe ngang üwa nónnóm wón ewe chuuk lón üküükün fääik rän me fääik pwiin, usun chök minne üwa föri lón ewe äewin fansoun. Iwe, ewe SAMOL a pwal öüselingsäfäl ngeni äi tungór lón ena fansoun o a filätä pwe esap arosakemiiló. 11Nge ewe SAMOL a apasa ngeniei, “Kopwe üütä pwe kopwe emmwenalong ekkewe aramas lón ewe fönü ngang üwa pwon fän ökköpöl pwe üpwe ngeni ar kewe leewo pwe repwe angei pwe repwe fönüweni.”

Öüchchean masowen ekkewe öllük

12Iwe iei, ämi chón Israel, meet ewe SAMOL ämi we Kot a mochen seni kemi? Ewe SAMOL Kot a mochen pwe öüpwe meniniti i o föri meet letipan. I a mochen pwe öüpwe echeni i o fel ngeni i ren unusen lelukemi me ngünümi. 13I a pwal mochen pwe öüpwe älleasochisi an kewe öllük me an kewe pwüüng ngang üwa ngeni kemi ikenäi fäniten ämi öüpwe feiöch.

14Enletin, ekkewe läng mi fókkun tekia me fönüfan pwal mettóch meinisin mi nóm lón, än ewe SAMOL ämi we Kot. 15Inamwo nge ewe SAMOL a filätä seni lón letipan pwe i epwe echeni ämi kewe leewo. Iwe, i a filikemiitä ämi mwirimwiriir kana mwen chón ekkewe mwüü meinisin, usun a pwääpwäló ikenäi. 16Iei minne, öüpwe limeti lelukemi mi uren tipis o ükütiw seni ämi tipeförea. 17Pün ewe SAMOL ämi we Kot i ewe Kot mi tekia seni ekkewe kot. Pwal i ewe Samol mi tekia seni ekkewe samol. I ewe Kot mi lapalaap, a manaman o eniwokkus, esap lifilifil aramas, esap pwal angei liffangen emichimich. 18I a ääni öpwüngüwen le peni ekkewe mi määsen me ekkewe fefin mi määseniir pwülüwer. I a echeni ekkewe waasöla mi nónnóm leiimi o fang ngeniir ener mwöngö me üfeer. 19Iei minne, pwal ämi öüpwe tongei waasöla, pün ämi öüwa piin waasöla fän ew lón ewe fönü Egypt. 20Öüpwe meniniti ewe SAMOL ämi we Kot. Öüpwe fel ngeni i o kömwöchünnük wón. Öüpwe ääni ämi pwon lón itan chök. 21I echök ämi Kot, ewe emön mi fich ngeni ämi öüpwe mwareiti, ewe emön mi föri ekkewe manaman mi lapalaap ämi öüwa pwisin küner. 22Lupwen ämi kewe leewo ra feittiw Egypt, iir ra chök fiik aramas. Nge iei ewe SAMOL ämi we Kot a föri pwe öüpwe usun chök chómmóngun ekkewe füün fän läng.

Liwinin tong me älleasochis

11Iei minne, öüpwe echeni ewe SAMOL ämi we Kot o älleasochisi an kewe öüröür me pwüüng me osomän me öllük meinisin. 2Öüpwe öüseling! Ngang üsap kapas ngeni nöümi kana iei, pün esap fis ngeniir lón manawer än ewe SAMOL ämi we Kot köpwüngün emiriit, rese pwal küna usun an tekia me an manaman mi eniwokkus. 3Iir resap nóm ikenan lón Egypt pwe repwe küna ekkewe esissil mi manaman me ekkewe föfför mi amwaraar i a föri me lón Egypt ngeni Farao pwal ngeni unusen fönüwan. 4Iir resap küna meet ewe SAMOL a föri ngeni ewe mwiichen sounfiun Egypt me ngeni nöüür kewe óris me war kewe wóóken, usun an amanumur lón ewe Setipar lupwen ra tapweri kemi, pwal usun än ewe SAMOL a arosereló tori ei rän. 5Iir resap küna usun än ewe SAMOL a tümwünü kemi me lón ewe fönüpöön tori öüwa wareto lón ei leeni. 6Iir resap nóm ar repwe küna meet ewe SAMOL a föri ngeni Dathan me Abiram ( iir nöün Eliab kewe mwän, nge Eliab i emön mwirimwirin Reuben) lupwen ewe pwül a saangfesen o oromireló fiti chón leimwer kana me imweer kewe imw mangaku me pisekiir meinisin mi nóm reer. 7Nge ämi öüwa küna iteiten ekkeei föfför mi lapalaap meinisin ewe SAMOL a föri me mwen mesemi.

8Iei minne, öüpwe tümwünüfichi pwe öüpwe älleasochisi iteiten ekkewe öllük ngang üwa ngeni kemi ikenäi pwe epwe tongeni wor ämi pöchökkül le tolong o fönüweni ewe fönü öüpwe le tolong lón, iei ewe fönü öüpwe le pwereló epeek ewe chaanpwuupwu Jordan pwe öüpwe fönüweni. 9Are öüpwe älleasochis, öüpwe manawattam lón ewe fönü ewe SAMOL a pwon fän ökköpöl pwe epwe ngeni ämi kewe leewo pwal ngeni kemi ämi mwirimwiriir kana, ew fönü ia a pwuupwu ie milik me chönün chunen. 10Pün ewe fönü ämi öüpwe le feilló o fönüweni esap usun ewe fönü Egypt ämi öüwa toowu seni, ikeweia ämi öüwa angang weires le fótuki fótäämi föün irä o tuuw warawaren kólik ngeni pecheemi pwe atüütün fótäämi irä usun emön a föri ren an atake. 11Ewe fönü ämi öüpwe le pwereló lón pwe öüpwe fönüweni, ew fönü mi wor chukuchukutä me leemól, a wor chómmóng kólik mi püngütiw seni läng, 12ew fönü ewe SAMOL ämi we Kot a tümwünü. Ewe SAMOL ämi we Kot a mammasa ewe fönü iteiten fansoun meinisin, seni lepoputän ew ier tori lesópwólón.

13Iwe, are öüpwe tümwünüfichi le älleasochisi ekkewe öllük meinisin ngang üwa ngeni kemi ikenäi, pwal are öüpwe echeni ewe SAMOL ämi we Kot ren unusen lelukemi me ngünümi, pwal are öüpwe fel ngeni i, 14mwirin, i epwe fang ngeni kemi üüt lón ekkewe fansoun mi weneiti fäniten fönüwemi, ewe üten leefen me üten leres, pwe öüpwe tongeni ionalong kiniiemi föün wiit, föün irän wain fäniten wain mi fö me föün olif fäniten apüra. 15Iwe, i epwe föri pwe fetil repwe määritä lón ämi kewe tännipi fäniten nöümi kewe pwiin kowu. Iwe, ämi epwe wor chómmóng enemi.

16Nge öüpwe pwisin äfälli kemi pwe öüsap mwüüt ngeni lelukemi pwe repwe kul seni ewe SAMOL pwe öüpwe fel ngeni pwal ekkóch kot. 17Pün are öüpwe kul seni ewe SAMOL, an soong epwe keni kemi. Iwe, i epwe esipaló läng pwe esap püng üüt o ewe fönü esap üwa. Mwirin, ämi öüpwe mwittir mäló me lón ewe fönü mi mwirinnö ewe SAMOL epwe ngeni kemi. 18“Iei minne, öüpwe önüküchcharatiw äi keei kapas lón lelukemi me lón ngünümi. Öüpwe föötiretä wón pöümi pwe epwe och minen ächchem, öüpwe pwal föötiretä wón leten mesemi. 19Öüpwe äeööw ngeni nöümi kana ekkeei kapas, öüpwe fós usur lupwen öüpwe móót lón imwemi, lupwen öüpwe fätäl wón aal, lupwen öüpwe kónóló o lupwen öüpwe pwäätä. 20Iwe, öüpwe makkeeretä wón ömwüchün penkasamen imwemi pwal wón asamen tittin leeniemi, 21pwe üküükün langattamen fansoun än läng a nóm asen fönüfan, ämi me nöümi kana öüpwe manaw lón fansoun langattam me lón ewe fönü ewe SAMOL a pwon pwe epwe ngeni ämi kewe leewo.

22Öüpwe tümwünüfichi pwe öüpwe älleasochisi ekkeei öllük meinisin ngang üwa ngeni kemi, pwe öüpwe echeni ewe SAMOL ämi we Kot ren ämi öüpwe fätäl lón an kewe aal meinisin o kömwöchünnük wón Kot. 23Mwirin, ewe SAMOL epwe osüüweló chón ekkewe mwüü meinisin seni lón fönüwemi. Iwe, öüpwe fönüweni fönüwen chón ekkewe mwüü mi wätte o pöchökkül lap seni kemi. 24Ekis meinisin ia pachapachemi ra pwuutiw ie, ena fönü epwe fönüwemi. Kinikinin fönüwemi epwe keiiló seni ewe fönüpöön mi nóm öör tori Lebanon mi nóm efeng. Epwe pwal keiiló seni ewe chaanpwuupwu Eufreitis mi nóm öötiw tori ewe Mataw mi nóm lotow. 25Esap wor emön epwe tongeni üüngeni kemi, pün ewe SAMOL ämi we Kot epwe tiinaló nuokkus me rüükö repwe akkomw mwemi, ekis meinisin ia öüpwe feilló ie me lón unusen ewe fönü, usun i a pwon ngeni kemi.

26Nengeni, ikenäi ngang üwa ngeni kemi pwe öüpwe filätä lefiilen ew feiöch me ew önümamaw! 27Öüpwe feiöch are öüpwe älleasochisi ekkewe ällük än ewe SAMOL ämi we Kot ngang üwa ngeni kemi ikenäi. 28Öüpwe angei ew önümamaw are öüpwe opwut ekkewe öllük än ewe SAMOL ämi we Kot o kul seni an we aal ren ämi fel ngeni ekkóch koten ekis ämi öüsap sissiler me lóóm. 29“Iwe, lupwen ewe SAMOL ämi we Kot epwe emmwenikemiilong lón ewe fönü öüpwe le feilló lón pwe öüpwe fönüweni, öüpwe apasawu ew kapasen feiöch seni wón ewe chuuk Kerizim nge ew kapasen önümamaw seni wón ewe chuuk Ebal. 30(Ekkeei ruu chuuk ra nóm lotowun ewe chaanpwuupwu Jordan lón fönüwen ekkewe chón Kanaan iir mi nónnóm lón ewe leemólun Jordan arap ngeni ewe telinimw Kilkal. Ekkeei chuuk ra sooso ngeni lotow, nge resap toowaw seni ekkewe irä iter ook mi nóm lón Moreh.) 31Pün ämi öüpwe pwereló epeek ewe chaanpwuupwu Jordan pwe öüpwe le tolong lón ewe fönü ewe SAMOL ämi we Kot a ngeni kemi. Iwe, lupwen öüpwe nónnóm lón enan fönü, 32öüpwe fókkun tümwünüfichi pwe öüpwe älleasochisi ekkewe öllük me pwüüng meinisin ngang üwa isettiw mwemi ikenäi.

Ew leenien fel mi kefilitä

12 Ikkeei ekkewe öllük me pwüüng ämi öüpwe tümwünüfichi pwe öüpwe fókkun älleasochisir lón unusen ränin ämi manaw lón ewe fönü ewe SAMOL, än ämi kewe leewo we Kot a ngeni kemi pwe fönüwemi. 2Lupwen öüpwe ösüüweló chón ekkewe mwüü mi nónnóm ikenan, öüpwe fókkun ataeló ekkewe leeni meinisin ia ra fel ngeni ar kewe kot ie - wón ekkewe chukutekia me wón ekkewe chukutekisón pwal fän iteiten ekkewe irä mi mwuresires. 3Öüpwe ataetiw ar kewe róngen asór o ataatakisi ar kewe üür mi pin. Öüpwe kenaló ar kewe uluulun Asherah mi ffal seni mwüüch o pöküwetiw ar kewe uluulun önümwäl mi ffal. Öüpwe amóieló iten ar kewe kot seni ekkana leeni.

4Öüsap fel ngeni ewe SAMOL ämi we Kot lón ekkewe sókkun lapalap chón ekkeei ekkóch mwüü ra fel ngeni ar kewe kot. 5“Nge öüpwe kütta ewe SAMOL ämi we Kot me lón ewe leeni pwisin i epwe filätä seni leiin fönüwen ämi kewe einang meinisin, pwe epwe ina leenien itan. Öüpwe feilló ngeni ena leeni pwe öüpwe fel ngeni i. 6Iwe, öüpwe uweato ikenan ren ewe SAMOL ämi kewe asóren keek me ämi kewe sakkopaaten asór, pwal ämi na engol me ämi kewe asór ren minne öüwa tupwuni seni üwään minne öüwa fótuki, ämi kewe asór fäniten öüpwe öpwönüwetä ämi pwon, ämi kewe asór seni pwisin mochenin letipemi, pwal ämi kewe asór mweinöün nöün nöümi pwiin kowu me pwiin siip. 7Me ikenan, ämi me chón ämi kewe famili, öüpwe mwöngö me fän mesen ewe SAMOL ämi we Kot o öüpwe pwapwa ren meinisin minne öüwa föri, pwokiten ewe SAMOL ämi we Kot a efeiöchü kemi.

8Ikenäi ämi öüwa föri ese lifilifil meet öüwa mochen föri, nge esap iei usun nónnómwumi, 9lupwen öüpwe wareiti ewe leenien asöösö ewe SAMOL ämi we Kot a ngeni kemi. 10Mwittir chök öüpwe pwereló epeek ewe chaanpwuupwu Jordan o nónnóm lón ewe fönü ewe SAMOL ämi we Kot a ngeni kemi pwe fönüwemi. Iwe, lupwen i epwe fang ngeni kemi ämi asöösö seni än ekkewe chón opwuta kemi mi nóm ünükkümi eriäfföwü kemi pwe öüpwe nónnóm lón kinamwe, 11mwirin, öüpwe uweato ekkewe mettóch meinisin ngang üwa öllük ngeni kemi (ämi kewe asóren keek, ämi kewe sakkopaaten asór, ämi kewe na engol, ämi kewe asór ren minne öüwa tupwuni seni uwään minne öüwa fótuki, ämi kewe asór fäniten öüpwe öpwönüwetä ew pwon) ngeni ewe leeni ewe SAMOL ämi we Kot epwe pwisin filätä pwe ina leenien itan. 12Iwe, öüpwe efisi ämi apwaapwa me ikenan ämi me nöümi kewe mwän me nöümi kewe fefin, nöümi kewe chón angang mwän me chón angang fefin me fän mesen ewe SAMOL ämi we Kot. Iwe, öüpwe chechchemeni chón ewe einangen Levi mi nóm lón ämi kewe telinimw, pün esap wor inetiir fönü pwe wesewesen fönüwer. 13Öüpwe pwisin äfälli kemi pwe öüsap ääni ämi kewe asóren keek lón ese lifilifil menni leeni. 14Nge öüpwe chök ääni ämi asór lón ewe leeni ewe SAMOL a filätä me lón ew fönüwen ämi kewe einang. Me ikenan chök, öüpwe tongeni ääni ämi kewe asóren keek o föri ekkewe mettóch meinisin ngang üwa öllük ngeni kemi.

15Iteiten fansoun lupwen öüwa mochen ochooch fituk, öüwa tongeni nii ekkewe maan me lón ese lifilifil menni telinimw, usun chök minne öüwa föri iei ren ewe maan itan kazel me chia. Öüwa tongeni ochooch ekkewe maan ewe SAMOL ämi we Kot a fang ngeni kemi. Pwokiten ekkewe maan resap fäniten asór, iei minne ese lifilifil ika öüwa nóm lón tettelin chón limengaw ika tettelin chón limöch öüwa tongeni ochooch. 16Nge öüsap chök fókkun ünümi ewe chcha. Öüpwe niinätiw ewe chcha wón pwül usun kólik. 17Öüsap mwöngö ewe na engolun kiniiemi föün wiit, öüsap pwal ünümi ewe na engolun ünümemi wain mi fö ika ääni ewe na engolun ämi apüra me lón ämi kewe telinimw. Öüsap pwal ocheei ewe mweinöün nöün nöümi pwiin kowu ika pwiin siip. Öüsap ocheei fituken ämi kewe asóren pwon öüwa ääni pwon ika ämi kewe asór seni pwisin mochenin letipemi ika ämi kewe asór öüwa tupwuni seni angangen pöümi. 18Nge öüpwe chök mwöngö ekkeei asór me fän mesen ewe SAMOL ämi we Kot me lón ewe leeni i epwe filätä, ämi me nöümi kewe mwän me nöümi kewe fefin, nöümi kewe chón angang mwän me chón angang fefin, pwal ekkewe chón Levi mi nóm lón ämi kewe telinimw. Iwe, öüpwe pwapwa me fän mesen ewe SAMOL ämi we Kot ren meinisin minne öüwa föri. 19Nge öüpwe pwisin äfälli kemi pwe öüsap möllükaló ekkewe chón ewe einangen Levi lón üküükün langattamen ämi manaw lón fönüwemi.

20Lupwen ewe SAMOL ämi we Kot epwe äwätteló kiänin fönüwemi usun a fen pwon ngeni kemi, öüpwe tongeni ochooch fituk iteiten fansoun lupwen öüwa mochen. 21A tongeni fis pwe ewe leeni ia ewe SAMOL ämi we Kot epwe filätä pwe itan epwe nóm ie a koon toowaw seni leeniemi. Are ina usun, iwe, ämi öüwa tongeni nii emön maan seni leiin nöümi pwiin kowu ika nöümi pwiin siip ewe SAMOL a fang ngeni kemi. Iwe, öüwa tongeni ochooch ewe fituk üküükün ämi mochen me lón ämi kewe telinimw, usun chök minne ngang üwa öllük ngeni kemi. 22Öüpwe ochooch fituken ekkewe maan usun chök ämi ochooch fituken ekkewe chia me ekkewe maan usun chia iter kazel. Ese lifilifil ika emön mi nóm lón tettelin chón limengaw ika lón tettelin chón limöch epwe tongeni ochooch. 23Nge öüpwe chök fókkun föröchchüw pwe öüsap ünümi ewe chcha, pün ewe chcha iei ewe manaw. Iwe, öüsap tongeni eni ewe manaw fiti ewe fituk. 24Nge öüpwe niinätiw ewe chcha wón pwül usun kólik. 25Öüsap ünümi ewe chcha pwe öüpwe feiöch pwal nöümi kana me nöün nöümi kana repwe feiöch pwokiten öüpwe föri meet mi pwüng me fän mesen ewe SAMOL.

26Nge öüpwe angei ämi kewe liffang mi pin me ämi kewe asór öüwa fangaló pwe öüpwe öpwönüwetä ew pwon; iwe, öüpwe uweireló ngeni ewe leeni ewe SAMOL epwe filätä pwe epwe nónnóm ie. 27Iwe, öüpwe fókkun ääni asór fituken me chaan ämi kewe mönün asóren keek wón ewe róngen asór än ewe SAMOL ämi we Kot. Iwe chaan ämi kewe pwal ekkóch mönün asór epwe niinitiw ünükkün ewe róngen asór än ewe SAMOL ämi we Kot, nge öüwa tongeni ocheei ewe fituk. 28Öüpwe tümwünüfichi pwe öüpwe älleasochisi ekkeei öllük meinisin ngang üwa ngeni kemi pwe öüpwe feiöch tori feilfeilló chök, ämi me nöümi kana repwe upwutiw me mwirimi, pwokiten öüpwe föri meet mi mwirinnö me pwüng me fän mesen ewe SAMOL ämi we Kot.

Öüpwe äfälli kemi ren ekkewe kot mi mwääl

29Lupwen ewe SAMOL ämi we Kot epwe ösüüweló me mwemi chón ekkewe mwüü ämi öüpwe le angei seniir fönüwer, nge ämi öüpwe le fönüweni fönüwer o nónnóm lór, 30mwirin are ra rosoló me mwemi, öüpwe pwisin äfälli kemi pwe öüsap tupwuló o appirüw ar kewe föfför ren ämi öüpwe fel ngeni ar kewe kot. Öüsap eiis o apasa, “Ifa usun än chón ekkeei mwüü fel ngeni ar kewe kot, pün ngang üpwe appirüw ar föfför?” 31Öüsap fókkun föri ei sókkun ngeni ewe SAMOL ämi we Kot. Pün chón ekkeei mwüü ra föri chómmóng föfför mi enniopwut ewe SAMOL a opwut lón ar fel ngeni ar kewe kot. Pün ra mwo nge keni nöüür kewe äät me nöüür nengngin pwe ar asór ngeni ar kewe kot.

32Öüpwe tümwünüfichi pwe öüpwe älleasochisi ekkewe öllük meinisin ngang üwa ngeni kemi. Ämi öüsap apachätä och ngeniir, öüsap pwal äimwüni och seniir.

Liwinin tipisin chón tókkóló

13 Iwe, are mi wor emön soufós ika emön chón tana minne epwe fis epwe üütä me leiimi o i epwe esile ngeni kemi och esissil ika och manaman, 2nge a fis ewe esissil ika ewe manaman i a kapas usun, nge mwirin i epwe pwal apasa: “Öü feitto, öüsipwe fel ngeni pwal ekkewe koten ekis,” nge ämi öüsap sissilei ekkewe kot, 3öüsap öüseling ngeni än ewe soufós ika än ewe chón tan kapas. Pün ewe SAMOL ämi we Kot a sótuni kemi pwe epwe küna are öüwa echeni i ren unusen lelukemi me unusen ngünümi. 4Öüpwe tapweló mwirin ewe SAMOL ämi we Kot. Öüpwe meniniti i. Öüpwe älleasochisi an kewe öllük o öüseling ngeni mwelian. Öüpwe angang ngeni ewe SAMOL ämi we Kot o fitipacheiti i. 5Nge ekkewe soufós chofona ika ekkewe souttan mi sótuni ar repwe atókkakemiiló repwe ninniiló, pwokiten ra pesei kemi pwe öüpwe tipeförea le üüngeni ewe SAMOL ämi we Kot mi emmwenikemiiwu seni ewe fönü Egypt o angasa kemi seni ewe leeni ia ra nöüni kemi amanaw ie. Pwokiten ra sótuni ar repwe eppeti seni kemi ämi öüpwe tapweló mwirin ewe SAMOL ämi we Kot, öüpwe fókkun niireló pwe öüpwe atoowu ewe mi ngaw seni leiimi.

6Are pwiimw, nöün inom we, ika noum äät ika noum nengngin ika pwülüwom en ka tongei ika chiechiom mi öüchche me lón lelukom epwe otupwuk lemwónómwón o apasa, “Feitto, sipwe feilló fel ngeni pwal ekkóch kot,” ekkewe kot sap en ika óm kewe leewo öüwa sissileer, 7ekkóch leiin ekkewe kot än ekkewe aramas mi nónnóm ünükkum, ese lifilifil ika iir mi arapoto chök ika mi toowaw senuk, seni leesópwun ewe fönü tori pwal esóp, 8kosap tupwuló ren ika öüseling ngeni. Kosap chüngüw ewe aramas ren óm kopwe tongei, kosap ächchika kosap pwal tükümaló i. 9Nge kopwe chök fókkun niieló i. Pwisin en kopwe akkomw le mónei ngeni faaw pwe epwe mäló. Mwirin ekkewe aramas meinisin repwap pacholong le mónei ngeni faaw pwe epwe mäló. 10Kopwe mónei faaw ngeni i pwe epwe mäló, pwokiten i a sótuni an epwe paanukoló seni ewe SAMOL óm we Kot, ewe mi emmwenukowu seni ewe fönü Egypt o angasók seni ewe leeni ia ra nöünuk amanaw ie. 11Epwe iei usun pwe chón Israel meinisin repwe rong usun o nuokkus. Iwe, resap förisäfäli ei sókkun föfföringaw usun ei me leiimi.

12Are öüwa rongorong än emön epwe apasa me lón ew ämi kewe telinimw ewe SAMOL ämi we Kot epwe ngeni kemi pwe öüpwe imweim lón, 13pwe a wor aramasingaw seni leiimi ra fätälfeil o ra otupwaaló chón ar we telinimw ren ar apasa, “Öüsipwe feilló o fel ngeni pwal ekkóch kot,” ekkóch sókkun kot ämi öüsap sissiler me mwan, 14mwirin, öüpwe etittina fichi o achoocho le eiis tichchik usun ei poraus. Nge are ei poraus a wesewesen let o öüwa tongeni älelleta pwe ei sókkun föfför mi enniopwut a fis leiimi, 15öüpwe fókkun maun ngeni ewe telinimw o niieló aramasen lón meinisin pwal tori ekkewe maan meinisin. 16Mwirin, öüpwe ionifengeni pisekin lón meinisin mi taaló lukalapen alen ewe telinimw. Iwe, öüpwe kenaló unusen ewe telinimw me pisekin lón meinisin mi taaló pwe epwe ew asóren keek mi unus ngeni ewe SAMOL ämi we Kot. Ena telinimw epwe wiliti ew ioien mettóch mi chukuchukutä tori feilfeilló chök, o esap fókkun köüüsäfäl. 17Öüsap anómwu ngeni kemi och me leiin ekkewe mettóch mi käimwüló fäniten ar repwe kataaló. Mwirin, ewe SAMOL epwe kul seni lingeringerin an soong o epwe ümöümöch ngeni kemi. Epwe pwal tongei kemi o föri pwe öüpwe ew mwüü mi lapalaap, usun a fen pwon ngeni ämi kewe leewo. 18Ewe SAMOL ämi we Kot epwe chök ümöümöch ngeni kemi are öüpwe älleasochisi i o tümwünü ekkewe öllük meinisin ngang üwa ngeni kemi ikenäi. Öüpwe fókkun föri meet ewe SAMOL ämi we Kot a apasa pwe mi pwüng.

Letipeta esap pwüng

14Pwokiten ämi nöün ewe SAMOL ämi we Kot aramas, iei minne öüsap lekelekeei inisimi, öüsap pwal reiipööpöló meeten möküren asen eten mesemi lupwen öüwa letipeta ren emön mi mäló. 2Pün ämi ew mwiichen aramas mi pin meren ewe SAMOL ämi we Kot. Ewe SAMOL a filikemi pwe öüpwe ew mwiichen aramas fänitan. Öüpwe ew mwiichen aramas mi sókkóló öüchcheami seni ekkewe mwiichen aramas meinisin mi nóm wón fönüfan.

Fituk mi nóm lón tettelin limöch me tettelin limengaw

3Öüsap fókkun ochooch ekkana maan mi nóm lón tettelin limengaw. 4Ikkeiir ekkewe maan ämi öüwa tongeni ochooch: kowu, siip, kuuch, 5chia, ewe maan usun chia itan kazel, ewe sókkun chia itan robuk, kuuch mi mwacho, kuuch mi nóm wón chuuk, ewe maan itan antelop me siip mi nóm wón chuuk. 6Iwe, öüwa tongeni ochooch iteiten ekkewe maan mi kinikin fesen kkün pachapacheer lón ruu kinikin, nge ra pwal lüülüwsäfäli eneer. 7Nge öüsap ochooch kamel, üsangi, me ewe sókkun maan mi nóm wón achaw itan hiraks. Pün ekkeei maan ra lüülüw säfäli eneer nge esap kinikin fesen kkün pachapacher. Iwe, repwe nóm lón tettelin mi limengaw ngeni kemi. 8Iwe pwal piik epwe nóm lón tettelin mi limengaw ngeni kemi pün inamwo ika a kinikin fesen kkün pachapachan nge esap lüülüw säfäli anan. Öüsap ochooch fituker ika attapa inisin ekkewe mi mäló.

9Iwe, ikkeiir meinisin ekkewe mi nóm lón kólik ika leset ämi öüwa tongeni mwöngö: Öüwa tongeni mwöngö ese lifilifil meet mi wor iliilir me töröüner. 10Nge öüsap mwöngö ekkewe maanün leeset esap wor iliilir ika töröüner. Ra nóm lón tettelin mi limengaw ngeni kemi.

11Öüwa tongeni ochooch ekkewe maansüüsü meinisin mi nóm lón tettelin limöch. 12Nge ikkeiir ekkewe maansüüsü öüsap tongeni ochooch: Ikel, ekkewe machchang mi okkochooch fituk ra iteni vulchur me osprei, 13ewe machchang itan buzzard me sakkopaaten ewe machchang itan kait, 14meinisin sókkun ewe machchang itan reifen, 15ostrich, füküro mi mwoch selingan, lipöüännei, sakkopaaten kawakaw, 16füküro mi kükkün, füküro mi wätte, füküro mi pwech, 17ewe sókkun machchang itan pelikan, ewe sókkun machchang mi ochooch mettóch mi mä, me liwanök, 18örööpwech me sakkopaaten örööchól, ewe machchang itan hupo me pöüte.

19Pwal iteiten pwiin kükkün maan meinisin mi äkkääs repwe nóm lón tettelin mi limengaw ngeni kemi. Resap fich ngeni ämi öüpwe ocheer. 20Nge öüwa tongeni ochooch ekkewe kükkün maan mi wor pöükässiir ra nóm lón tettelin limöch.

21Öüsap ochooch och mettóch mi pwisin mäló. Öüwa tongeni ngeni emön chón ekis mi nónnóm leiimi lón ämi kewe telinimw pwe i epwe ocheei. Ika, öüwa pwal tongeni amöömö ngeni emön chón ekis.

Pün ämi ew mwiichen aramas mi pin fäniten ewe SAMOL ämi we Kot. Öüsap küküüw emön appanen kuuch lón chönün oupwun inelapan we.

Lóngólóngun na engol

22Öüpwe fókkun äimwüeló ew na engol seni meinisin üwään minne öüwa fótuki lón ämi kewe atake iteiten ier. 23Öüpwe uweato ei na engol ngeni ewe leeni ewe SAMOL ämi we Kot epwe pwisin filätä fäniten leenien itan o öüpwe eni ei na engol me fän mesan. Ei a weneiti ämi kewe na engol seni föün wiit, seni wain mi fö, seni apüran föün olif pwal seni ätemwänin mweinöün nöümi pwiin kowu me pwiin siip. Popun ei na engol pwe epwe äiti ngeni kemi ämi öüpwe meniniti ewe SAMOL ämi we Kot iteiten fansoun. 24Iwe, lupwen ewe SAMOL ämi we Kot epwe efeiöchü kemi, nge ewe leeni i a filätä pwe itan epwe nóm ie a koon towaw seni kemi o ämi sääi epwe langattam ngeni kemi ina pwata öüsap tongeni uweeló ewe na engol ikenan, 25mwirin, öüwa tongeni amöömöló ewe na engolün uwään fótäämi irä me ewe na engolun nöümi pwiin maan o angei ewe mooni pwe öüpwe uwealó ngeni ewe leeni ewe SAMOL ämi we Kot a filätä. 26Lupwen öüpwe tori ewe leeni, öüpwe nöünöü ewe mwooni le kamö ese lifilifil meet öüwa mochen. Öüwa tongeni nöünöü le mööni emön ätemwänin kowu ika emön siip, ekkóch wain ika och sókkun minen wün mi wewe ngeni. Mwirin, öüpwe mwöngö me ikenan fän mesen ewe SAMOL ämi we Kot o pwapwa, ämi fiti chón leimwemi. 27Nge öüsap möllükaló ekkewe chón Levi mi nóm lón ämi kewe telinimw, pün esap wor wiiser, esap pwal wor inetiir usumi.

28Ömwüchchülón iteiten öülüngätin ier, öüpwe uweato ämi kewe na engol meinisin seni üwään fótäämi irä lón ena chök ier o iseniir lón ewe telinimw mi koon arap ngeni kemi. 29Iwe, öüpwe ngeni ekkewe chón Levi ei mwöngö pwokiten esap wor inetir fönü me leiimi. Öüpwe pwal ngeni ekkewe waasöla me ekkewe mi määsen me fefin mi määseniir pwülüwer mi nóm lón ämi kewe telinimw. Ei na engol epwe awora mwöngö fäniter pwe repwe tongeni feitto o mwöngö üküükün ar mochen. Are öüpwe föri ei, ewe SAMOL ämi we Kot epwe efeiöchü kemi lón mettóch meinisin ämi öüpwe föri.

Liwinimmang repwe kómwusóló iteiten fisu ier

15 Lesópwólón iteiten efisuen ier, öüpwe fókkun omwusaló ekkewe liwinimmang. 2Iwe, epwe iei usun lapalapen ämi öüpwe föri ei komwusólón liwinimmang: Iteiten chón mwüütätä liwinimmang mi mwüüt ngeni pwal emön chón Israel pwe epwe liwinimmang och mettóch seni, epwe omwusaló ewe liwinimmang. Esap echchimwa chón órun we ika pwiin we chón Israel pwe epwe omwusätiw ewe liwinimmang pwokiten ewe SAMOL a apasa pwe liwinimmang repwe komwusoló lón ena ier. 3Ei komwusolón liwinimmang a chök weneiti pwiimi kewe chón Israel, nge esap pwal ngeni ekkewe chón ekis mi nónnóm leiimi. 4Nge enletin pwe itä esap wor emön chón wöwingaw me leiimi, pün ewe SAMOL ämi we Kot epwe fókkun efeiöchü kemi me lón ewe fönü i epwe ngeni kemi pwe fönüwemi. 5Öüpwe angei ei feiöch are öüpwe tümwünüfichi le älleasochisi ekkewe öllük än ewe SAMOL ämi we Kot, ngang üwa ngeni kemi ikenäi. 6Pün ewe SAMOL ämi we Kot epwe efeiöchü kemi usun i a pwon ngeni kemi. Chómmóng mwüü repwe liwinimmang ngeni kemi, nge ämi öüsap liwinimmang seniir. Ämi öüpwe nemenem wón chómmóng mwüü, nge iir resap nemenem wómi.

Kisäsew ngeni chón wöwingaw

7Nge are a wor emön me leiin pwiimi kewe a wöwingaw me lón ämi kewe telinimw me lón ewe fönü ewe SAMOL ämi we Kot epwe ngeni kemi, öüsap öpöchökkülaló lelukemi ika kumwuchueló pöümi ngeni pwiimi we mi wöwingaw. 8Nge öüpwe suukaló pöümi ngeni o fangafangöch le mwüüt ngeni minne mi naaf fäniten an osupwang, ese lifilifil ika met an osupwang. 9Öüpwe äfälli kemi pwe ete wor och ekiekingaw lón letipemi o öüwa apasa, “Ewe ierin komwusolón liwinimmang a arap.” Iwe, öüwa kichingaw ngeni pwiimi we mi wöwingaw o öüsap mochen mwüüt ngeni pwe epwe liwinimmang och seni kemi. Iwe, i epwe siö ngeni ewe SAMOL, nge ämi öüpwe tipis ren. 10Öüpwe fókkun kisäsew nge letipemi esap chou lupwen öüpwe fang och. Iwe, ewe SAMOL ämi we Kot epwe efeiöchü kemi lón ämi angang meinisin me lón meinisin minne öüpwe föri. 11Iteiten fansoun meinisin, epwe chök wor ekkóch me leiimi mi wöwingaw. Iei popun ngang üwa öllük ngeni kemi pwe öüpwe kisäsew le fangaló minne a wor reemi ngeni ekkana mi wöwingaw pwal ngeni ekkóch chón Israel mi osupwang.

Ewe öllük fänäsengesin ekkewe amanaw

12Are emön märäärimi re Hipru ika fin Hipru epwe pwisin amöömöló i ngeni kemi, epwe angang ngeni kemi lón üküükün wonu ier. Mwirin, lón ewe efisuuwen ier öüpwe mwüüt ngeni an epwe feilló seni kemi pwe epwe le ngasaló. 13Nge lupwen öüpwe tiinaló ewe amanaw pwe epwe ngasaló, öüsap mwüüt ngeni an epwe feilló fän an ösöülapö. 14Öüpwe fangafangöch le fang ngeni i och liffangen an epwe le feilló. Öüpwe fang ngeni i och seni nöümi pwiin siip me ämi leenien wichiwich pilükün wiit me ämi leenien unguung föün irän wain. Öüpwe fang ngeni i och seni somwosomwolón minne ewe SAMOL a efeiöchü ngeni kemi. 15Öüpwe chechchemeni pwe ämi öüwa piin amanaw me lón ewe fönü Egypt, nge ewe SAMOL ämi we Kot a angasakemi. Iei popun ngang üwa ngeni kemi ei öllük.

16Nge are epwe fis pwe ewe amanaw epwe apasa ngeni kemi, “Ngang üsap feilló seni kemi,” pwokiten i a tongei kemi me chón ämi famili pün i a nónnómöch meremi, 17lón ei lapalap, öüpwe angei och ööite o äppwera ngeni emin selingan tori ewe asam. Mwirin ei, i epwe nöümi chón angang feilfeilló chök. Öüpwe pwal föri usun chök ei lapalap ngeni nöümi chón angang fefin.

18Öüsap ekieki pwe och mettóch mi weires lupwen öüpwe tiinaló nöümi chón angang seni kemi pwe repwe ngasaló. Öüpwe chechchemeni pwe iir ra angang ngeni kemi lón üküükün ekkewe wonu ier ren esópwun chök meet öüpwe tongeni püngüntiw ren liwinin emön chón angang mi kamö. Iwe, ewe SAMOL ämi we Kot epwe efeiöchü kemi lón meinisin minne öüwa föri.

Ewe öllük fäniten ewe mweinöün nöün maan

19Öüpwe äimwüeló fäniten ewe SAMOL ämi we Kot meinisin ekkewe ätemwänin mweinöün nöün maan seni nöümi pwiin kowu me pwiin siip. Öüsap nöünöü ekkewe ätemwänin mweinöün nöümi kowu pwe repwe angang lón ämi kewe tännipi, öüsap pwal fichieló ünöünen mweinöün nöümi kewe pwiin siip. 20Nge ämi me chón ämi kewe famili öüpwe ocheei ekkewe mweinöün nöümi kewe maan me fän mesen ewe SAMOL ämi we Kot iteiten ier me lón ewe leeni i epwe filätä. 21Nge are epwe wor och terin ewe mweinöün maan, are epwe mwök ika chuun ika epwe wor och sókkun mettóch mi ngaw epwe fis ngeni; iwe, öüsap fókkun ääni asór ngeni ewe SAMOL ämi we Kot. 22Nge öüpwe tongeni angei ewe maan mi wor terin pwe ochäämi lón ämi kewe famili me lón imwemi kewe. Ekkewe mi nóm lón tettelin chón limengaw me tettelin chón limöch repwe tongeni ochooch seni, epwe usun chök ämi ochooch chia ika ewe sókkun maan usun chia itan kazel. 23Nge öüsap chök ünümi chaan ewe maan. Öüpwe fókkun niinätiw ewe chcha wón pwül usun kólik.

Porausen ewe Pasofer a enliwinsäfäl

16Öüpwe chechchemeni pwe lón ewe maram Abib, iei ewe äewin maram, öüpwe efisi ächechchemen ewe Pasofer fäniten ewe SAMOL ämi we Kot, pün lón ewe maram Abib ewe SAMOL ämi we Kot a emmwenikemiiwu seni Egypt lepwin. 2Iwe, öüpwe ääni asór ewe mönün asóren Pasofer seni nöümi pwiin siip me nöümi pwiin kowu. Öüpwe fókkun ääni ei asór ngeni ewe SAMOL ämi we Kot me lón ewe leeni i epwe filätä pwe itan epwe nóm ie. 3Öüpwe ochooch ei mönün Pasofer fiti pilawa ese wor iis lón. Lón üküükün fisu rän öüpwe chök mwöngö pilawa ese wor iis lón usun öüwa föri lupwen öüwa toowu seni Egypt lón ämi atapwanapwan. Öüpwe mwöngö ei pilawa, iei ewe pilawa a iteni pilawan riäfföü, pün lón üküükün langattamen manawemi öüpwe chechchemeni ewe rän öüwa toowu seni Egypt. 4Esap fókkun wor och pilawa mi nofit ngeni iis epwe pwä me leiimi me lón leeniemi meinisin lón üküükün fisu rän. Esap pwal wor och fituk ämi öüpwe ääni asór lekkuniólupwinin ewe äewin rän epwe nómwóló lón ewe pwinin tori lesossor.

5Öüsap tongeni asór ewe mönün Pasofer me lón ew me leiin ämi kewe telinimw ewe SAMOL ämi we Kot epwe ngeni kemi. 6Nge öüpwe chök ääni asór ewe mönün Pasofer lón ewe leeni ia ewe SAMOL ämi we Kot epwe filätä pwe itan epwe nóm ie. Me ikenan öüpwe ääni asór ewe mönün Pasofer lekkuniólupwin lupwen ewe akkar a tupwutiw pün ina ewe fansoun ämi öüwa toowu seni Egypt. 7Iwe, öüpwe apwichi ewe laam mönün Pasofer o öüpwe ocheei me lón ewe leeni ewe SAMOL ämi we Kot epwe filätä. Mwirin, öüpwe liwinsäfäliló ngeni imwemi kewe imw mangaku lón ewe sossoran. 8Lón ekkewe wonu rän öüpwe mwöngö pilawa ese wor iis lón. Nge lón ewe efisuen rän ekkewe aramas repwe mwiichfengen fän mesen ewe SAMOL ämi we Kot. Öüsap föri och angang lón ei rän.

Enliwinisäfäli porausen ewe Chuulapen Wiik

9Öüpwe älleani fisu wiik seni poputän ewe fansoun öüwa kinii uwään ämi kewe irän wiit. 10Mwirin, öüpwe föri apwaapwan ewe Chuulapen Wiik, iei ewe Chuulapen Kinikin Uwa, fäniten ewe SAMOL ämi we Kot. Öüpwe uwato ren ewe SAMOL ew asór seni pwisin mochenin letipemi öüküük ngeni ekkewe feiöch öüwa angei. 11Epwe iei ew fansoun apwaapwa me fän mesen ewe SAMOL ämi we Kot me lón ewe leeni i epwe filätä pwe itan epwe nóm ie. Öüpwe efisi ämi apwaapwa fiti unusen chón ämi famili me nöümi kewe chón angang mwän me chón angang fefin, ekkewe chón Levi seni ämi kewe telinimw, pwal ekkewe chón ekis me ekkewe mi määsen me ekkewe fefin mi määseniir pwülüwer mi nónnóm leiimi. 12Öüpwe chechchemeni pwe ra piin nöüni kemi amanaw me lón Egypt. Iei minne, öüpwe tümwünüfichi pwe öüpwe älleasochisi ekkeei öllük.

Enliwinisäfäli porausen ewe Chuulapen Imw Mangaku

13Öüpwe föri ächechchemen ewe Chuulapen Imw Mangaku lón üküükün fisu rän lesópwólón ewe fansoun kinikin uwa mwirin ämi öüwa ionalong föün wiit seni ewe leenien wichiwich umwun wiit me wain seni ewe leenien unguung föün irän wain. 14Ei chuulap epwe ew fansoun pwapwa, ämi me nöümi mwän me nöümi fefin, fiti nöümi kewe chón angang mwän me chón angang fefin, fiti ekkewe chón Levi me ekkewe chón ekis me ekkewe mi määsen me ekkewe fefin mi määseniir pwülüwer mi nóm lón ämi kewe telinimw. 15Lón üküükün fisu rän öüpwe efisi apwaapwan ei chuulap fäniten ewe SAMOL ämi we Kot me lón ewe leeni i epwe filätä, pün ewe SAMOL ämi we Kot i ewe mi fang ngeni kemi chómmóng uwään fótäämi o efeiöchüw ämi angang meinisin. Ina minne, ei chuulap epwe ew fansoun pwapwa mi lapalaap fänitemi meinisin.

16Iteiten ier, emön me emön mwän lón Israel epwe efisi ächechchemen ekkeei ülüngät fansoun chuulap: Ewe Chuulapen Pilawa ese wor iis lón, ewe Chuulapen Fansoun Kinikin Uwa me ewe Chuulapen Imw Mangaku. Repwe ämweto fän mesen ewe SAMOL lón ewe leeni i epwe filätä lón ew me ew keei fansoun. Iwe, repwe fókkun uweato ew liffang ngeni ewe SAMOL. 17Iteiten emön me emön mwän epwe fang öüküük ngeni an tüfich, alóngólóng wón ekkewe feiöch ewe SAMOL ämi we Kot a fang ngeniir.

Ääni köpwüng fän wenechchar

18Öüpwe filätä ekkewe souköpwüng me ekkewe nöüwiis fäniten ew me ew ämi kewe einang me lón ämi kewe telinimw meinisin ewe SAMOL ämi we Kot epwe ngeni kemi. Iir repwe öpwüngü ekkewe aramas fän pwüngün köpwüng mi wenechchar leemelen ewe fönü. 19Öüsap fókkun sorei minne mi wenechchar ika lifilifil aramas. Öüsap pwal angei liffangen emichimich, pün liffangen emichimich a ochunna mesen ekkewe mi miriit o efitteki minne ekkewe chón pwüng ra filätä. 20Öüpwe fókkun mwüüt ngeni pwüngün köpwüng mi wenechchar an epwe wiil pwe öüpwe manaw o fönüweni ewe fönü ewe SAMOL ämi we Kot a ngeni kemi.

21Öüsap fókkun öüüwetä och uluulun ewe önü Asherah mi ffal seni mwüüch ünükkün ewe róngen asór fäniten ewe SAMOL ämi we Kot. 22Öüsap öüüwetä ekkewe üür mi pin fäniten ämi öüpwe fel ngeniir, pün ewe SAMOL ämi we Kot a opwut iir.

17Öüsap ääni asór ngeni ewe SAMOL ämi we Kot emön ätemwänin kowu ika emön siip mi wor och terin ika wor likilikingawan, pün i a opwut ena sókkun liffang.

2Are epwe pwä me leiimi emön mwän ika emön fefin me lón ew leiin ämi kewe telinimw ewe SAMOL ämi we Kot epwe ngeni kemi, pwe i a föri minne a ngaw me fän mesen ewe SAMOL ämi we Kot ren an pwurätiw an we pwon, 3ren an angang ngeni pwal ekkóch kot ika ren an fel ngeniir, ese lifilifil ika a fel ngeni ewe akkar ika maram ika och me leiin ekkewe masowen fän läng ngang üsap mwüütätä, 4lupwen öüpwe rongorong usun ei, mwirin, öüpwe tichchik le kütta porausan. Iwe, are mi wesewesen let me ächiööü pwe ei sókkun föfför mi enniopwut a fis me lón Israel, 5mwirin, öüpwe emmwenawu ewe mwän ika fefin mi föri ewe mettóch mi ngaw ren asamalapen ämi telinimw. Iwe, öüpwe mónei ngeni faaw ewe aramas tori epwe mäló. 6Nge emön aramas esap ninniiló ren än emön chök chón pwärätä kapasen pwärätä. Iteiten fansoun, epwe chök wor esap kis seni rüömöm ika ülümön chón pwärätä. 7Pöün ekkewe chón pwärätä repwe akkomw le mónei faaw ngeni ewe aramas, mwirin, pöün ekkewe aramas meinisin repwap pwal pacholong le mónei ewe aramas tori epwe mäló. Epwe iei usun ämi öüpwe limetawu mi ngaw meinisin seni leiimi.

8Are epwe fis och mettóch a koon weires ngeni kemi ämi öüpwe filätä pwüngün, äwewe chök, are emön a tipisin niimanaw ika a chök niieló emön aramas nge esap akkomwen ekieki, are pwal ew köpwüng mi weires, are pwal ew köpwüng mi pacholong sakkopaaten föfförün efeiengawa aramas me lón ämi kewe telinimw; mwirin, öüpwe uwaló ekkeei köpwüng ngeni ewe leeni ewe SAMOL ämi we Kot epwe filätä, 9ia ekkewe souasór iir chón ewe einangen Levi me ewe souköpwüng repwe föri ar angang ie. Iwe, iir repwe rongorong ngeni ewe osukosuk o repwe wiisen filätä ngeni kemi meet öüpwe föri. 10Iwe, öüpwe föri pwüngün minne iir repwe öpwüngaló ngeni kemi me lón ewe leeni ewe SAMOL epwe filätä. Iwe öüpwe tümwünüöchü pwe öüsap föri och me lükün minne repwe osomänei ngeni kemi. 11Mwirin ar repwe äwewei ewe öllük o ra tori ar repwe le atoowu pwüngün ewe föfför, öüpwe fókkun etiwa ewe pwüngün köpwüng iir ra öpwüngaló. Öüsap ekkesiwili och lón ew sókkun lapalap. 12Emön aramas mi ouucho an epwe opwut ewe pwüngün köpwüng ewe souköpwüng ika ewe souasór mi tupwuni ewe SAMOL ämi we Kot epwe atoowu, ena aramas epwe ninniiló. Epwe ina usun ämi öüpwe limetawu ei sókkun mi ngaw seni Israel. 13Mwirin, aramas meinisin repwe rongorong usun o repwe nuokkus. Iwe, resap pwal chüen ouuchosäfäl le pwisin föri meet ra mochen.

Ekkóch lóngólóng fäniten king

14Lupwen öüpwe tori ewe fönü ewe SAMOL ämi we Kot epwe ngeni kemi, öüpwe liäpeni o relefönüweló lón. Mwirin, ina öüpwe poputä le ekiek o apasa, “Sipwe ääni emön king, usun chón ekewe mwüü meinisin mi nóm ünükküch.” 15Are epwe fis ei, öüpwe älletafichi pwe öüpwe chök efili pwe epwe king ewe mwän ewe SAMOL ämi we Kot epwe filätä. Öüpwe filätä emön seni leiin chiechiemi kana chón Israel pwe epwe king, nge öüsap filätä emön chón ekis pwe epwe nemeni kemi. 16Ewe king esap öüüwetä ew wätten imwen óris pwisin fänitan, esap pwal tiinaló nöün aramas ngeni Egypt pwe repwe kamö óris me ikenan, pün ewe SAMOL a fen apasa ngeni kemi, “Öüsap fókkun chüen liwinsäfäl ngeni Egypt.” 17Ewe king esap pwal angei chómmóng pwülüwan, pün ina repwe atókkaló i seni ewe SAMOL. Ewe king esap pwal achómmóngaló silifer me kolt pwisin fänitan.

18Iwe, lupwen ewe king epwe móótäsini ewe leenien móótun king lón mwüün, epwe appirüw le makkeelong lón ew pwuk ekkeei öllük pwisin fänitan, nge epwe appirüw seni ewe pwuk mi nóm fän mesen ekkewe souasór iir chón ewe einangen Levi. 19Iwe, ewe king epwe anómwu ren ei pwuk iteiten fansoun meinisin o i epwe älleani ei pwuk iteiten rän lón ränin manawan meinisin. Ren ei, i epwe käeö usun an epwe meniniti ewe SAMOL än we Kot ren an epwe tümwünüfichi le älleasochisi meinisin kapasen ei öllük me ekkeei pwüüng. 20Popun an epwe älleani ei pwuk, pün epwe eppeti seni letipan an epwe lamalamtekia o ekieki pwe i a tekia seni chiechian kana aramas. Epwe pwal eppeti seni an epwe tókkóló seni ekkeei öllük lón och sókkun lapalap mi fókkun kükkün. Ei epwe önüküchchara pwe i me mwirimwirin kana repwe nemenem wón chómmóng tettelin pilóón aramas me lón Israel.

Inetin ekkewe souasór me chón ewe einangen Levi

18 Öüpwe chechchemeni pwe ekkewe souasór, iir chón ewe einangen Levi me ekkewe lussun chón ewe einangen Levi, resap angei och inetir fönü usun ekkewe pwal ekkóch einangen Israel. Nge ekkewe souasór me ekkewe chón Levi repwe mwöngö seni ekkewe asór mi keek wón ekkei aramas repwe ngeni ewe SAMOL pün ina inetiir. 2Iei minne, esap wor pwisin inetir fönü me leiin ekkewe chón Israel. Pwisin ewe SAMOL ina i inetir, usun i a fen pwon ngeniir.

3Iwe, ikkeei ekkewe kinikin ekkewe souasór repwe tongeni angei pwe wiiser seni emön ätemwänin kowu ika siip ekkewe aramas repwe uweireto pwe ar asór: Ewe fituken wón afaran me fituken sapan kewe me rüöpeek pwal ewe chükükanan. 4Öüpwe pwal ngeni ekkewe souasór ekkewe mwen üwään fótäämi wiit, mwen ünümemi wain mi fö me mwen ämi apüra seni föün olif, pwal ewe akkomwen ünöünen nöümi siip öüpwe fichii. 5Pün ewe SAMOL ämi we Kot a filätä chón ewe einangen Levi seni leiin ämi kewe einang meinisin pwe repwe angang lón iten ewe SAMOL feilfeilló chök.

6Iwe, emön chón ewe einangen Levi mi nónnóm lón ese lifilifil menni telinimw ekis meinisin lón Israel a tongeni feitto seni ia a nónnóm ie o feilló ngeni ewe leeni ewe SAMOL epwe filätä. 7A tongeni angang ikenan lón iten ewe SAMOL an we Kot usun chök meinisin chiechian kewe chón ewe einangen Levi mi angang ngeni ewe SAMOL ikenan. 8Ena chón Levi epwe wor inetin mwöngö seni ekkewe asór me mönün asór epwe löllö fengen me inetin chienan kewe ekkóch chón Levi, inamwo are epwe wor mooni a angei seni liwinin an amöömöló pisekin an famili.

Toowaw seni öörüni mi ngaw

9Lupwen öüpwe tolong lón ewe fönü ewe SAMOL ämi we Kot epwe ngeni kemi, öüpwe tümwünüfichi pwe öüsap appirüw ekkewe föfför mi enniopwut öörünien chón ekkewe mwüü mi nónnóm ikenan. 10Esap fókkun wor emön me leiimi epwe keni nöün äät ika nöün nengngin pwe an asór ngeni emön önümwäl. Esap pwal wor emön epwe föri angangen roong ika angangen pwee. Esap wor emön leiimi epwe emön souwo ika emön souppöüt, 11ika emön souföörüwör ika emön wäänanü, ika emön souönü ika emön souawarawara ngünün mi mä. 12Pün emön mi föri ekkeei mettóch epwe och minen enniopwut meren ewe SAMOL. Iei popun ewe SAMOL ämi we Kot a ösüüweló chón ekkewe ekkóch mwüü me mwemi pwokiten ra föri ekkeei föfför mi enniopwut. 13Ämi öüpwe fókkun unusöch lón manawemi me fän mesen ewe SAMOL ämi we Kot.

14Pün ekkewe aramas ämi öüpwe ösüüreló seni fönüwer ra angei öüröürer seni ekkana soukasissil me ekkana soupwe. Nge ämi, ewe SAMOL ämi we Kot esap mwüüt ngeni kemi pwe öüpwe föri ekkeei sókkun mettóch.

Emön soufós mi fö usun Moses

15Ewe SAMOL ämi we Kot epwe öüütäi fänitemi emön soufós usun ngang me leiimi, seni leiin chiechiemi kana chón Israel. Ämi öüpwe öüselinga ena soufós. 16Pün iei meet pwisin ämi öüwa tungór ngeni ewe SAMOL ämi we Kot lupwen öüwa mwiichfengen meren ewe chuuk Horeb. Ämi öüwa tungór pwe öüsap mochen öüselingsäfäl mwelien ewe SAMOL ämi we Kot, öüsap pwal mochen künasäfäli ewe ekkei mi ngetenget pün öüwa nuokkus ämi öüpwe mäló.

17Mwirin, ewe SAMOL a apasa ngeniei, “Ngang üpwe föri usun meet ra tungór. 18Ngang üpwe öüütäi fäniter emön soufós usum seni leiin chiechier kewe chón Israel. Iwe, ngang üpwe üreni ena soufós meet i epwe apasa, nge i epwe üreni ekkewe aramas ekkewe mettóch meinisin ngang ü öllük ngeni i. 19Iwe, pwisin ngang wón inisi üpwe öpwüngü iö esap öüseling ngeni ekkewe poraus ewe soufós epwe aronga fänitei. 20Nge emön soufós mi apasa pwe i a aronga ew poraus seni pwal emön kot ika chofonatä pwe i a kapas fänitei, ena soufós epwe ninniiló.”

21Iwe, ina öüpwe ekieki lón lelukemi, “Epwe ifa usun äm aipwe silei ika ewe kapasen oosuni a feitto seni ewe SAMOL ika esap?” 22Are emön soufós a oosuni usun och mettóch lón iten ewe SAMOL nge minne a kapas usun esap fis ika esap pwönüwetä; iwe, ewe SAMOL esap apasa ei poraus. Ena soufós a kapas fän pwisin mochenin letipan. Öüsap nuokkusiti i.

Ekkewe ülüngät telinimwen op seni feiengaw

19 Ewe SAMOL ämi we Kot epwe mwittir arosaló chón ekkewe mwüü minne fönüwer ewe, ewe SAMOL ämi we Kot epwe ngeni kemi, nge ämi öüpwe angei seniir fönüwer o imweimw lón ar kewe telinimw me imweer kewe. 2Mwirin, ämi öüpwe äimwüeló ülüngät telinimw fänitemi repwe nóm lukalapen fönüwemi we ewe SAMOL ämi we Kot epwe ngeni kemi pwe öüpwe fönüweni. 3Öüpwe ineti ewe fönü ewe SAMOL ämi we Kot epwe ngeni kemi pwe fönüwemi lón ülüngät kinikin. Nge ew me ew ekkeei telinimw epwe nóm lón ew me ew kewe ülüngät kinikin. Iwe, öüpwe amollätä ekkóch aal fänitemi repwe löllöppök toowawer seni ekkewe telinimw, pwe emön mi niieló emön aramas epwe tongeni süüló o op ikenan.

4Are emön aramas a chök eniiseren niieló emön chón órun nge esap opwut i me mwan, ewe chón niieló aramas epwe tongeni süü ngeni ew me leiin ekkeei telinimw, iwe epwe manaw. 5Äwewe chök, ika emön mwän a fiti chón órun le feilló leiin pötöwöl pwe repwe pöküpök irä; iwe, emön leiir a pöküpök wón nöün we kouk nge mächään ewe kouk we a ässiwu seni ewe pachan o niieló ewe pwal emön mwän. Lón ei lapalap, ätewe mi niieló ewe pwal emön aramas epwe tongeni süü ngeni ew me leiin ekkeei telinimw pwe epwe manaw. 6Are ewe telinimw epwe koon toowaw; iwe, ewe chón älemöü chcha epwe tongeni tapweri ewe mi niieló aramas fän pwichipwichin an soong o epwe liäpeni i pwokiten ewe aal a langattam. Iwe, ewe mi niieló ewe aramas epwe mäló, inamwo ika esap mwo katoowu pwüngün an köpwüng pwe epwe mäló pwal minne a fis a chök och eniiser. 7Iei popun, ngang üwa öllük ngeni kemi pwe öüpwe äimwüeló ülüngät telinimwen op seni feiengaw fänitemi.

8Iwe, are ewe SAMOL ämi we Kot epwe äwätteló kinikinin fönüwemi, usun a fen pwon fän ökköpöl ngeni ämi kewe leewo, o epwe ngeni kemi unusen ewe fönü i a pwon ngeniir, 9iwe, öüpwe äimwüeló pwal ülüngät telinimwen op. (I epwe ngeni kemi ei fönü are öüpwe älleasochisi ekkewe öllük meinisin ngang üwa ngeni kemi ikenäi, are öüpwe echeni ewe SAMOL ämi we Kot o fätäl lón an kewe aal iteiten fansoun meinsin.) 10Ren ei lapalap, öüpwe eppeti mälón aramas esap wor ar tipis me lón ewe fönü ewe SAMOL ämi we Kot epwe ngeni kemi pwe öüpwe fönüweni. Iwe, esap wor ämi sekining fäniten niimanaw.

11Nge are emön aramas a opwut chón órun o a ekiekietä pwe epwe operi chón órun we o niieló. Mwirin, a süü ngeni ew leiin ekkeei telinimwen op. 12Lón ei lapalap, ekkewe souakkomwen ewe telinimw än ewe chón niieló aramas, repwe tiinaló ekkóch pwe repwe eliwinato ewe chón niieló aramas seni ewe telinimwen op. Iwe, repwe atolonga i lepöün ewe chón älemöü chcha, määrärin ewe mi mäló pwe epwe ninniiló. 13Öüsap letipengaw ren ewe chón niieló aramas. Öüpwe limetaló ewe tipisin niieló aramas seni lón Israel pwe öüpwe feiöch.

Kiään fönü

14Lupwen öüpwe tolong lón ewe fönü ewe SAMOL ämi we Kot epwe ngeni kemi, öüsap sooläni fönüwen emön ren ämi ömwökütü ekkewe esissilen kiä ämi kewe leewo ra fótuki pwe esissilen fönüwer.

Öllük fänäsengesin chón pwärätä

15Öüsap ettipisi emön aramas ren ew tipis alóngólóng wón än emön chök chón pwärätä kapasen pwärätä. Minne mi let usun ei föfför epwe pwönüwetä ren än rüwömön ika ülümöm chón pwärätä kapasen pwärätä.

16Are emön chón pwärätä mi chofona a ettipisi emön aramas ren och föfför mi mwääl, 17mwirin, iir me rüömön ekkewe aramas - ewe chón otuttur me ätewe i a oturu - repwe üütä fän mesen ekkewe souasór me ekkewe souköpwüng mi föri wiiser fän mesen ewe SAMOL. 18Iwe, ekkewe souköpwüng repwe tichchik le etittinafichi usun ewe föfför. Nge are epwe pwä pwe ewe chón otuttur i emön chón pwärätä mi chofona, 19mwirin, ewe chón otuttur epwe angei ewe chappen tipis i a ekieki pwe epwe föri ngeni ätewe i a oturu. Epwe iei usun ämi öüpwe limetawu ei sókkun mi ingaw seni leiimi. 20Iwe, ekkana lussun aramas repwe rong usun o repwe nuokkus ar repwe försäfäli ei sókkun föfför mi ingaw me leiimi. 21Öüsap letipengaw ren ämi öpwüngü emön mi föri minne mi ngaw. Ämi öllük epwe iei usun: liwinin ew manaw pwal ew manaw, liwinin eföü maas pwal eföü maas, liwinin efóch ngii pwal efóch ngii, liwinin efóch paaw pwal efóch paaw, liwinin efóch peche pwal efóch peche.

Ekkóch öllük fäniten maun

20 Lupwen öüpwe feilló pwe öüpwe maun ngeni ekkewe chón opwuta kemi, nge öüpwe küna ekkewe óris me wóóken me mwiichen sounfiu mi fókkun chómmóng lap seni nöümi, öüsap nuokkusitiir; pün ewe SAMOL ämi we Kot a nóm reemi, i ewe Kot a emmwenikemiiwu seni ewe fönü Egypt. 2Me mwen ämi öüpwe feilló maun, ewe souasór epwe feitto o kapas ngeni ewe mwiichen sounfiu. 3Iwe, i epwe apasa ngeni iir, “Öüpwe öüseling ngeniei ämi re Israel meinisin. Öüsap nuokkus lupwen öüpwe feilló maun ngeni ekkewe chón opwuta kemi ikenäi. Öüsap mwüüt ngeni letipemi an epwe kisikiisiló, öüsap nuokkus, öüsap chechchech ika rüükö pwokiteer. 4Pün ewe SAMOL ämi we Kot epwe fiti kemi. I epwe fiiu fänitemi ngeni ekkewe chón opwuta kemi o i epwe ewilla kemi!”

5Mwirin, ekkewe meilapen sounfiu repwe kapas ngeni ekkewe mwiichen sounfiu o apasa, “Ifa usun, mi wor emön mwän ikeei a chök kärään öüüetä ew imwan mi fö nge esap mwo föri ósópwun? Are mi wor, iwe, sipwe mwüüt ngeni ätewe pwe epwe feilló o liwinsäfäliti imwan, pwe ete mäló lón maun; iwe, pwal emön mwän a föri ósópwun imwan. 6Ifa usun, mi pwal wor emön mwän mi nóm ikeei a chök kärään fótuki an tännipiin irän wain, nge esap mwo ocheei üwaan? Sipwe mwüüt ngeni i pwe epwe feilló o liwinisäfäliti imwan, pwe ete mäló lón maun; iwe, pwal emön mwän a ocheei uwään fótaan irän wain. 7Iwe, ifa usun, mi wor emön mwän ikeei a kófót ngeni emön fefin, nge esap mwo pwüpwülü ngeni neminnewe? Sipwe mwüüt ngeni i pwe epwe feilló o liwinsäfäliti imwan, pwe ete mäló lón maun; iwe, pwal emön mwän a pwülüweni neminnewe. 8Mwirin, ekkewe meilapen sounfiu repwe sópweló le kapas ngeni ekkewe sounfiu o apasa, ‘Ifa usun, mi wor emön mwän ikeei a nuokkus o kisikiis letipan? Sipwe mwüüt ngeni i pwe epwe feilló o liwinsäfäliti imwan, pwe letipen chinan kana ete kisiló usun chök letipan.” 9Iwe, lupwen ekkewe meilapen sounfiu repwe wes le kapas ngeni ekkewe sounfiu, iir repwe filätä ekkewe samolun ekkewe kinikinin mwiichen sounfiu pwe repwe emmweni ekkewe aramas.

10Lupwen öüpwe feilló arap ngeni ew telinimw pwe öüpwe maun ngeni, öüpwe akkomwen aronga ngeni chón ewe telinimw ämi öüpwe föri ew pwonen etipeewin kinamwe ngeniir. 11Are repwe etiwa ämi pwonen kinamwe o repwe suuki ngeni kemi asamen tittin ar telinimw; mwirin, ekkewe aramas meinisin mi nóm lón ewe telinimw repwe chón angangen kinrosi ngeni kemi. 12Nge are chón ewe telinimw resap mochen repwe kinamwe ngeni kemi, pün ra fen amollätä ar repwe maun ngeni kemi; mwirin, öüpwe róngeeló ewe telinimw fän pisekin maun o maun ngeni. 13Iwe, lupwen ewe SAMOL ämi we Kot epwe atolonga ewe telinimw lepöümi, öüpwe niieló ren ketilas iteiten mwän meinisin lón ewe telinimw. 14Nge öüpwe angei ekkewe fefin meinisin fänitemi, ekkewe kükkün semiriit, ekkewe pwiin maan me meinisin minne ra nóm lón ewe telinimw fänitemi pwe liäpemi. Iwe, öüwa tongeni ääni meinisin minne öüwa liäpeni seni ekkewe chón opwuta kemi ewe SAMOL ämi we Kot epwe ngeni kemi. 15Epwe iei usun meet öüpwe föri ngeni ekkewe telinimw meinisin mi toowaw seni kemi, nge sap ngeni telinimwen ekkewe mwüü mi chök arap ngeni kemi.

16Nge are öüwa liäpeni ekkewe telinimw lón ewe fönü ewe SAMOL ämi we Kot epwe ngeni kemi pwe öüpwe fönüweni, öüsap mwüüt ngeni och mettóch mi chüen ngasangas epwe manaw. 17Öüpwe unusen arosaló ekkewe chón Hit me ekkewe chón Amor me ekkewe chón Kanaan me ekkewe chón Periz me ekkewe chón Hiv me ekkewe chón Jebus, usun chök minne ewe SAMOL ämi we Kot a öllük ngeni kemi. 18Öüpwe föri ei pwe epwe eppeti seni aramasen ewe fönü ar repwe äiti ngeni kemi pwe öüpwe föri ar kewe öörüni mi enniopwut meinisin iir ra föri lupwen ra fel ngeni ar kewe kot. Iei meet epwe popuw ngeni kemi pwe öüpwe tipis ngeni ewe SAMOL ämi we Kot.

19Lupwen öüpwe róngeeló ew telinimw fän pisekin maun lón fansoun langattam ren ämi öüpwe maun ngeni pwe öüpwe liäpeni, öüsap ataeló irän ewe leeni ren ämi öüpwe pöküür ngeni kouk. Are öüpwe tongeni mwöngö seni uwaar; iwe, öüsap pöküüretiw ren ämi öüpwe aea le róngeeló ewe telinimw, pün irän lón ekkewe mälämäl ina meet aramas ra mwöngö seni. 20Nge öüwa tongeni pöküüwetiw ekkewe irä ämi mi silei pwe resap lamwot fäniten mwöngö. Öüwa tongeni pöküretiw, pwe öüpwe aea le föri ekkewe pisekin maun öüpwe aea le atai ngeni ewe telinimw öüwa róngeeló fän pisekin maun tori än ewe telinimw epwe taaló.

Ewe öllük fänäsengesin niieló aramas nge esap pwä iö a föri

21Are a pwä emön mi mäló ren än emön niieló a nóm lón ew mälämäl me lón ewe fönü ewe SAMOL ämi we Kot epwe ngeni kemi pwe fönüwemi, nge esap wor emön a silei ika iö a niieló i, 2mwirin, nöümi kewe souakkomw me souköpwüng repwe feilliwu lón ewe leeni o öükü ika menni telinimw a koon arap ngeni ewe aramas mi ninniiló. 3Iwe, ekkewe souakkomwen ewe telinimw mi koon arap ngeni ewe aramas mi ninniiló repwe angei emön liälifföön kowu esamwo wor emön e nöünöü le angang, esap mwo pwal mwärelong fän efóch öüwafar ren an epwe etekini och pisekin ttu pwül. 4Ekkewe souakkomwen ewe telinimw repwe uweatiw ewe liälifföön kowu lón ew lemólun esap mwo ttu pwülün, esap pwal mwo fót irä won, ia a pwuupwu kólik ie. Iwe repwe kupii üwen ewe liälifföön kowu me ikenan lón ewe lemólun. 5Mwirin, ekkewe souasór, nöün Levi kewe mwän, repwe pwal feilló ikenan, pün ewe SAMOL ämi we Kot a fen filiretä pwe repwe angang ngeni i o repwe pwal apasa kapasen feiöch lón iten ewe SAMOL. Iwe, iir repwe wiisen öpwüngaló iteiten köpwüngün fitikoko me köpwüngün feiengaw meinisin. 6Iwe, meinisin ekkewe souakkomwen ewe telinimw mi koon arapoto ngeni ewe aramas mi ninniiló repwe tölü pöüür me asen ewe liälifföön kowu mi kupukup üwan me lón ewe lemólun. 7Mwirin iir repwe pölüweni o apasa, “Pöüüm esap össükü ei chcha, meseem esap pwal küna ei föfför an fis. 8Äm SAMOL, kopwe omwusaló tipisin noum kewe aramasen Israel, en ka angaseer. Kosap liwini ngeni noum kewe aramasen Israel chappen tipisin chaan emön aramas esap wor an tipis.” Mwirin, repwe pichiló seni tipisin chaan ei aramas. 9Ren ämi fiti pwüngün ekkeei kapasen öüröür o föri meet mi pwüng me fän mesen ewe SAMOL, öüpwe limetawu seni leiimi ewe tipisin össükü chaan aramas esap wor ar tipis.

Fefin mi ooló lón maun

10Lupwen kopwe feilló maun ngeni chón opwutom kana, nge ewe SAMOL óm we Kot epwe atolonger lepöum, o kopwe uweireló pwe liapom, 11nge ka küna me leiin ekkewe mi ooló emön fefin mi liöch. Iwe, ka sani i o ka mochen angei neminnewe pwe pwülüwom. 12Are epwe fis ei sókkun, ka tongeni óm kopwe uweeló neminnewe ngeni imwom we. Iwe, kopwe reiipööpöló meeten möküran o fichi ükkün ächefen pöün. 13Iwe, neminnewe epwe pwilitätiw üfan kewe a üföüf lupwen a ooló o epwe nónnóm lón imwom we lón üküükün ew maram pwe epwe kechiweiti saman me inan. Mwirin, en ka tongeni feilló ren neminnewe o angei pwe pwülüwom. 14Iwe, lupwen ka pwülüweni neminnewe nge mwirin ka filätä pwe kosap saani i, iwe, kopwe mwüüt ngeni pwe epwe feilló ia i a mochen epwe feilló ie. Nge kosap fókkun amöömöló i ren mooni. Kosap pwal föri ngeni i pwe epwe usun emön amanaw, pwokiten en ka fen äsääwa i.

Än ewe mwännichi pwüüng

15Are emön mwän a pwülüweni rüwömön fefin, nge ätewe a tongei emön nge esap tongei ewe pwal emön. Iwe, iir me rüwömön, neminnewe mi wor tongan me ewe esap wor tongan, ra nöünöü me wón ätewe, nge ewe mwännichi i nöün ewe fefin ätewe esap tongei. 16Lupwen ewe mwän epwe ineti pisekin wón nöün kewe mwän, i esap fókkun ngeni nöün we me wón pwülüwan we ia tongei ewe wiisen mwännichi ren an epwe öüchcheani ätewe mwen ewe enletin mwännichi nöün pwülüwan we i esap tongei. 17Ewe mwän epwe fókkun ngeni nöün we mwännichi me wón pwülüwan we i esap tongei ruu inetin seni meinisin minne i a ääni pwe epwe älelleta pwe ina i ewe mwännichi pün ewe mwännichi a esissilätä mwen än saman we pöchökkül. Iei minne, i a ääni ewe pwüüng fäniten ewe wiisen mwännichi, inamwo ika i nöün pwülüwen saman we esap wor tongan.

Ewe naaw mi lükümmach

18Are emön mwän a nöüni emön äät mi tipeförea me lükümmach, esap mochen älleasochisi saman ika inan, inamwo are ra ääni köpwüngün emiriit ngeni, 19mwirin, ewe saam me ewe iin repwe angei ätei o emmwenaló i ren ekkewe souakkomwen ar we telinimw, ren asamalapen tittin ewe telinimw. 20Iwe, repwe apasa ngeni ekkewe souakkomwen ewe telinimw, ‘Iei i nöüüm ei äät mi fókkun tipeförea me lükümmach. I esap mochen älleasochisi mwelieem. I emön chón ünüpwuch mi lamwotongaw.’ 21Mwirin, meinisin ekkewe mwänin lón ewe telinimw repwe mónei ätei ngeni faaw tori an epwe mäló. Epwe iei usun ämi öüpwe limetawu ewe mi ngaw seni leiimi. Iwe, chón Israel meinisin repwe rong usun o repwe nuokkus.

Pwal ekkóch sókkun öllük

22Are emön aramas a föri och tipis mi fich ngeni an epwe mäló ren, nge i a ninniló o mwirin a eittiwetä wón efóch irä, 23inisin esap nómwóló wón ewe irä lón unusen ewe pwiin. Öüpwe fókkun peiaseni soomän lón chök ewe ränin, pün emön mi ittiwetä wón efóch irä a önümaamaw meren Kot. Öüsap elimengawa ewe fönü ewe SAMOL epwe ngeni kemi pwe fönüwemi.

22 Are kopwe küna pwe nöün chón órum kowu ika siip a mwälecheló, kosap otupwun föri pwe kose küna. Kopwe fókkun eliwinisäfäli ewe maan ngeni ewe minne nöün. 2Are ewe maan esap nöün emön mi arapoto ngenuk, ika kosap silei ewe minne nöün ewe maan, iwe kopwe chök anómwu ewe maan tori än ewe minne nöün ewe maan epwe kütta. Mwirin, kopwe eliwinisäfäli ngeni. 3Kopwe föri pwal iei chök usun are kopwe küna emön dongki, och üüf, ika pwal och mettóch mi pöütüló seni chón órum we nge en ka küna. Kosap otupwun föri pwe kosap küna.

4Are kopwe küna nöün chón órum dongki ika kowu a turuló lepeekin efóch aal, kosap ömönüngaw seni. Kopwe feilló o älisi chón órum we le öüütäsäfäli nöün we maan.

5Emön fefin esap fókkun üföüf üfen mwän, nge emön mwän esap fókkun üföüf üfen fefin. Pün ewe SAMOL ämi we Kot a opwut aramas mi föri ei sókkun.

6Are kopwe küna ew fasen machchang mi nóm wón efóch irä ika wón pwül nge a wor appanan ika sokul lón fiti ewe inelap a anoppei ekkewe appanan ika ekkewe sokul, kosap angei ewe inelap fiti ekkewe appanan. 7Ka tongeni angei ekkewe appanan, nge kopwe ässäló ewe inelap, pwe kopwe feiöch o ränin manawom repwe langattam.

8Iteiten imw mi fö kopwe öüüetä, kopwe föri och aróngóróng pwellin wón ósun mi chööpöpüló. Ren ei, kosap atooto tipisin össükü chcha wón chón leimwom are emön epwe turutiw seni wón ewe óós.

9Kosap fótuki pwal och sókkun irä lefiilen lainin óm tännipin irän wain. Are kopwe föri ei sókkun, iwe, epwe lamwotongaw ngenuk óm kopwe aea ekkewe kreip seni óm we tännipin irän wain ika ekkewe üwään irä seni ewe pwal och sókkun irä.

10Kosap ttu pwül ren emön ätemwänin kowu me emön dongki mi fööfö fengen.

11Kosap üföüf och üüf mi för seni ünen siip me silin irä mi ttür fengen.

12Kopwe fókkun ópwosükü wón ekkewe rüwänü pwokuukun ewe üüf en ka pwölüw ngenuk.

Ekkóch öllük fäniten föfförün lefiilen mwän me fefin

13Are emön mwän a pwülüweni emön fefin, nge mwirin än ätewe a kóón ren neminnewe, a siwili an ekiek usun neminnewe, 14o a ettipisi mwäli neminnewe pwe a kóón ren pwal emön mwän o a eitengawa neminnewe ren an apasa, “Ngang üwa angei ei fefin pwe pwülüwei, nge lupwen üwa kóón ren, üwa küna pwe sap i emön fefin esap mwo tori mwän,” 15mwirin, semen ewe föpwül we epwe angei ewe pisekin pwärätä fäniten älelleten än ewe föpwül esap mwo tori mwän o repwe uwealó ren ekkewe souakkomwen ewe telinimw mi nóm ren asamalapen tittin ewe telinimw. 16Iwe, semen ewe föpwül we epwe apasa ngeni ekkewe souakkomw, “Ngang üwa ngeni ei mwän neii ei föpwül pwe pwülüwan, nge iei i a opwut neminnei. 17Iei ätei a ettipisi neminnei ren föfför mi ässääw o apasa pwe neminnei sap i emön föpwül esap mwo tori mwän lupwen a pwülüweni. Nge iei ei pisekin pwärätä fäniten älelletan pwe neii ei föpwül esap mwo tori mwän.” Mwirin, repwe emeresaló ewe mangaak me fän mesen ekkewe souköpwüng. 18Iwe, ekkewe souköpwüng repwe angei ewe mwän o öpwüngü. 19Iwe, repwe angei seni ätewe an pakking üküükün ipwükü föün silifer pün ätewe a ettipisi mwäli emön föpwülün Israel esap mwo tori mwän. Ewe pakking epwe ló ngeni semen ewe föpwül we. Iwe, neminnewe epwe chök pwülüwen ätewe. Mwirin, ewe fefin epwe chök nómwóló pwe pwülüwen ewe mwän. Ätewe esap fókkun tongeni mwüüseni neminnewe lón unusen ränin manawan meinisin.

20Nge are än ewe mwän we kapasen ettipisi ewe fefin a pwüng o esap wor pisekin pwärätä fäniten älelleten än ewe föpwül esap mwo tori emön mwän, 21mwirin, ekkewe souköpwüng repwe emmwenawu ewe föpwül ren asamen imwen saman we. Iwe, ekkewe mwänin lón an we telinimw repwe mónei faaw ngeni neminnewe tori an epwe mäló, pwokiten i a föri och föfför mi uren ässääw me lón Israel ren an föri föfförün emön fiin lisowu lupwen an nónnóm lón imwen saman. Ei sókkun mi ngaw epwe limelimewu seni leiimi.

22Are epwe pwä pwe emön mwän a kóón ren emön fefin mi pwüpwülü, mwirin, iir me rüwömön - ewe mwän mi kóón ren ewe fefin me ewe fefin - repwe ninniiló. Epwe iei usun ämi öüpwe limetawu ewe föfför mi ngaw seni Israel.

23Are emön mwän a chuuri emön föpwül, emön esap mwo tori mwän nge i mi kófót ngeni emön mwän o ätei a lisowu ngeni ei föpwül me lón ew telinimw, 24mwirin, öüpwe emmweniirewu me rüwömön ren asamalapen ena telinimw o mónei ngeniir faaw tori ar repwe mäló. Ewe föpwül epwe ninniiló pwokiten i mi nóm lón ewe telinimw nge esap kökkö än emön epwe älisi i. Ewe mwän epwe ninniiló pwokiten i a turunufasei pwülüwen pwal emön mwän. Ren ei lapalap, öüpwe limetawu ewe föfför mi ngaw seni ewe fönü.

25Nge are emön mwän a chuuri emön fefin mi kófót me leemal, nge ewe mwän a achoomanawei neminnewe, mwirin, ewe chök mwän epwe mäló. 26Nge öüsap föri och ngeni ewe föpwül. Neminnewe esap föri och tipis mi fich ngeni an epwe mäló ren. Ei lapalap a chök wewe fengen me än emön mwän epwe awata o niieló emön chón órun. 27Pwokiten ewe mwän a achomanawei neminnewe me leemal; iwe, inamwo are ewe föpwül mi kófót a pwuchöör pwe emön epwe älisi, nge esap wor emön epwe tongeni chimanüw.

28Are emön mwän a chuuri emön föpwül esap mwo tori mwän, esap pwal mwo kófót; nge a achomanawei neminnewe o kóón ren, nge mwirin ra pwä, 29ewe mwän mi kóón ren ewe föpwül epwe ngeni semen ewe föpwül lime föün silifer. Mwirin, ewe mwän epwe le pwülüweni ewe föpwül, pwokiten i a epinengawa neminnewe. Iwe, esap fókkun mwüümwütä ngeni ätewe an epwe mwüüseni neminnewe lón unusen ränin manawan.

30Emön mwän esap lisowu ngeni pwülüwen saman, pün ren ei föfför i epwe osuufölüngawa saman ren an kieni kien saman we.

Chókana resap chóóni ewe mwiichen chón Israel

23Esap wor emön mwän mi pachaach föün ochchoun ika pöküpöküló ewe kükkün inisin epwe tongeni tolong lón än ewe SAMOL mwiichen aramas.

2Esap wor emön mi upwun leroch epwe tongeni tolong lón än ewe SAMOL mwiichen aramas. Esap pwal wor emön mwirimwirin epwe tongeni tolong lón än ewe SAMOL mwiichen aramas, inamwo ika a tori ewe äengolun tettelin pilóón aramas.

3Esap wor emön chón Ammon ika chón Moab epwe fókkun tongeni tolong lón än ewe SAMOL mwiichen aramas. Esap pwal wor emön mwirimwiriir epwe tolong lón än ewe SAMOL mwiichen aramas tori feilfeilló chök, inamwo ika a tori äengolun tettelin pilóón aramas, 4pwokiten chón ekkeei mwüü resap etiwakemi fän pilawa me kólik wón ewe aal, lupwen öüwa toowu seni Egypt. Nge ra fen mööni Balaam nöün Beor we seni Pethor lón Aram Naharaim (iei Mesopotamia) pwe epwe önümamawa kemi. 5Nge ewe SAMOL ämi we Kot esap mochen öüseling ngeni Balaam, pwe ewe SAMOL ämi we Kot a fen sorei ewe önümamaw ngeni ew feiöch fänitemi, pwokiten ewe SAMOL ämi we Kot a tongei kemi. 6Öüsap fókkun kütta ar kinamwe ika ar feiöch lón unusen ränin manawemi tori feilfeilló chök.

7Öüsap opwut emön chón Edom pün i pwiimi. Öüsap opwut emön chón Egypt, pwokiten ämi öüwa chón waasöla lón fönüwan. 8Ekkewe semiriit mi upwutiw ngeni ekkewe chón Egypt lón ewe öülüngätin tettelin pilóón aramas me leiin ekkewe chón Egypt mi fitikemiito seni Egypt repwe tongeni tolong lón än ewe SAMOL mwiichen aramas.

Ewe leeni ia sounfiu ra asóósó ie epwe limelimöch

9Lupwen ewe mwiichen sounfiu repwe feilló maun ngeni ekkewe chón opwuta kemi, öüpwe pwisin tümwünü kemi seni iteiten ekkewe mettóch mi limengaw. 10Are emön mwän me leiimi a nóm lón tettelin chón limengaw pwokiten ewe chaan mwän a toowu seni i lepwin, i epwe feilló lükün ewe leenien sounfiu. I esap tolong lón ewe leenien sounfiu lón unusen ewe rän. 11Nge lupwen an a tori lekkuniól, ätewe epwe tüütü. Iwe, lupwen ewe akkar a tupwutiw, ätewe a tongeni tolong lón ewe leenien sounfiu.

12Öüpwe esissilaló ew leeni lükün ewe leenien sounfiu ia öüpwe tongeni feilló angasakemiiló ie. 13Epwe wor än emön me emön leiimi och pisekin ttu leiin pisekimi. Pün lupwen öüpwe feilló lükün ewe leeni ren ämi öüpwe ngasaló, öüpwe tuuw ew pwaang ren ewe pisek o ireeló ewe kiten mwöngö. 14Ewe leeni ia öüpwe nóm ie epwe fókkun pin, pün ewe SAMOL ämi we Kot epwe fätälfeil leiimi lón ämi leenien sounfiu pwe epwe tümwünü kemi o okkufu ekkewe chón opwuta kemi. Iwe, i esap fókkun küna och mettóch mi limengaw me leiimi, pün are epwe küna och, iwe, epwe kul seni kemi.

Pwal ekkóch sókkun öllük

15Are emön amanaw epwe süüseni an masta o süü ngenuk pwe epwe nóm reemw, kosap eriääni pwe epwe liwinsäfäliti an we masta. 16Kopwe mwüüt ngeni pwe epwe nónnóm reemw lón ewe leeni i a filätä me lón ew kewe telinimw a koon mwirinnö ngeni i, nge kosap eriäfföwü.

17Esap wor emön chón Israel, mwän ika fefin, epwe emön chón ääni amöömö inisin fäniten lisowu lón imwenfel fäniten angangen lamalam. 18Kosap uweato lón imwen ewe SAMOL óm we Kot och asór seni liwinin emön chón ääni amöömö inisin, ese lifilifil ika emön fefin ika emön mwän, ika liwinin emön kolak pwe möön ew asóren pwon, pün iir me ruu ra och mi enniopwut meren ewe SAMOL óm we Kot.

19Kosap awora kullun meet emön chiechiom chón Israel a liwinimmang senuk, ese lifilifil ika i a liwinimmang senuk mooni ika mwöngö ika pwal och mettóch epwe tongeni wor kullun. 20Ka tongeni angei kullun än emön chón ekis liwinimmang, nge kosap angei seni emön chón Israel, pwe ewe SAMOL óm we Kot epwe efeiöchuk lón iteiten mettóch meinisin kopwe föri me lón ewe fönü kopwe le tolong lón pwe kopwe fönüweni.

21Lupwen kopwe ääni ew pwon ngeni ewe SAMOL óm we Kot, kopwe mwittir le föri ese lifilifil meet ka pwon ngeni. Pün ewe SAMOL óm we Kot a fókkun mochen kopwe mwittir le öpwönüwetä óm pwon meinisin. Are kosap mwittir le öpwönüwetä óm pwon, en kopwe tipis ren. 22Nge esap och tipis are kopwe pineeló awom pwe kosap ääni ew pwon. 23Kopwe fókkun föri meet ka apasa pwe kopwe föri. Are ka ääni ew pwon ngeni ewe SAMOL óm we Kot, en ka filätä pwe kopwe ääni ewe pwon. Kot esap eriäänuk pwe kopwe ääni ewe pwon. Iei minne, kopwe fókkun föri meet ka pwonei.

24Lupwen kopwe tolong lón än chón órum tännipiin irän wain, ka tongeni ömötukoló le ochooch ekkewe kreip üküükün óm mochen, nge kosap chök uwealó eföw lón óm chüük. 25Lupwen kopwe tolong lón än chón órum tännipiin wiit esamwo pöküpök, ka tongeni kinii ngeni pöum ekkóch kewe umwun föün wiit, nge kosap nöünöü kama le pöküüw än chón órum irään wiit esamwo pöküpök.

Öllük fänäsengesin mwüüfesen

24 Are emön mwän a pwülüweni emön fefin, nge mwirin, a fis pwe ewe mwän esap chüen efich neminnewe pwokiten i a küna pwe a wor och mettóch mi ässääw neminnewe a ter me wón. Iei minne, ätewe a makkei fäniten neminnewe echö taropwen mwüüfesen o ngeni neminnewe ewe taropwe. Mwirin, a tiinaló neminnewe seni lón imwan we. 2Are neminnei a feilló, nge mwirin a pwülüweni pwal emön mwän, 3nge ei örüwömönün mwän mi pwülüweni neminnei a pwal mwüüseni neminnei ika mäló, 4ätewe mi piin pwülüweni neminnei akkomw, esap tongeni pwülüwenisäfäli neminnei, pün neminnei a fen limengaw. Ei epwe och sókkun föfför mi enniopwut ngeni ewe SAMOL. Kosap atolonga tipis lón ewe fönü ewe SAMOL óm we Kot epwe ngenuk pwe kopwe fönüweni.

Pwal ekkóch sókkun öllük

5Lupwen emön mwän a chök kärään pwüpwülü, esap fókkun kökkö ngeni an epwe chóóni mwiichen sounfiu. Esap wor pwal och sókkun angang i epwe wiisen föri. Ätewe epwe mwo chök nóm lón leenian lón üküükün ew ier o föri minne pwülüwan we i a pwüpwülü ngeni epwe pwapwa ren.

6Esap wor emön aramas epwe angei seni pwal emön an föün üsüüs pwe pisekin ölükülükün an pwonen liwinimmang, ese lifilifil ika ewe föün asan ika ewe föün faan, pün ätewe minne an ewe föün üsüüs a aea ewe üsüüs le föri minne epwe manaw seni.

7Are a pwä pwe emön aramas a sooläni le sü fän emön chiechian chón Israel, nge a turunufasei le nöüni amanaw ika amöömöló i, ewe chón sooläni aramas epwe fókkun mäló. Öüpwe fókkun limetawu ewe föfför mi ngaw seni leiimi.

8Öüpwe tümwünüfichi ekkewe kilingaw meinisin mi tongeni terfeil. Öüpwe föröchchüw le fiti pwüngün ekkewe kapasen öüröür ekkewe souasór, chón ewe einangen Levi repwe äiti ngeni kemi. Öüpwe älleasocchisi ekkewe öllük ngang üwa ngeni kemi. 9Öüpwe chechchemeni meet ewe SAMOL ämi we Kot a föri ngeni Miriam lón ämi sääi lupwen öüwa feitto seni Egypt!

10Lupwen kopwe mwüüt ngeni chón órum pwe epwe liwinimmang och mettóch senuk, kosap tolong lón imwan pwe kopwe angei ewe pisekin ölükülükün an pwonen liwinimmang. 11Kopwe chök üütä lükün, nge ewe mwän en ka mwüüt ngeni pwe epwe liwinimmang senuk epwe uweawu reemw ewe pisekin ölükülükün an pwonen liwinimmang. 12Are chón órum we emön mi wöwingaw, nge a wor echö chök üfan epwe ngenuk pwe ina an pisekin ölükülükün an pwon, kosap ömwöchaló ewe üüf lón unusen ewe pwiin. 13Kopwe eliwinisäfäli ewe üüf ngeni ätewe lupwen ewe akkar epwe tupwutiw, pwe i epwe tongeni üföüf üfan we le möür. Mwirin, ätewe epwe kilisou ngenuk. Iwe, ewe SAMOL óm we Kot epwe älleani ei föfför pwe ew föfförün pwüng.

14Kosap turunufasei le eriäfföwü ekkana chón angangen nöüür mooni pün iir mi wöwingaw, ese lifilifil ika iir chiechiom chón Israel ika iir chón ekis mi nónnóm lón ämi kewe telinimw. 15Kopwe ngeniir liwiniir lón ew me ew rän me mwen än akkar epwe tupwutiw, pwokiten iir ra wöwingaw o ra anómwu ar apilükülük wón liwiniir. Are ka ömwöchü seniir liwiniir; iwe, ina repwe siö ngeni ewe SAMOL usum. Iwe, epwe ällea fänitom pwe ew tipis.

16Ekkewe saam me iin resap ninniiló fäniten än nöüür tipis, pwal ekkewe naaw resap ninniiló fäniten än semeer me ineer kewe tipis. Emön aramas epwe ninniiló fäniten pwisin an tipis.

17Öüsap sorei minne mi pwüng mi fich ngeni ekkana chón ekis mi nóm leiimi ika ngeni ekkana mi määsen. Öüsap pwal angei üfen emön fefin mi määseni pwülüwan pwe pisekin ölükülükün an pwonen liwinimmang. 18Iteiten fansoun meinisin, öüpwe chechchemeni pwe ämi öüwa fen piin amanaw lón Egypt, nge ewe SAMOL ämi we Kot a angasakemi seni ikenan. Iei popun, ngang üwa ngeni kemi ei öllük.

19Lupwen kopwe kinii üwään fótóóm wiit lón óm tännipi nge ka möllükaló pwe kopwe mwinelong ew pilükün irään wiit seni lón óm tännipi, kosap liwinsäfäliti pwe kopwe angeei. Kopwe chök likitaló fäniten ekkewe chón wöwingaw, ekkewe mi määsen me ekkewe fefin mi määseniir pwülüweer. Mwirin, ewe SAMOL óm we Kot epwe efeiöchuk lón meinisin minne ka föri. 20Lupwen kopwe ätterätiw ekkewe föün olif seni wón óm kewe irä olif, kosap enliwinisäfäli fän oruuwan le ätteri ekkewe palan. Kopwe likitaló ekkóch ekkewe föün olif fäniten ekkewe chón ekis, ekkewe mi määsen me ekkewe fefin mi määseniir pwülüweer. 21Lupwen kopwe kinii ekkewe kreip lón óm tännipin irän wain, kosap pwal liwinsäfäliti óm kopwe kinii. Kopwe chök likitaló ekkewe lussun kreip fäniten ekkewe chón ekis, ekkewe mi määsen me ekkewe fefin mi määseniir pwülüweer. 22Öüpwe chechchemeni pwe ämi öüwa fen piin amanaw lón ewe fönü Egypt. Iei popun, ngang üwa ngeni kemi ei öllük.

25 Are rüwömön mwän ra äniini fengen, repwe uwealó ngeni köpwüng minne ra äniini fengen wón. Iwe, ekkewe souköpwüng repwe wiisen filätä pwüngün ika menni aramas a pwüng nge menni a mwääl. 2Iwe, are a toowu pwüngün pwe ewe aramas mi mwääl epwe wichiwich, ewe souköpwüng epwe öllük ngeni ätewe pwe epwe iwelitiw. Mwirin, emön epwe wichi ätewe nge ewe souköpwüng epwe nennengeni. Üküükün iteiten wichiwichin ätewe epwe alóngólóng wón ewe tipis. 3Ewe chón wichi ätewe epwe wichi i fän fääik nge esap lap seni. Are epwe alapaló seni ei öüküük o a wichi ätewe fän chómmóng lap seni fän fääik, wewen pwe esap wor öüchchean manawen ätewe mi wichiwich.

4Kosap föötaló awen emön ätemwänin kowu lupwen a föri ewe angangen pwuuri ekkewe umwun wiit pwe ekkewe föün repwe toowu seni lón pöör.

Wiisen pwiin emön mi mä ngeni pwülüwen pwiin

5Are rüwömön pwiipwi ra nónnóm fengen wón ew chök fönü, iwe, emön me leiir a mäló nge esap wor nöün, pwülüwen ätei mi mäló esap tongeni pwülüweni emön chón ekis me lükün ewe famili. Pwiin pwülüwen neminnei we epwe pwülüweni neminnei. Iwe, ätewe epwe öpwönüwetä pwüngün ewe wiisen pwiipwi ngeni pwülüwen pwiin we. 6Iwe, ewe mwännichi neminewe epwe nöüni me wón ätewe epwe ällea pwe nöün pwiin we a fen mäló pwe iten pwiin we a mäló esap möllüküló seni lón Israel.

7Nge are ewe mwän esap mochen pwülüweni pwülüwen pwiin we mi mäló, mwirin, neminnewe epwe feilló ren ekkewe souakkomw mi nóm ren asamalapen tittin ewe telinimw o apasa, “Pwiin pwülüwei we esap mochen pwe iten pwiin we epwe sópwósópóló me lón Israel, pün i esap mochen pwülüweniei. Esap mochen öpwönüwetä pwüngün ewe wiisen pwiipwi ngeni pwülüwen pwiin.” 8Mwirin, ekkewe souakkomwen än ätewe we telinimw repwe kökköri ätewe o sótuni le kapas ngeni i. Nge are ätewe epwe chök ouucho le apasa pwe i esap mochen pwülüweni neminnewe, 9mwirin, neminnewe epwe feilló ren ätewe fän mesen ekkewe souakkomw. Iwe, epwe pwilitawu ipwen ätewe we sandal seni wón pachapachan, o epwe attufa wón mesen ätewe. Iwe, neminnewe epwe chietä o apasa, “Iei usun minne epwe fis ngeni emön mwän esap mochen epwe awora emön äät fäniten pwiin.” 10Iwe, mwirin ena fansoun feilló, aramas repwe kapas usun än ätewe famili pwe “ewe familien emön mwän mi pwilipwil seni nöün sandal.”

Pwal ekkóch sókkun öllük

11Are rüwömön re Israel ra fiu fengen nge pwülüwen emön leiir a feitto pwe epwe chimanüw pwülüwan we seni lepöün ewe emön mi efeiengawa i, o neminnewe a angaló o turufi föün ochchoun ätewe, 12kumwuchun neminnewe epwe pöküpöküló, nge esap wor letipengawan.

13Kosap awora ruu sókkun föün kilo lón óm pwotow, eföw mi wätte me eföüw mi kükkün. 14Kosap anómwu lón imwom ruu sókkun minen öüküük mi sókkofesen, ew mi wätte me ew mi kükkün. 15Kopwe nöünöü ew kilo mi pwüng me wenechchar, pwal ew minen öüküük mi wenechchar pwe kopwe manawattam me lón ewe fönü ewe SAMOL óm we Kot epwe ngenuk. 16Pün chókana mi manaw rikirik ren ar nöünöü kilo me öüküük resap wenechchar ra enniopwut meren ewe SAMOL óm we Kot.

Arosaló ekkewe chón Amalek

17Öüsap fókkun möllükaló meet ekkewe chón Amalek ra föri ngeni kemi me wón ewe aal lupwen öüwa feitto seni Egypt. 18Öüpwe chechchemeni usun ar ra maun ngeni kemi me wón ewe aal lupwen öüwa mölüülü o apwangapwang. Iwe, ra niietiw chókewe mi kuukumwir, chókewe meinisin mi ammangeretiw mwirin. Esap wor än ekkewe chón Amalek nuokkus Kot. 19Iei minne, lupwen ewe SAMOL ämi we Kot epwe asöösö kemi seni ekkewe chón opwuta kemi meinisin mi nóm ünükkümi me lón ewe fönü i epwe ngeni kemi pwe öüpwe fönüweni, öüpwe arosaló ekkewe chón Amalek o tölawu ächechchemer seni fän läng. Öüsap fókkun möllükaló ei!

Ekkewe asóren mwen uwa me naengol

26 Iwe, lupwen kopwe tolong lón ewe fönü ewe SAMOL óm we Kot epwe ngenuk pwe fönüwom o ka liäpeni o relefönüweló ikenan, 2kopwe angei ekkóch ekkewe mwen uwa seni iteiten uwään ekkewe irä meinisin minne ka fótuki lón pwül en kopwe kinii seni fönüwom we ewe SAMOL óm we Kot epwe ngenuk. Iwe, kopwe uweirelong lón ew chüük o feilló ren ewe leeni ia ewe SAMOL óm we Kot epwe filätä pwe itan epwe nóm ie. 3Iwe, kopwe feilló ren ewe souasór mi angang lón ena fansoun o kopwe üreni i, “Ren ei liffang, ngang üwa pwärätä pwe ewe SAMOL äi we Kot a atolongaei lón ewe fönü i a pwon fän ökköpöl pwe epwe ngeni ach kewe leewo.” 4Mwirin, ewe souasór epwe angei ewe chüük seni lón pöum o isenätiw mwen ewe róngen asór än ewe SAMOL óm we Kot. 5Iwe, en kopwe apasa me fän mesen ewe SAMOL óm we Kot, “Äi we leewo Jakob i emön re Siria mi chök siamwüfeil. Arap ngeni chök an epwe mäló, a feittiw Egypt o nónnóm ikenan. Ra chök chóókükkün chón an we famili, nge lupwen ra nónnóm lón Egypt ra wiliti ew mwüü mi lapalaap, pöchökkül o chómmóng. 6Nge lupwen ekkewe chón Egypt ra kirikiringaw ngeni kich o eriäfföwü kich ren ar föri pwe kich sipwe nöüür amanaw, 7sia siö ngeni ewe SAMOL ewe Kot än ach kewe leewo. Iwe, ewe SAMOL a rong mweliach o küna ach räfföü me ach angangochou me ach weires. 8Ina minne, ewe SAMOL a emmwenikichewu seni Egypt ren manaman mi amwaraar, ren eniweniw mi lapalaap, pwal ren esissil mi manaman me föfför mi amwaarar. 9I a emmwenikicheto ngeni ei leeni o a ngeni kich ei fönü, ia a pwuupwu ie milik me chönün chunen. 10Iwe iei äi SAMOL, nengeni ngang üwa uweato reemw och esissilen ewe mwen uwa en äi SAMOL ka ngeniei seni ewe fönü.” Mwirin, en kopwe isettiw ewe chüük fän mesen ewe SAMOL óm we Kot o kopwe fel ngeni i. 11Mwirin, kopwe feilló o efisi óm apwaapwa pwokiten ekkewe mettóch mi mwirinnö meinisin ewe SAMOL óm we Kot a ngenuk, en me chón leimwom. Iwe, kopwe chechchemeni pwe kopwe apachalong chón ewe einangen Levi me ekkewe chón ekis mi nónnóm leiimi lón ei fansoun apwaapwa.

12Iteiten öülüngätin ier, kopwe fókkun ääni asór ew naengolun uwään fótóóm irä. Kopwe fókkun ngeni ekkewe chón Levi, ekkewe chón ekis, ekkewe fefin mi määseniir pwülüwer me ekkewe mi määsen ekkeei naengol pwe epwe wor chómmóng eneer mwöngö me lón ämi kewe telinimw. 13Mwirin, kopwe apasa me fän mesen ewe SAMOL óm we Kot, “Ngang üwa fen angei seni lón imwei ewe naengol, iei ewe liffang mi pin, o üwa ngeni ekkewe chón Levi me ekkewe chón ekis me ekkewe mi määsen me ekkewe fefin mi määseniir pwülüweer, usun chök minne en ka öllük ngeniei. Ngang üsap pwuurätiw ika möllükaló ew me leiin óm kewe öllük. 14Ngang üsap mwöngö och seni ei naengol lupwen üwa letipeta, ngang üsap pwal attapa och lupwen üwa nóm lón tettelin chón limengaw. Ngang üsap pwal ääni asór och seni, ngeni mi mä. Ngang üwa älleasochisik en ewe SAMOL äi we Kot o üwa föri meinisin minne en ka öllük ngeniei. 15Kopwe nennetiw seni leeniom mi pin lón läng o efeiöchüw noum keei aramasen Israel me ewe fönü en ka ngeni keem - ew fönü ia a pwuupwu ie milik me chönün chunen - usun chök en ka pwon fän ökköpöl ngeni äm kewe leewo.”

Ew mwiichen aramas mi öüchchea nöün Kot

16Ikenäi, ewe SAMOL ämi we Kot a öllük ngeni kemi pwe öüpwe älleasochisi ekkeei öllük me pwüüng meinisin. Öüpwe tümwünüfichi pwe öüpwe älleasochisiir seni unusen lelukemi me unusen ngünümi. 17Ikenäi ämi öüwa älleta le pwärätä pwe ewe SAMOL i ämi Kot. Öüwa pwon pwe öüpwe älleasochisi an kewe öllük me pwüüng me kapasen öüröür ren ämi öüpwe fätäl lón an kewe aal o föri ekkewe mettóch meinisin i a üreni kemi. 18Iwe, pwal ikenäi ewe SAMOL a älleta le pwärätä pwe ämi nöün aramas, ew mwiichen aramas mi öüchchea, usun chök i a fen pwon ngeni kemi. Iwe, öüpwe älleasochisi an kewe öllük meinisin. 19Iwe, are öüpwe älleasochisi i, i epwe föri pwe öüpwe lapalaap seni chón ekkewe mwüü meinisin i a föriir. Mwirin, repwe mwareiti kemi o eitöchü kemi o suföliti kemi, nge ämi öüpwe ew mwiichen aramas mi pin fäniten ewe SAMOL ämi we Kot, usun chök i a pwon.

Ewe öllük mi makketiw wón ekkewe faaw

27Iwe, Moses me ekkewe souakkomwen Israel ra öllük ngeni ekkewe aramas o üreniir, “Öüpwe tümwünü ekkewe öllük meinisin ngang üwa ngeni kemi ikenäi. 2Lupwen öüpwe pwereló epeek ewe chaanpwuupwu Jordan pwe öüpwe feilló ngeni ewe fönü ewe SAMOL ämi we Kot epwe ngeni kemi, öüpwe senäätä fänitemi ekkóch faaw mi föüwätte o öüpwe ommwotouur ren pweech. 3Mwirin, öüpwe makkeei wór meinisin kapasen ei öllük. Ngang üpwe enliwinisäfäli meet ngang üwa apasa. Öüpwe le pwereló pwe öüpwe tolong lón ewe fönü ewe SAMOL ämi we Kot epwe ngeni kemi, ‘ew fönü ia a pwuupwu ie milik me chönün chunen,’ usun chök minne ewe SAMOL än ämi kewe leewo we Kot a pwon ngeni kemi. 4Iei minne, lupwen öüpwe pwereló epeek ewe chaanpwuupwu Jordan, öüpwe senäätä ekkeei faaw wón ewe chuuk Ebal ngang üwa öllük ngeni kemi usur ikenäi o öüpwe ommwotouur ren pweech. 5Öüpwe senäätä ew róngen asór fäniten ewe SAMOL ämi we Kot me ikenan, ew róngen asór seni faaw mi unus. Öüsap nöünöü och pisekin angang seni mächä wón ekkeei faaw. 6Öüpwe senäätä ewe róngen asór fäniten ewe SAMOL ämi we Kot ren faaw resap falafal. Iwe, öüpwe ääni ekkewe asóren kek ngeni ewe SAMOL ämi we Kot wón ei róngen asór. 7Öüpwe pwal ääni ekkewe asóren kinamwe wón ewe róóng. Iwe, öüpwe kametip me ikenan fän pwapwa me fän mesen ewe SAMOL ämi we Kot. 8Iwe, öüpwe affataöchüw le makketiw wón ekkewe faaw mi ommotow ren pweech kapasen ei öllük meinisin.”

9Mwirin, Moses me ekkewe souasór, iir chón ewe einangen Levi, ra kapas ngeni ekkewe aramasen Israel meinisin o apasa, “Öüpwe mósónósón o öüseling, ämi chón Israel. Ikenäi, ämi öüwa wiliti ew mwiichen aramas nöün ewe SAMOL ämi we Kot. 10Iei minne, öüpwe älleasochisi ewe SAMOL ämi we Kot ren ämi öüpwe öpwönüwetä ekkeei öllük me pwüüng meinisin ngang üwa ngeni kemi ikenäi.”

Ekkewe kapasen önümamaw seni wón ewe Chuuk Ebal

11Iwe, lón ewe chök pwal ränin, Moses a ngeni ekkewe aramas ei öllük o apasa,

12Lupwen öüpwe pwereló epeek ewe chaanpwuupwu Jordan, ekkewe einangen Simeon, Levi, Judah, Issakar, Josef me Benjamin repwe üütä wón ewe Chuuk Kerizim pwe repwe arongawu ew kapasen feiöch ngeni ekkewe aramas. 13Nge ekkewe einangen Reuben, Kad, Asher, Zebulun, Dan, me Naftali repwe üütä wón ewe Chuuk Ebal pwe repwe arongawu ew kapasen önümamaw.

14Iwe, ekkewe chón ewe einangen Levi repwe leüommóng le kökkö ngeni ekkewe aramasen Israel meinisin o apasa,

15“A önümamaw emön aramas epwe faleei och uluulun önümwäl seni mwüüch ika eteli och uluulun önümwäl seni mächä o fel ngeni lemwónómwón. Pün ekkeei uluulun önümwäl förien ekkana chón silelap angangen wón paaw, ikeei ekkóch mettóch mi enniopwut meren ewe SAMOL.”

Iwe, ekkewe aramas meinisin repwe
pölüweni o apasa, “Amen!”

16Iwe, ekkewe chón Levi repwe pwal apasa, “A önümamaw emön aramas esap meniniti saman ika inan.”

Iwe, ekkewe aramas meinisin repwe
pölüweni o apasa, “Amen!”

17Ekkewe chón Levi repwe apasa, “A önümamaw emön aramas mi sooläni fönü seni emön chón órun ren an ömwökütü esissilen kiään fönüwan.”

Iwe, ekkewe aramas meinisin repwe
pölüweni o apasa, “Amen!”

18Ekkewe chón Levi repwe apasa, “A önümamaw emön aramas mi emmweni emön aramas mi mesechuun pwe epwe tókkóló seni ewe aal.”

Iwe, ekkewe aramas meinisin repwe
pölüweni o apasa, “Amen!”

19Ekkewe chón Levi repwe apasa, “A önümamaw emön aramas esap ääni wenechchar ngeni ekkewe chón ekis, ekkewe mi määsen me ekkewe fefin mi määseniir pwülüweer.”

Iwe, ekkewe aramas meinisin repwe
pölüweni o apasa, “Amen!”

20Ekkewe chón Levi repwe apasa, “A önümamaw emön aramas a lisowu ngeni pwülüwen saman, pün a turunufasei saman.”

Iwe, ekkewe aramas meinisin repwe
pölüweni o apasa, “Amen!”

21Ekkewe chón Levi repwe apasa, “A önümamaw emön aramas a lisowu ngeni ese lifilifil meet sókkun maan.”

Iwe, ekkewe aramas meinisin repwe
pölüweni o apasa, “Amen!”

22Ekkewe chón Levi repwe apasa, “A önümamaw emön mwän a lisowu ngeni fefinan, ese lifilifil ika nöün saman me wón emön ika nöün inan me wón emön.”

Iwe, ekkewe aramas meinisin repwe
pölüweni o apasa, “Amen!”

23Ekkewe chón Levi repwe apasa, “A önümamaw emön mwän a lisowu ngeni inen pwülüwan.”

“Iwe, ekkewe aramas meinisin repwe
pölüweni o apasa, “Amen!”

24Ekkewe chón Levi repwe apasa, “A önümamaw emön aramas mi niieló pwal emön aramas lemwónómwón.”

“Iwe, ekkewe aramas meinisin repwe
pölüweni o apasa, “Amen!”

25Ekkewe chón Levi repwe apasa, “A önümamaw emön aramas mi etiwa liffangen emichimich pwe epwe niieló emön aramas esap wor an tipis.”

“Iwe, ekkewe aramas meinisin repwe
pölüweni o apasa, “Amen!”

26Ekkewe chón Levi repwe apasa, “A önümamaw emön aramas esap önüküchchara pwüngün ekkewe mettóch meinisin mi makketiw lón kapasen ei öllük ren an epwe älleasochisiir.”

Iwe, ekkewe aramas meinisin repwe
pölüweni o apasa, “Amen!”

Feiöchün älleasochis

28Iwe, are öüpwe unusen älleasochisi ewe SAMOL ämi we Kot, ren ämi öüpwe tümwünüfichi le öpwönüwetä an kewe öllük meinisin ngang üwa ngeni kemi ikenäi, iwe, ewe SAMOL ämi we Kot epwe etekiakemiitä asen chón ekkewe mwüü meinisin wón fönüfan. 2Are öüpwe älleasochisi ewe SAMOL ämi we Kot, iwe, ekkeei feiöch meinisin repwe feittiw wóómi o attapwa kemi:

3I epwe efeiöchü kemi me lón ämi kewe telinimw pwal me lón ämi kewe mälämäl.

4I epwe efeiöchü kemi o fang ngeni kemi chómmóng nöümi. I epwe efeiöchü fönüwemi o fang ngeni kemi uwään fótäämi mi mwirinnö.

5Iwe, epwe efeiöchü ämi kewe chüük pwe repwe uroló ren föün irä pwal ämi kewe sepien öüwööw pwe repwe uroló ren pilawa.

6I epwe efeiöchü kemi ekis meinisin ia öüpwe feilló ie, lupwen öüpwe wareto pwal lupwen öüpwe feilló.

7Ewe SAMOL epwe älisi kemi pwe öüpwe okkufu ekkewe chón opwutakemi lupwen repwe maun ngeni kemi. Chón opwutemi kana repwe feitto wón efóch aal pwe repwe maun ngeni kemi, nge repwe süü seni kemi wón füüfóch aal.

8Ewe SAMOL epwe efeiöchü mettóch meinisin öüpwe föri o epwe ouraló ämi kewe imwen iseis ren föün wiit. Ewe SAMOL ämi we Kot epwe efeiöchü kemi me lón ewe fönü i epwe ngeni kemi.

9Are öüpwe älleasochisi ekkewe öllük än ewe SAMOL ämi we Kot o fätäl lón an kewe aal, ewe SAMOL epwe öüükemiitä pwe öüpwe nöün aramas mi pin, usun i a fen pwon fän ökköpöl pwe epwe föri. 10Mwirin, chón ekkewe mwüün fönüfan meinisin repwe küna pwe ämi ew mwiichen aramas öüwa kkö meren ewe SAMOL. Iwe, repwe nuokkusiti kemi. 11Iwe, ewe SAMOL epwe fang ngeni kemi chómmóng mettóch mi mwirinnö me lón ewe fönü i a pwon fän ökköpöl pwe epwe ngeni ämi kewe leewo - chómmóng nöümi, chómmóng nöümi pwiin maan me chómmóng uwään fótäämi irä.

12Ewe SAMOL epwe tiinato üüt wón fönüwemi lón fansoun mi weneiti seni an leenien iseis mi mwirinnö lón läng, pwe epwe efeiöchü ekkewe angang meinisin öüpwe föri. Chómmóng mwüü repwe liwinimmang ngeni kemi, nge ämi öüsap fókkun liwinimmang seniir. 13Are öüpwe öüseling ngeni ekkeei öllük än ewe SAMOL ämi we Kot o tümwünüfichi le älleasochis ngeniir, ewe SAMOL epwe föri pwe ämi öüpwe ewe mökür, nge öüsap ewe ükün. Iwe, öüpwe chök nónnóm asan nge öüsap nóm fän. 14Öüsap fókkun kul seni ew me leiin ekkeei öllük ngang üwa ngeni kemi ikenäi ren ämi öüpwe tapweló mwirin pwal ekkóch kot o fel ngeniir.

Önümamawen älleasolap

15Nge are öüsap mochen öüseling ngeni ewe SAMOL ämi we Kot o öüsap älleasochiisi an kewe öllük me pwüüng meinisin ngang üwa ngeni kemi ikenäi, ekkeei önümamaw meinisin repwe fis ngeni kemi o repwe attapwa kemi:

16Ewe SAMOL epwe önümamawa kemi me lón ämi kewe telinimw pwal me lón ämi kewe mälämäl.

17I epwe önümamawa kemi pwe ämi kewe chükün uwään föün irä repwe pöön pwal ämi kewe sepien öüwööw pilawa repwe pöön.

18I epwe önümamawa kemi pwe esap wor chómmóng nöümi semiriit. I epwe önümamawa fönüwemi pwe esap wor uwään fótäämi mi mwirinnö. I epwe önümamawa nöümi kewe pwiin maan pwe esap wor chómmóng nöüür. I epwe önümamawa nöümi kewe appanen kowu me appanen siip.

19I epwe önümamawa kemi ekis meinisin ia öüpwe feilló ie, lupwen öüpwe wareto pwal lupwen öüpwe feilló.

20Pwisin ewe SAMOL epwe tiinato wóómi ekkewe önümamaw, fitikoko, me köpwüngün emiriit lón meinisin minne öüpwe föri tori öüpwe mwittir rosoló o määfeiengaw, pwokiten ämi föri föfför mi ngaw o likitaló Kot. 21Ewe SAMOL epwe tiinato samwaw leiimi tori esap wor emön leiimi epwe nómwetiw lón ewe fönü ämi öüpwe tolong lón pwe öüpwe fönüweni. 22Ewe SAMOL epwe efeiengawa kemi ren samwawün fiius, ren pwichikkaren inis, ren pwoo, ren wätten pwichikkar, pwal ren pwasapwas, ren pwichikkar, ren mooi me mesenipik. Ekkeei feiengaw repwe chök tattapwei kemi tori öüpwe rosoló. 23Iwe, fän läng mi nóm peekitä epwe usun piraas, nge ewe pwül mi nóm faami epwe pöchökkül usun mächä. 24Ewe SAMOL epwe ewili ewe üüt ngeni pwül mworomwor me süüsü epwe püngütiw wón fönüwemi. Epwe püngütiw wóómi seni läng tori öüpwe rosoló.

25Ewe SAMOL epwe föri pwe ämi öüpwe kuf ren ekkewe chón opwuta kemi. Öüpwe feilló wón efóch aal pwe öüpwe maun ngeni chón opwutemi, nge öüpwe sü me mweer wón füüfóch aal. Iwe, ämi öüpwe wiliti och mettóchun eniweniw ngeni ekkewe mwüün fönüfan meinisin. 26Soomämi repwe fisitiw pwe ochään ekkewe maansüüsün fän läng me ekkewe maanmwachon fönüfan. Iwe, esap wor emön epwe eniwokkusur pwe repwe süüló. 27Ewe SAMOL epwe efeiengawa kemi ren loo usun a fis me lón Egypt pwal ren pwoon lón inis, ren kilingaw me ren pwerik, ämi öüsap tongeni chikar seni. 28Ewe SAMOL epwe efeiengawa kemi ren ämi öüpwe sakkoumwes, me mesechuun me tiperukoruk. 29Iwe, öüpwe attapfeil leólówas, usun emön aramas mi mesechuun a attapfeil lón rochopwaak. Öüsap feffeitä lón meinisin minne öüpwe föri. Aramas repwe chök sópweeló le eriäfföwü kemi o angei seni kemi pisekimi, nge esap wor emön epwe chimanü kemi.

30Kopwe kófót ngeni emön fefin, nge pwal emön mwän epwe kóón ren neminnewe. Kopwe öüüwetä ew imw, nge kosap nóm lón. Kopwe fótuki ew tännipin irän wain, nge kosap kinii uwaan pwe kopwe ocheei. 31Emön epwe niieló noum ätemwänin kowu me mwen mesom, nge en kosap ocheei och fitukan seni. Emön epwe angei senuk noum dongki fän pöchökkül me mwen mesom, nge esap eliwinsäfäli ngenuk. Emön epwe angei noum siip o ngeni ekkewe chón opwutok, nge esap wor emön epwe älisuk. 32Kopwe nennengeni än emön epwe angei noum mwän me noum fefin pwe epwe nöüniir amanaw. Mesom repwe weires ren óm ösüküsükür pwe kopwe küneer pwal ren óm pwositiir iteiten rän, nge esap wor och minne kopwe föri. 33Chón ew mwüü en kosap sissilei me mwan repwe angealó uwään irän fönüwom en ka weires le angang fänitan. Iwe, aramas repwe chök sópweló le eriäfföuk o turunufasek. 34Iwe, kopwe umwesiló pwokiten ekkewe feiengaw meinisin mesom repwe küna repwe fis pwellin ünükküm. 35Ewe SAMOL epwe öpwünguk ren loo mi emmetek resap tongeni móóló. Ekkeei loo repwe pwüküwu wón pwäsukum me wón pecheemw. Inisum epwe kuuló ren mmach, seni fän pachapachom tori wón mökürom.

36Ewe SAMOL epwe ösüükemiiló me ewe king ämi öüwa seikätä wóómi ngeni ew mwüü, ämi me ämi kewe leewo öüsap sissilei me mwan. Mwirin, lupwen öüpwe nóm lón ewe leeni ia öüpwe ooló ie, öüpwe fel ngeni ekkewe kot mi för seni mwüüch me faaw. 37Iwe, chón ekkewe mwüü meinisin ia ewe SAMOL epwe ösüükemiiló ie repwe määirü ren ekkewe feiengaw ra fis ngeni kemi. Ekkewe aramas repwe takiri kemi o apasa kapas mi ngaw usumi.

38Öüpwe uweawu chómmóng föün irää lón ämi kewe tännipi pwe öüpwe fótukiir, nge epwe chök chóókükkün minne öüpwe kinii, pün ekkewe liffichimas repwe chök enaló minne öüpwe fótuki. 39Öüpwe fótuki ämi kewe tännipiin irän wain o tümwünür, nge öüsap ünümi och wain seniir ika ocheei ekkewe kreip, pün ekkewe muun repwe enaló ekkewe irän wain. 40Öüpwe ämääri irän olif leemelen fönüwemi, nge öüsap epiti kemi ewe noppwuk seni, pün ekkewe föün olif repwe chök mworotiw me mwen ar repwe maaw. 41Epwe wor nöümi mwän me nöümi fefin, nge resap nóm reemi, pün iir repwe ooló. 42Ekkewe pwiin liffichimas repwe enaló ämi kewe irä meinisin me üwään fótäämi irä.

43Ekkewe chón ekis mi nóm leiimi repwe pöppöchöküleló, nge ämi öüpwe akkapwangapwangeló. 44Ämi öüpwe liwinimmang ngeniir, nge iir resap liwinimmang seni kemi. Iir repwe ewe mökür, nge ämi öüpwe ewe ükün - iir repwe chón emmwen nge ämi öüpwe chón tapweto!

45Are öüsap mochen öüseling ngeni ewe SAMOL ämi we Kot o älleasochisi an kewe öllük me pwüüng i a ngeni kemi, ekkeei önümamaw repwe tapweri kemi o tikeri kemi tori ämi öüpwe rosoló. 46Ekkeei önümamaw repwe fis pwe och esissil ika minen fön me leiimi me mwirimwirimi kana tori feilfeilló chök. 47“Pwokiten ämi öüsap angang ngeni ewe SAMOL ämi we Kot fän chengel me pwapwan letipemi ren chómmóngun ekkewe feiöch ämi öüwa angei, 48iei minne, ämi öüpwe angang ngeni ekkewe chón opwuta kemi, iir ekkewe ewe SAMOL epwe tiinireto pwe repwe üüngeni kemi. Öüpwe nóm lón ämi echik, kaaka, seleló me osupwangen mettóch meinisin. Usun chök nge i epwe ämwärätä wón üwemi efóch öüwafar seni mächä ren an epwe nöünöü ekkewe chón opwuta kemi le eriäfföwü kemi tori i epwe arosakemiiló.

49Ewe SAMOL epwe awarato ew mwüü seni toowaw pwe epwe üüngeni kemi, ew mwüü seni lesópwun fönüfan epwe ässitiw wóómi usun emön ikel. Iei ew mwüü ämi öüsap weweiti ar kapas, 50ew mwüü mi arochongaw aramasan o resap sile tong. Resap meniniti chinlap resap pwal tongei kükkün semiriit. 51Sounfiun ei mwüü repwe ocheei nöümi kewe pwiin maan o eni üwään fótäämi irä nge ämi öüpwe mäló ren ämi echik. Resap likitätiw fänitemi föün wiit, wain mi fö, apüra seni föün olif, appanen kowu ika appanen siip. Repwe angei seni kemi mettóch meinisin tori repwe arosakemiiló. 52“Repwe pwellieló ämi kewe telinimw fän ar pisekin maun, tori repwe ataetiw ämi kewe tiit mi tekia o pöchökkül, ikkeei ekkewe tiit ämi öüwa epilükülükür pwe repwe eppeti seni kemi feiengaw. Repwe maun ngeni ämi kewe telinimw meinisin lón ewe fönü ewe SAMOL ämi we Kot a ngeni kemi.

53Chón opwutemi kana repwe pwellieló ämi kewe telinimw fän ar pisekin maun o öüpwe fókkun riäfföü. Resap mwüüt ngeni kemi pwe öüpwe küüt enemi mwöngö, iwe, öüpwe fókkun echik. Iwe, öüpwe le pwisin ocheei fituken nöümi kewe äät me nöümi kewe nengngin, iir ekkewe ewe SAMOL ämi we Kot epwe ngeni kemi. 54Emön mwän mi tipepweteete me fókkun mósónósón me leiimi epwe kirikiringaw ngeni pwiin, ngeni pwisin pwülüwan pwal ngeni nöün kana mi chüen manaw. 55Esap mochen ngeni emön me leiir och seni fituken nöün kewe i a ocheei, pwokiten esap chüen wor pwal och mettóch öüpwe tongeni eni lón ótun än ekkewe chón opwuta kemi repwe pwellieló ämi kewe telinimw fän pisekin maun. Ekkeei riäfföü repwe fis ngeni kemi me lón ämi kewe telinimw meinisin. 56Emön fefin mi apwattüchik o eiipö me leiimi, i ewe sókkun fefin esap mwo nge mwenin an epwe eipwäätiw fän pachapachan wón pwül pwokiten i emön mi fón me eiipö, epwe kirikiringaw ngeni pwülüwan we i mi tongei pwal ngeni pwisin nöün äät ika nengngin. 57Pün neminnewe epwe aopa seniir ewe chienen mönükól mi toowu seni an we leenien mönükól me nöün we a chök kärään nöünätiw, pwe i chök wón an epwe ocheer lemwónómwón. Esap wor pwal och mettóch neminnewe epwe eni fäniten wätten ewe osupwang ren än ekkewe chón opwuta kemi repwe pwellieló ämi kewe telinimw fän pisekin maun. Repwe eriäföwü kemi lón ämi kewe telinimw meinisin.

58Are öüsap mochen älleasochisi meinisin kapasen ei öllük mi makketiw lón ei pwuk, pwal are öüsap meniniti ewe iit mi ling o eniwokkus, iten ewe SAMOL ämi we Kot, 59mwirin, ewe SAMOL epwe awarato wóómi me wón mwirimwirimi kana ekkóch mätter. Ekkeei määlap repwe fókkun selüküló öüküükün pöchökküler o esap ätittin metekiir. Repwe föri pwe öüpwe riäfföü o samwaw. 60Iwe, pwal och. I epwe awarato wóómi ekkewe samwawün Egypt meinisin ämi öüwa fókkun nuokkusitiir. Iwe, repwe üri kemi. 61Ewe SAMOL epwe pwal awarato wóómi iteiten samwaw me iteiten määlap, pwal mwo nge ekkewe esap makketiw usur lón ei pwuken öllük, tori ämi öüpwe rosoló. 62Inamwo are öüwa usun chómmóngün ekkewe füün läng, nge ekkóch chök mi chókükkün me leiimi repwe manaw, pwokiten öüsap öüseling ngeni ewe SAMOL ämi we Kot. 63Usun chök än ewe SAMOL a pwapwaiti an epwe älisi kemi pwe öüpwe feffeitä o chómmóngóló, iwe, epwe ina usun än ewe SAMOL epwe pwapwaiti an epwe efeiengawa kemi tori öüpwe rosoló seni ewe fönü ämi öüpwe le tolong lón pwe öüpwe fönüweni.

64Pün ewe SAMOL epwe atoropassafeili kemi leiin aramasen ekkewe mwüü seni esóp fönüfan tori pwal esóp. Iwe, me ikenan ämi öüpwe fel ngeni ekkewe koten ekis mi för seni mwüüch me faaw ämi me ämi kewe leewo öüsap sissiler me mwan. 65Me ikenan leiin chón ekkewe mwüü, öüsap küna ew ämi leenien asöösö me kinamwe. Nge me ikenan, ewe SAMOL epwe föri pwe lelukemi repwe nuokkus, mesemi repwe chuunoló pwal manawemi repwe riäfföü. 66Manawemi epwe chök nómwun öüchchüng, öüpwe chök uren nuokkus lerän me lepwin, o esap wor popun ämi öüpwe apilükülükü pwe öüpwe manaw lón ewe sorotän rän mwirin. 67Lesossor öüpwe apasa, ‘Amwo itä a fen pwin!’ Nge lekkuniól öüpwe apasa, ‘Amwo itä a fen lesossor!’ Öüpwe apasa ei sókkun, pwokiten ewe nuokkus epwe eniwokkusu letipemi pwal pwokiten minne mesemi repwe küna pwellin ünükkümi. 68“Mwirin, ewe SAMOL epwe tiinsäfälikemiiló ngeni Egypt wón ekkóch siip, iei ew sääi ngang üwa fen pwon ngeni kemi pwe öüsap fókkun chüen ääni pün öüsap küna säfäli ewe fönü Egypt. Iwe, me ikenan, öüpwe pwisin amöömöló inisimi ngeni ekkewe chón opwuta kemi pwe repwe nöüni kemi amanaw mwän me fefin, nge esap wor emön epwe mochen mööni kemi.

Kapasen ewe pwon a enliwinsäfäl me lón Moab

29 Ikkeei kapasen ewe pwon ewe SAMOL a öllük ngeni Moses pwe epwe ääni ngeni ekkewe aramasen Israel me lón ewe fönü Moab kapach ngeni ewe pwon i a fen ääni ngeniir me lón Horeb, iei ewe Chuuk Sinai.

2Iwe, iei Moses a köörifengeni ekkewe chón Israel meinisin o a apasa ngeniir:

Ämi öüwa fen küna ren pwisin mesemi ekkewe mettóch meinisin ewe SAMOL a föri me lón Egypt ngeni Farao me nöün kewe chón angang meinisin me unusen fönüwan. 3Öüwa küna ren pwisin mesemi ekkewe riäfföü mi lapalaap i a föri ngeniir, ekkewe esissil me ekkewe manaman mi lapalaap i a föri. 4Nge tori ikenäi, ewe SAMOL esap mwo ngeni kemi ew letip mi tongeni wewe me maas mi tongeni küna me seling mi tongeni rongorong. 5Iei mwo nge ewe SAMOL a apasa, “Lón üküükün fääik ier, ngang üwa emmweni kemi lón ewe fönüpöön, nge üfemi resap kamwóló me wóón inisimi, pwal ipwemi sandal resap kamwóló seni wón pachapachemi. 6Esap wor enemi pilawa ika ünümemi wain ika pwal och sókkun minen wün mi pöchökkül, nge ngang üwa föri ei ngeni kemi pwe öüpwe silei pwe ngang ewe SAMOL ämi we Kot.”

7Iwe, lupwen sia tori ei leeni, King Sihon seni Heshbon me King Ok seni Bashan ra feitto pwe repwe maun ngeni kich, nge kich sia okkufur. 8Sia angei fönüwer o ngeni chón ekkewe einangen Reuben me Kad me ewe esóp einangen Manassa pwe inetiir.

9Iei minne, öüpwe älleasochisi kapasen ei pwon pwe öüpwe tongeni feffeitä lón iteiten mettóch meinisin öüpwe föri. 10Ämi meinisin - nöümi kewe souemmwenin einang, nöümi kewe souköpwüng, nöümi kewe nöüwiis me ämi ekkewe re Israel meinisin - öüwa üütä ikenäi fän mesen ewe SAMOL ämi we Kot. 11Öüwa üütä fiti nöümi kewe kükkün me pwülüwemi kewe pwal ekkewe chón ekis mi nónnóm leiimi, iir ekkewe chón pöküpök ämi mwüüch me ekkewe chón üfüüf ünümemi kólik. 12Ikenäi ämi meinisin öüwa üütä ikeei pwe öüpwe atolonga kemi lón ew pwonen etipeew ngeni ewe SAMOL ämi we Kot. Ewe SAMOL a föri ei pwonen etipeew ngeni kemi ikenäi, nge i a ölüküchchara ren ew ökköpöl. 13Ren ei pwon, i a mochen epwe ölüküchchara pwe ämi nöün aramas o ölüküchchara pwe i ämi Kot, usun chök minne i a fen pwon ngeni kemi, pwal usun chök minne i a fen pwon fän ökköpöl ngeni ämi kewe leewo, Abraham, Isaak me Jakob. 14Nge ewe SAMOL a föri ei pwon sap ngeni kemi chök. 15Ewe SAMOL ach we Kot a föri ei pwon pwal ngeni kemi ämi kana mi üütä reech ikeei fän mesan me pwal ngeni ekkana pilóón aramasen Israel meinisin lón ekkaan fansoun mwach.

16Enletin, ämi mi chechchemeni usun nónnómwuch me lón ewe fönü Egypt pwal usun ach sia sääi lón fönüwen ekkewe chón opwuta kich lupwen sia toowu seni Egypt. 17Ämi öüwa küna nöüür kewe uluulun önümwäl mi enniopwut ra för seni mwüüch, faaw, silifer me kolt. 18Ewe SAMOL a föri ei pwon ngeni kemi pwe esap wor emön mwän, fefin, famili ika einang me leiimi epwe kul seni ewe SAMOL ach we Kot pwe epwe fel ngeni ekkeei koten ekkewe ekkóch mwüü, pwe esap wor emön me leiimi epwe usun efóch waaren irä epwe pwükütä o epwe uwääni uwa mi maras me poison.

19Esap wor emön me leiin chókana mi rongorong ekkeei kapasen esilesilen feiengaw fäniten önümamaw epwe apasa pwe i a tiwewu. Esap fen ekieki, “Ngang üwa feiöch, esap wor och epwe fis ngeniei, inamwo ika üpwe chök öüücho o sópweló le föri meet mochenin letpei.” Iir repwe awarato feiengaw wón ewe fönü mi nüküchöchchön pwal usun chök wón ewe fönü mi pwasapwas. 20Ewe SAMOL esap mochen epwe omwusaló tipisin ei sókkun aramas. Pün an soong me an luukommóng epwe keniireló. Iwe, iteiten ekkewe önümamaw meinisin mi mak lón ei pwuk repwe püngütiw wóór. Iwe, ewe SAMOL epwe amóóiló iter seni fän läng. 21Iwe, ewe SAMOL epwe äimwüüreló seni leiin chón ekkewe einangen Israel meinisin pwe epwe niinätiw wóór ekkewe önümamaw meinisin mi nóm lón ewe pwon ra mak lón ei Pwuken Öllük.

22Epwe iei usun pwe lupwen nöümi kewe repwe tapweto mwirimi lón ekkewe pilóón aramas me mwirin me nöün ekkewe chón ekis mi feitto seni fönü toowaw repwe küna taalón ewe fönü me ekkewe samwaw ewe SAMOL epwe tiinato wón. 23Repwe küna pwe pwülün a wiliti kaiakü me salt. Esap wor och mettóch epwe tongeni ffót wón, esap pwal wor och epwe tongeni pwük wón, esap pwal wor och fetil epwe tongeni määr ikenan. Epwe usun chök Sodom me Komorra, Admah me Zeboiim ewe SAMOL a ataareló lón an soong me an lingeringer. 24Iwe, chón ekkewe mwüü meinisin mi nóm pwellin ünükkün repwe eiis, “Pwata ewe SAMOL a föri ei sókkun ngeni ei fönü? Meet popun a koon iei usun pwichikkaren an soong mi lapalaap?”

25Mwirin, aramas repwe üreniir: “A fis ei pwokiten ekkewe aramasen ewe fönü ra likitaló ewe pwon än ewe SAMOL än ar kewe leewo we Kot, ewe pwon i a ääni ngeniir lupwen i a emmwenirewu seni ewe fönü Egypt. 26Pün iir ra kul o fel ngeni pwal ekkóch kot o chappetiw ngeniir, ekkóch kot iir resap sissiler me mwan, ewe SAMOL esap filiretä fäniter. 27Iei popun än ewe SAMOL soong a ngeteri ei fönü, pwe epwe awarato wón ekkewe önümamaw meinisin mi makketiw lón ei pwuk. 28Iwe, ewe SAMOL a wiietä nöün kewe aramas seni fönüwer lón an soong, lón an lingeringer, pwal lón an chou mi lapalaap o ösüüreló pwe repwe ooló lón pwal ew fönü, ia ra chüen nónnóm ie ikenäi.”

29Ekkewe mettóch mi mwónómwón, än ewe SAMOL ach we Kot, nge ekkana mettóch ra pwääló, ach me än mwirimwirich kana tori feilfeilló chök, pwe sipwe älleasochisi ekkeei kapasen ei öllük.

Feiöchün liwinsäfäl ngeni Kot

30 Iwe, lupwen ekkeei mettóch meinisin ngang üwa kapas usun repwe fis ngeni kemi - ekkeei feiöch me ekkeei önümamaw üwa isettiw mwemi - o ämi öüpwe chechchemeni usur me leiin chón ekkewe mwüü ia ewe SAMOL ämi we Kot epwe ösüükemiiló ie, 2o ämi me nöümi kana öüpwe kulsäfäl ngeni ewe SAMOL ämi we Kot o älleasochisi mwelian ren unusen lelukemi me unusen ngünümi, lón meinisin minne ngang üwa öllük ngeni kemi ikenäi, 3mwirin, ewe SAMOL ämi we Kot epwe eliwinsäfäli kemi seni ämi ooló. I epwe ääni tong ngeni kemi o epwe rusisäfälikemiito seni ekkewe mwüü meinisin ia i a atoropassakemiiló ie. 4Are mwo öüwa nóm lesópwun fönüfan, ewe SAMOL ämi we Kot epwe feilló o kütta kemi o emmwenisäfälikemiito. 5I epwe eliwini kemi ngeni ewe fönü fönüwen ämi kewe leewo. Iwe, öüpwe fönüwenisäfäli ewe fönü. Mwirin, i epwe föri pwe epwe lapaló ämi feffeitä o öüpwe chómmóngóló lap seni ämi kewe leewo. 6Iwe, ewe SAMOL ämi we Kot epwe limeti lelukemi me leluken mwirimwirimi kewe meinisin, pwe öüpwe echeni i ren unusen lelukemi o ren unusen ngünümi, iwe, öüpwe tongeni manaw. 7Ewe SAMOL ämi we Kot epwe öpüngätiw ekkeei önümamaw meinisin wón ekkewe chón opwuta kemi me chón eriäfföwü kemi. 8Mwirin, ämi öüpwe älleasochisi säfäli ewe SAMOL o tümwünü an kewe öllük meinisin ngang üwa ngeni kemi ikenäi. 9Iwe, ewe SAMOL ämi we Kot epwe föri pwe öüpwe feffeitä lón iteiten ekkewe mettóch öüpwe föri. I epwe efeiöchü kemi pwe epwe wor chómmóng nöümi semiriit me chómmóng nöümi pwiin maan, epwe pwal wor chómmóng minne öüpwe kinii seni ämi kewe tännipi, pün ewe SAMOL epwe pwapwaiti an epwe föri minne mi mwirinnö fänitemi, usun an a pwapwaiti le föri minne mi mwirinnö fäniten ämi kewe leewo. 10Ewe SAMOL ämi we Kot epwe pwapwaiti kemi, are öüpwe älleasochisi mwelian o tümwünü an kewe öllük me pwüüng mi makketiw lón ei Pwuken Öllük, pwal are öüpwe kul ngeni ewe SAMOL ämi we Kot ren unusen lelukemi me unusen ngünümi.

Filätä manaw ika mäló

11Pün ei öllük ngang üwa ngeni kemi ikenäi esap koon weires ngeni kemi ämi öüpwe weweiti ika föri. 12Esap nóm lón läng pwe öüpwe apasa, ‘Iö epwe feittä lón läng fänitach pwe epwe uweätiw ei öllük reech, pwe sipwe tongeni rongorong o älleasochisi?’ 13Esap pwal nóm peekilón ewe mataw pwe öüpwe apasa, ‘Iö epwe sääiló wón ewe mataw fänitach pwe epwe uweato ewe öllük reech pwe sipwe tongeni rongorong o älleasochisi?’ 14Nge ewe kapas a fókkun kkan ngeni kemi. A nóm wón tinnawemi me lón lelukemi, ina minne öüwa tongeni älleasochisi.

15Öüpwe öüseling! Ikenäi ngang üwa isenätiw mwemi manaw me feiöch, maló me feiengaw. 16Are öüpwe älleasochisi ekkewe öllük än ewe SAMOL ämi we Kot, ngang üwa öllük ngeni kemi ikenäi, ren ämi echeni ewe SAMOL ämi we Kot, ren ämi fätäl lón an kewe aal o ren ämi öpwönüwetä an kewe öllük me an kewe pwüüng me an kewe kapasen öüröür, mwirin öüpwe manaw o chómmóngóló. Iwe, ewe SAMOL ämi we Kot epwe efeiöchü kemi me lón ewe fönü öüpwe le tolong lón pwe öüpwe fönüweni.

17Nge are lelukemi epwe tókkóló o öüsap mochen öüseling, pwal are öüpwe rikiló pwe öüpwe fel ngeni pwal ekkóch kot o angang ngeniir, 18mwirin, ngang üpwe esile ngeni kemi ikenäi pwe öüpwe fókkun määfeiengaw. Öüsap manaweni ew manaw mi langattam o mwirinnö me lón ewe fönü öüpwe le pwereló epeek ewe chaanpwuupwu Jordan pwe öüpwe tolong lón o fönüweni.

19Ikenäi, ngang üwa kööri läng me fönüfan pwe repwe chón pwärätä fänitemi pwe ngang üwa isettiw mwemi manaw me mäló, feiöch me önümamaw. Iei minne, öüpwe filätä manaw, pwe ämi me nöümi kana öüpwe manaw, 20pwe öüpwe echeni ewe SAMOL ämi we Kot, öüpwe älleasochisi mwelian o kömwöchünnük wón, pün ewe SAMOL i ämi manaw. Mwirin, öüpwe manawattam me lón ewe fönü ewe SAMOL a pwon fän ökköpöl pwe epwe ngeni ämi kewe leewo Abraham, Isaak me Jakob.”

Joshua ewe souemmwenin Israel mi fö

31Mwirin, Moses a sópweló le apasa ekkeei kapas ngeni ekkewe aramasen Israel meinisin. 2A apasa ngeniir, “Iei ngang üwa ipwükü rüwe ieri. Ngang üsap chüen tongeni äi üpwe emmweni kemi. Ewe SAMOL a apasa ngeniei pwe ngang üsap pwereló peekilón ei chaanpwuupwu Jordan. 3Pwisin ewe SAMOL ämi we Kot epwe akkomw mwemi le pwereló peekiló. I epwe arosaló chón ekkewe mwüü mi nónnóm ikenan o ämi öüpwe fönüweni seniir fönüwer. Joshua epwe le nöümi souakkomw mi fö, i epwe fiti kemi le feilló, usun chök ewe SAMOL a fen pwon. 4Iwe, ewe SAMOL epwe arosaló chón ekkewe mwüü mi nónnóm lón ewe fönü usun chök an a niieló Sihon me Ok, nöün ekkewe chón Amor kewe king. 5Ewe SAMOL epwe atolonga lepöümi ekkewe aramas mi nónnóm ikenan, nge ämi öüpwe föri ngeniir usun chök minne ngang üwa öllük ngeni kemi. 6Öüpwe pöchökkül o tipepwora! Öüsap rüükö öüsap pwal nuokkusiti ekkewe aramas, pün ewe SAMOL ämi we Kot epwe akkomw mwemi. I esap tümwününgaw ngeni kemi, esap pwal likitikemiiló.”

7Mwirin, Moses a köörato Joshua o a apasa ngeni i me mwen ekkewe aramasen Israel meinisin, “Kopwe pöchökkül o tipepwora, pün en kopwe emmwenalong ei mwiichen aramas lón ewe fönü ewe SAMOL a pwon fän ökköpöl pwe epwe ngeni ar kewe leewo. En ewe emön kopwe älisiir pwe repwe liäpeni ewe fönü o kopwe inetii wóór. 8Kosap nuokkus ika lólilen pün ewe SAMOL i ewe emön epwe akkomw mwom. Pwisin i epwe fituk. I esap tümwününgaw ngenuk, esap pwal likitukoló.”

Ewe öllük epwe ällea iteiten fisu ier

9Iwe, Moses a makkei ei öllük o a ngeni ekkewe souasór, iir nöün Levi kewe mwän mi wiisen mwäreei ewe pwórofel pwórun än ewe SAMOL we pwon, a pwal ngeni ekkewe souakkomwen Israel meinisin. 10Mwirin, Moses a öllük ngeniir o apasa: “Lesópwólón iteiten efisuen ier, lón ewe fansoun mi kefilitä pwe iei ierin komwusóló, lón ewe Chuulapen Imw Mangaku, 11öüpwe fókkun älleani ei öllük ngeni ekkewe aramasen Israel meinisin pwe repwe rongorong lupwen repwe mwiich fengen fän mesen ewe SAMOL ämi we Kot lón ewe leeni i epwe filätä. 12Öüpwe kööriir meinisin pwe repwe mwiich fengen - mwän, fefin, semiriit me ekkewe chón ekis mi nónnóm lón ämi kewe telinimw - pwe repwe tongeni öüseling o käeö ar repwe meniniti ewe SAMOL ämi we Kot o repwe tümwünüfichi le älleasochisi meinisin kapasen ei öllük. 13Öüpwe föri ei pwe nöür kewe resap silei ekkeei öllük repwe rongorong ngeniir o repwe käeö ar repwe meniniti ewe SAMOL ämi we Kot. Öüpwe föri ei lón üküükün langattamen ämi manaw lón ewe fönü öüpwe le pwereló lón peekilón ewe chaanpwuupwu Jordan pwe öüpwe fönüweni.”

Kapasen oosuni fäniten än chón Israel lükümmach

14Mwirin, ewe SAMOL a apasa ngeni Moses, “A tori fansoun óm kopwe le mäló. Kopwe kööri Joshua pwe öüpwe mwineló ren ewe Imwenfel mangaku. Iwe, ngang üpwe üreni Joshua me ikenan meet i epwe föri lón wiisan.” Ina minne, Moses me Joshua ra feilló ren ewe Imwenfel mangaku Leenien chufengen.

15Iwe, ewe SAMOL a pwä ngeniir lón ew üren kuchu a üütä asen asamen ewe imw mangaku mi pin. 16Iwe, ewe SAMOL a apasa ngeni Moses: “Nengeni, en kopwe le mäló o feilló chuungeni óm kewe leewo. Mwirin óm ka feilló, ekkeei aramas repwe le pwal poputä le fel ngeni ekkewe koten ekis, ekkewe koten ewe fönü ia iir repwe feilló ie. Repwe likitieiló o atai ewe pwon ngang üwa ääni ngeniir. 17Mwirin, äi soong epwe ngeteitiir. Iwe, ngang üpwe likitireló o üpwe aopaló wón mesei seniir; mwirin, repwe rosoló. Iwe, chómmóng feiengaw me osukosuk repwe feittiw wóór, ina pwata repwe apasa, ‘Ekkeei feiengaw ra püngütiw wóóch pwokiten äch we Kot esap chüen nóm lefilach!’ 18Iwe, lón ena fansoun, ngang üpwe fókkun aopaló wón mesei seniir pwokiten ekkewe tipis meinisin iir repwe föri ren ar repwe fel ngeni pwal ekkóch kot.

19“Iei minne, iei kopwe makkeetiw kapasen ei kööl o kopwe äiti ngeni ekkewe aramasen Israel ei kööl. Kopwe äiti ngeniir pwe repwe köölüw ei kööl, pün ei kööl epwe fis pwe och pisekin pwärätä epwe üüngeni ekkewe aramasen Israel fänitei. 20Pün ngang üpwe emmwenirelong lón ewe fönü ngang üwa pwon fän ökköpöl pwe üpwe ngeni ar kewe leewo, ew fönü ia a pwuupwu ie milik me chönün chunen. Iwe, me ikenan, repwe pisekisekiló. Iwe, repwe mwöngö ekkewe mwöngö meinisin iir ra mochen o repwe kitinupwuló. Mwirin, repwe poputä le fel ngeni pwal ekkóch kot o angang ngeniir. Repwe opwut ngang o atai äi we pwon. 21Mwirin, feiengaw me osukosuk mi lapalaap repwe toriir. Iwe, ei kööl epwe och pisekin pwärätä epwe üüngeniir, pün ei kööl esap möllüküló seni mwirimwirir kana. Ngang mi silei meet lapalapen ekkeei aramas me mwen äi üpwe emmwenireló pwe repwe tolong lón ewe fönü ngang üwa pwon fän ökköpöl pwe üpwe ngeniir.” 22Iei minne, lón ewe chök ränin, Moses a makkeetiw kapasen ewe kööl o a äiti ngeni ekkewe aramasen Israel ei kööl.

23Mwirin, ewe SAMOL a atolonga Joshua nöün Nun we mwän lón wiisan, a ällük ngeni o apasa, “Kopwe pöchökkül o tipepwora, pün en kopwe fókkun emmwenalong ekkewe aramasen Israel lón ewe fönü ngang üwa pwon fän ökköpöl pwe üpwe ngeniir. Ngang üpwe fituk.”

24Iwe, mwirin än Moses a wes le makkeetiw kapasen ei öllük lón ew pwuk, 25i a ngeni ekkewe chón Levi mi wiisen mwärei än ewe SAMOL we pwórun pwon ekkeei kapasen öüröür o a apasa, 26“Öüpwe angei ei Pwuken Öllük o anómwu ünükkün ewe pwórun pwon, än ewe SAMOL ämi we Kot, pün epwe nóm ikenan pwe epwe och pisekin pwärätä mi üüngeni ekkewe aramasen Israel. 27Pün ngang mi silei usun ämi lükümmach me ämi üleförea. Pün iei mwo lupwen äi ngang mi chüen manaw ngeni kemi, ämi öüwa fen lükümmach le üüngeni ewe SAMOL. Nge epwe le fen ifa me lapalón ämi lukummach me mwirin äi mäló! 28Öüpwe köörato reei meinisin ekkewe souakkomw me ekkewe meilapen ämi kewe einang pwe ngang üpwe apasa ngeniir ekkeei kapas pwe repwe rongorong. Iwe üpwe kökkööri läng me fönüfan pwe repwe chón pwärätä le üüngeniir. 29Pün ngang mi silei pwe mwirin äi mäló, ämi öüpwe fókkun föri föfför mi ngaw o öüpwe kul seni ewe aal ngang üwa öllük ngeni kemi pwe öüpwe fätäl wón. Iwe, lón ekkewe rän repwe feitto, feiengaw epwe tori kemi, pwokiten öüpwe föri pwe ewe SAMOL epwe fókkun soong ren ämi öüpwe föri meet mi ngaw me fän mesan.”

Ewe kööl än Moses

30Mwirin, Moses a apasa unusen küükün kapasen ei kööl seni lepoputän tori lesópwólón ngeni ewe mwiichen chón Israel:

32 Öüpwe öüseling ämi ekkewe läng nge ngang üpwe kapas.

En fönüfan kopwe rongorong ekkewe kapas ngang üpwe apasa.

2Äi kapasen käit epwe püngütiw wómi usun üüt, äi afalafal epwe chiichitiw wómi usun omwurenipwin. Äi kewe kapas repwe püngütiw wómi usun üüt a püngütiw wón ekkewe fetil mi pwüküfö me ekkewe irä mi fótofö.

3Ngang üpwe esilefeili iten ewe SAMOL. Oh mwareiti tekian ach we Kot.

4I ewe Achaw, an kewe föfför ra unusöch. Meinisin minne i a föri ra pwüng o wenechchar. I emön Kot mi ölükülük, esap föri och mi mwääl. I a pwüng o wenechchar.

5Iir ra föri föfför mi ngaw ngeni i. Iir resap chüen nöün Kot semiriit, pwokiten iir ra limengaw. Iir ew pilóón aramas mi otupwutup o pwór.

6Ifa usun, iei lapalapen meet öüpwe liwini ngeni ewe SAMOL, ämi aramas mi umwes me tiparoch? Ifa usun, sap i Sememi we mi föri kemi? Ifa usun, sap i ewe a föri kemi o efisikemiitä?

7Kopwe chechchemeni ekkewe fansoun lóóm, kopwe ekieki usun ekkewe chómmóng pilóón aramasen lóóm. Kopwe eisini somwom, nge i epwe pwääri ngenuk. Kopwe pwal eisini nöüm kewe souakkomw, nge iir repwe aporausa ngenuk.

8Lupwen ewe mi Unusen Tekia a ngeni chón ekkewe mwüü inetir, pwal lupwen i a äimwüfeseni aramas, i a föri kiänin lefiilen ekkewe mwiichen aramas alóngólóng wón üküükün iteiten nöün Israel kewe mwän.

9Pün ekkewe aramasen Israel ikkanaiir nöün ewe SAMOL aramas. Ekkewe mwirimwirin Jakob iir inetin Kot.

10Kot a küner me lón ew fönü mi pöön, ew leeni mi pöön, ew fönüpöön mi uren ökürang ren äsäpwääl. Kot a róngereló o mammaser. I a tümwünür usun chök nge chóchchólun lón mesan.

11Usun emön ikel a küpeti fasan pwe nöün kewe appansüüsü repwe ääs, a apowpow aser o mollotä pwe epwe älisiir, mwirin, a emeresaló pöükässin pwe epwe turufi iir lupwen ra turutiw o a uweiir wón pöükässin.

12Iei usun ewe SAMOL chök a emmweni nöün kewe aramas, nge esap wor emön koten ekis a älisiir.

13I a föri pwe ekkewe mwirimwirin Jakob repwe ssä wón war sein maun wón ekkewe leeni mi tekia. I a mwüüt ngeniir pwe repwe emeseiker le mwöngö uwään ekkewe tännipi. I a fang ngeniir chönün chunen mi pwuu seni lón achaw me apüra seni föün olif mi pwuu seni achaw mi pöchökkül.

14I a amwöngöniir pwötö seni ekkewe pwiin kowu o öünüür milik seni pwiin siip. A pwal aochoocha ngeniir ekkewe ätemwänin siip me kuuch mi fókkun kitinnup seni Bashan fiti fengen me ekkewe föün wiit mi mwirinnö. Iwe, ra wün ewe wain mi fókkun mwirinnö mi för seni chönün kreip mi par.

15Nge Jeshurun a kitinupwuló o a arochongaw. (Ekkewe aramas ra mwöngökammöt, iwe, ra möt o kitinnupwuló.) Mwirin ra likitaló ewe Kot mi föriir. Ra turunufasei ewe Achawen alen ar küna manaw.

16Ra asoonga letipen Kot pwe epwe luukommóng ren ar fel ngeni ekkewe koten ekis, ra asoonga i ren ar föri ekkewe föfför mi enniopwut.

17Ra ääni ekkewe asór ngeni ekkewe ngüün mi ngaw, ngeni ekkewe kot mi chofona. Ra asór ngeni ekkóch kot resap sissiler me mwan, ngeni ekkóch kot mi fö re kärään chök pwä, ekkóch kot ar kewe leewo resap nuokkusitiir.

18Öüwa likitaló ewe Achaw mi oupwukemiitiw, öüwa möllükaló ewe Kot mi nöüni kemi.

19Iwe, ewe SAMOL a küna ei o a opwut, pwokiten pwisin nöün kewe mwän me nöün kewe fefin ra asoonga i.

20Iwe, i a apasa: “Ngang üpwe likitireló. Ngang üpwe aopa wón mesei seniir pün üpwe pii are epwe meet sópwólór. Pün iir ew pilóón aramas mi ouucho le föri föfför mi ngaw, iir ra usun semiriit esap wor ar miriit.

21Iir ra asoonga letipei pwe üpwe luukommóng ren ar fel ngeni ekkana mettóch sap iir kot. Ra asoongaei ren ar kewe uluulun önümwäl mi umwes. Iwe iei, ngang üpwe asoonga letiper pwe repwe lólówó ren äi efeiöchüw chón ekkewe pwal ekkóch mwüü. Ngang üpwe pwal asoonga letiper ren äi efeiöchüw chón ekkewe mwüü esap wor ar miriit.

22Pün äi soong epwe nget usun ekkei, epwe nget tori ewe epilólen leenien sootup. Epwe kenaló fönüfan me ekkewe irä ra määr wón, epwe pwal keni lóngólóngun ekkewe chuuk.

23Ngang üpwe ochukuchukätä feiengaw wóór o pekki ngeniir neii kewe föün esefich.

24Ngang üpwe tiinato wóór lengita me samwaw mi pwichikkar me efeiengaw. Ngang üpwe pwal tiinato ekkewe maan mwacho me ekkewe serepenit mi poison mi tö lón pwül mworomwor pwe repwe küür.

25Sounfiu repwe niireló ren ketilas me lón ekkewe aal, nge mettóch mi eniwokkus repwe fis me lón ekkewe imw. Pün sounfiu repwe niieló nöümi kewe ölüwöl me föpwül, repwe pwal niieló ekkewe mönükól mi chüen oup me ekkewe chinlap mi üwan meeten mökürer.

26Ngang üwa ekieki usun äi üpwe arosaló ekkewe chón Israel pwe aramas repwe unusen möllükiireló.

27Nge üwa chök opwut än ekkewe chón opwuter repwe kapasen tunosikesik, pün ekkewe chón pölüweniir ina repwe fen wewengaw o ina repwe fen apasa, ‘Sap ewe SAMOL a arosaló chón Israel. Pwisin ach tüfich a ewilla kich.’ ”

28Israel ew mwüü esap wor an wewe, iir ew mwiichen aramas mi umwes esap wor ar weweöch.

29Amwo itä repwe mwiriit o repwe tongeni weweiti ei! Amwo itä repwe ekieki meet feiengaw epwe fis ngeniir lesópwólón.

30Epwe ifa usun än emön aramas epwe tongeni tapweri engöröw me leiir ika rüwömön repwe tongeni cheeló engol ngöröw? Ei epwe chök tongeni fis are ar we Achaw a fen amöömöreló, are ewe SAMOL a fen fangatäniir.

31Pün ewe achaw än ekkewe chón opwuta kich esap pöchökkül usun ach we Achaw. Ekkewe mwo chón opwuta kich nge ra silei ei.

32Pün ar we irän wain a feitto seni ewe irän wainin Sodom, a feitto seni ekkewe tännipin irän wain seni Komorrah. Ar kewe kreip ra poison, ar kewe umwun kreip ra maras.

33Ar wain a usun poisonun serepenit, usun natanaten ewe sókkun serepenit mi efeiengaw itan kopra.

34Ewe SAMOL a apasa, “Ngang üwa iseni ekkeei köpwüng lón äi leenien iseis o lókkerelong leiin äi kana pisek mi öüchchea.

35Pün ngang chök üpwe ngeni aramas chappen ar föfför. Ngang chök üpwe liwinisäfäli ngeni chókana mi fich ngeni ar repwe angei chappen ar föfför. Pachapacheer epwe mmit lón fansoun mi weneiti. Pün ränin ar feiengaw epwe war, ar köpwüng epwe mwittir toriir.”

36Pün enletin, ewe SAMOL epwe öpwüngü nöün aramas nge epwe siwili an ekiek o tongei nöün kana chón angang, lupwen i epwe küna pwe esap chüen wor ar pöchökkül o esap chüen wor emön lussun, amanaw ika chón ngas.

37Mwirin, i epwe eiis: “Ikkafaiir chök ar kewe kot, ewe achaw iir ra süüngeni pwe repwe ääni leenien op?

38“Ikkafaiir ekkana kot mi ocheei kirissin ar kewe mönün asór o ünümi ewe wain fäniten ar asóren wün? Öüpwe mwüüt ngeni ekkana kot pwe repwe feitto o älisi kemi. Öüpwe mwüüt ngeniir pwe repwe awora ngeni kemi ämi leenien op.

39“Iei öüpwe küna pwe ngang, fókkun ngang chök Kot. Esap wor emön kot me lüki. Ngang ewe emön mi niieló aramas o fang manaw ngeni aramas. Ngang ewe emön mi ekinasa aramas me amóieló kinasen aramas. Esap wor emön epwe tongeni angasawu pwal emön aramas seni äi manaman.

40“Iei, ngang üwa eitietä peii läng o pwon fän ökköpöl, Mwo manawei mi nóm tori feilfeilló chök,

41“lupwen ngang üpwe seimi neii ketilas mi meriweriw o popuetä le ääni köpwüng, ngang üpwe ngeni ekkewe chón opwutaei chappen ar föfför o liwinisäfäli ngeni chókana mi opwut ngang liwinin ar föfför.

42“Ngang üpwe föri pwe neii kewe föün esefich repwe sakaweló ren ar wün chcha, nge neii ketilas epwe ochooch fituk - ren chaan chókewe mi ninniiló me ekkewe chón ooló pwal möküren ekkewe souemmwenin chón opwutaei mi langattam meeten mökürer.”

43Öüpwe pwapwa ämi chón ekkewe mwüü fiti nöün Kot kewe aramas, pün i epwe alemööü chaan nöün kewe chón angang o epwe ngeni ekkewe chón pölüweni i chappen ar föfför. I epwe limeti fönüwan me nöün kewe aramas ren an epwe awora omwusomwusen tipis fäniter.”

44Iei minne, Moses a feitto fiti Joshua nöün Nun we mwän o a apasa meinisin kapasen ei kööl ngeni ekkewe aramas pwe repwe rongorong. 45Lupwen Moses a wes le apasa ekkeei kapas meinisin ngeni ekkewe chón Israel meinisin, 46a pwal sópweló le apasa ngeniir: “Öüpwe iseis lón lelukemi ekkewe kapas meinisin ngang üwa ngeni kemi ikenäi. Öüpwe atourer ngeni nöümi kana pwe iir repwe älleasochisi meinisin kapasen ei öllük. 47Pün ekkeei kapasen öüröür resap kapas pöön chök, pwe ikkeei manawemi. Ren ämi älleasochisi ekkeei kapas, öüpwe manawattam me lón ewe fönü ämi öüpwe le pwereló lón peekilón ewe chaanpwuupwu Jordan pwe öüpwe fönüweni.”

Kot a esile ngeni Moses usun an epwe mäló

48Lón ewe chök pwal ränin, ewe SAMOL a apasa ngeni Moses, 49“Kopwe feilló Moab ren ekkewe chuuk mi nóm öötiwen ewe chaanpwuupwu, ekkewe chukun Abarim, o feittä wón ewe Chuuk Nebo, mi nóm äwenewenen Jeriko me epeek ewe chaanpwuupwu. Iwe, kopwe nennelói ewe fönü Kanaan, ewe fönü ngang üpwe ngeni ekkewe aramasen Israel pwe repwe fönüweni. 50Mwirin, en kopwe mäló me wón ewe chuuk kopwe feittä wón o kopwe chuungeni óm kewe leewo, usun chök Aaron pwiimw we a mäló me wón ewe Chuuk Hor o a chuungeni an kewe leewo, 51pwokiten ämi me rüwömön öüwa atai ämi lükülük wóói me leiin ekkewe aramasen Israel me órun ekkewe kólikin Meribah arap ngeni Kadesh, lón ewe fönüpöönün Zin, pwal pwokiten ämi öüsap pwärätä äi pin leiin ekkewe aramasen Israel me ikenan. 52Iei minne, en kopwe chök nennengeni ewe fönü me toowaw, nge kosap tongeni feilló ikenan pwe kopwe tolong lón ewe fönü ngang üpwe ngeni ekkewe aramasen Israel.”

Ömwüchchülón än Moses a efeiöchüw ekkewe chón Israel

33 Iwe, iei ewe kapasen feiöch Moses ewe mwäneilükün Kot a efeiöchü ngeni ekkewe aramasen Israel me mwen an epwe mäló. Moses a apasa:

2“Ewe SAMOL a feitto seni ewe chuuk Sinai o sarameto wóóch usun ünümweirän seni ewe chuuk Seir. A tineto seni ewe chuuk Paran. I a feitto seni ekkewe ngöröwün chón pin, fän ngetengeten ekkei lón pöüifichin.

3“Ewer, i a tongei nöün kewe aramas. Nöün kewe chón pin meinisin ra nóm lón pöün. Iir ra tapweló mwirum lón ipwom o angei öüröürer senuk,

4“lupwen Moses a ngeni kich ew öllük, ikkeei ekkewe käit fäniten ewe mwiichen aramas än Jakob.

5“Ina usun ewe SAMOL a king lón Jeshurun, lupwen ekkewe souemmwenin aramas meinisin ra mwiichfengen, lupwen ekkewe einangen Israel meinisin ra chufengen.

6“Reuben epwe manaw o esap mäló, nge nöün kana aramas repwe chóókükkün.”

7Iwe, i a apasa ei fäniten Judah:

“Äi SAMOL, kopwe rongorong ngeni mwelien Judah o kopwe emmwenisäfälieto i ren aramasan kewe. Kopwe penätä i ren pöüm, kopwe älisi i pwe epwe tongeni üüngeni chón opwutan kana.”

8Moses a apasa ei usun Levi:

“Kopwe ngeni Levi noum we mi ölükülük óm we Thummin me óm we Urim, iei ewe pisekin üttüüt mi pin. En ka sótuni i me lón Masah, en ka pwal äniini ngeni me órun kewe kólikin Meribah.

9“Levi a apasa fäniten saman me inan, ‘Ngang üsap ekieki usur.’ I esap ekieki öüchchean pwiin kana o likitaló öüchchean ekiekin nöün kana.

10“Chón ewe einangen Levi repwe äööw óm kewe pwüüng ngeni Jakob o äööw ngeni Israel óm kewe öllük. Iir repwe uwato appach mi pwokkus fän mesom o ääni unusen ekkewe asóren keek wón óm we róngen asór.

11“Äi SAMOL, kopwe efeiöchü än Levi tüfich o etiwa angangen pöün kana. Kopwe apachcha leewon pecheen ekkewe chón opwut i. Kopwe efeiengawa ekkewe chón pölüweni i pwe resap chüen üütäsäfäl.”

12Iwe, Moses a apasa ei usun Benjamin:

“Ewe mi ächengicheng meren ewe SAMOL a nónnómöch lón kinamwe. Ewe Kot mi Tekia a pwellieló i iteiten rän meinisin o imweimw lefiilen afaran.”

13Moses a apasa ei usun Josef:

“Ewe SAMOL epwe efeiöchü fönüwan ren ekkewe liffang mi fókkun mwirinnö seni peekitä lón läng, ren üüt me omwurenipwin pwal ren kólik seni fän fönüfan.

14“Epwe efeiöchü i ren ekkewe uwään irä mi fókkun mwirinnö ra määröch ren tinen akkar, pwal ren chómmóngun uwa iteiten maram,

15“ren ekkewe uwään irä mi fókkun mwirinnö seni wón ekkewe chukun lóóm pwal ren chómmóngun ekkewe uwään irä seni wón ekkewe chukutekisón mi nóm tori feilfeilló chök,

16“ren ekkewe liffangen fönüfan me masowan meinisin, pwal ren ümöümöchün ewe emön mi pwä lón ewe irä mi ngetenget. Amwo ekkeei feiöch meinisin repwe feitto wón möküren Josef, repwe ämwärämwärätä wón etenmesen ewe samol me leiin pwiin kewe.

17“A wor än Josef pöchökkül me ling usun emön mweinöü ätemwänin kowu. An manaman epwe usun mächään emön ätemwänin kowu mi mwacho. I epwe pureei chón ekkewe mwüü ren mächään kewe o ösüüreló tori ekkewe lesópwun fönüfan. Ikkeei äi kewe kapasen efeiöch fäniten ekkewe chómmóng chómmóng seni Efraim me ekkewe ngöröw seni Manassah.”

18Iwe, Moses a apasa ei usun Zebulun me Issakar:

“Zebulun epwe meseik lón an sääiló toowaw. Issakar epwe pwapwa lón imwan kewe imw mangaku!

19“Repwe kööräto ekkewe aramas ngeni ewe chuuk pwe repwe ääni ekkewe asór mi pwüng me ikenan. Repwe angeawu chómmóng wöw seni ewe mataw pwal mettóch mi öüchchea ra mwónóló lón ewe ppi.”

20Iwe, Moses a apasa ei usun Kad:

“A feiöch ewe emön mi äwätteló kinikinin fönüwen Kad. Kad a osousouló usun emön laion pwe epwe pwiliiewu efóch paaw ika ew mökür mökür.

21“Kad ra filätä ewe fönü mi fókkun mwirinö seni meinisin fänitan, pün a iseiseló ikenan inetin emön souemmwenin maun. I a feitto fiti ekkewe móngómalen leiin ekkewe aramas o i a föri ngeni Israel pwüngün än ewe SAMOL pwüng me an kewe pwüüng fäniten Israel.”

22Iwe, Moses a apasa ei usun Dan:

“Dan i emön appanen laion mi mwetewu seni Bashan.”

23Iwe, Moses a apasa ei usun Naftali:

“O Naftali, en ka sólt ren ümöümöch me uren än ewe SAMOL kewe feiöch, en ka tongeni fönüweni lotow me öör.”

24Iwe, Moses a apasa ei usun Asher:

“Asher epwe koon feiöch me leiin ekkewe naaw. Amwo i epwe koon chen meren pwiin kewe. Amwo i epwe atuutuw pachapachan lón apüra seni föün olif.

25“Ammwöchün asamalapen tittin leeniom repwe för seni mächä me piraas. Òm pöchökkül epwe öüküük ngeni langattamen ränin manawom!”

26“Esap wor emön epwe usun óm we Kot, O Jeshurun, i ewe Kot mi sääi leemelen ekkewe läng pwe epwe älisuk. I a sääi wón ekkewe kuchu lón echchipwörün an ling.

27“Ewe Kot mi nóm lón fansoun ese mwüch i óm leenien op. I a iseis fóóm pöün kana mi nóm tori feilfeilló chök. I epwe ösüüwowu ewe chón opwut me mwom o epwe apasa, ‘Niireló!’

28“Iei minne, Israel epwe nónnómöch lón kinamwe. Jakob epwe chök äkkälämönüló le nónnóm lón leenian lón ew fönüen wiit me wain mi fö, ia ekkewe läng repwe öpwüngätiw omwurenipwin ie.

29“O Israel, a ifa me óm pwapwa! Iö epwe wewe ngenuk, en ew mwiichen aramas mi küna ngas meren ewe SAMOL. I óm pisekin eppetin feiengaw lón maun epwe älisuk, pwal i noum ketilas mi ewillók! Chón opwutom kana repwe feitto o chappetiw me mwom, nge en kopwe pwuutiw wón sökürüür.”

Moses a mäló me wón ewe chuuk Nebo

34Mwirin, Moses a feilló ngeni ewe Chuuk Nebo seni lón ewe maasiesin Moab. Iwe, a feittä wón ungen Piska mi nóm äwenewenen Jeriko. Iwe, ewe SAMOL a öküna ngeni i unusen ewe fönü, seni Kilead tori Dan, 2unusen ewe fönü Naftali me ewe fönü Efraim me ewe fönü Manassah, unusen ewe fönü Judah achööwaló ngeni ewe mataw mi nóm lotow. 3A pwal öküna ngeni ewe fönü mi nóm öör me ewe leemólun Jordan fiti Jeriko - ewe telinimw ia a wor ie ekkewe irä palm usun nüü - tori Zoar. 4Mwirin, ewe SAMOL a apasa ngeni Moses, “Iei ewe fönü ngang üwa pwon fän ökköpöl ngeni Abraham, Isaak, me Jakob. Ngang üwa üreniir pwe üpwe ngeni mwirimwiriir kana ei fönü. Iwe, iei ngang üwa mwüüt ngenuk pwe kopwe nengeni ewe fönü me toowaw ren mesom, nge en kosap tolong lón ewe fönü.”

5Iei usun än Moses nöün ewe SAMOL we chón angang a mäló me ikenan, lón ewe fönü Moab, usun chök minne ewe SAMOL a apasa. 6Iwe, Kot a peiaseni Moses lón ew leemólun arap ngeni Beth Peor lón Moab. Nge tori ikenäi, esap wor emön a silei ifan wesewesen ei leeni. 7Moses a ipwükü rüwe ierin lupwen a mäló, nge mesan ra chüen chök fatafatöch o a chüen chök pöchökkül. 8Iwe, ekkewe aramasen Israel ra kechiweiti Moses lón üküükün iliik rän me lón ewe maasiesin Moab tori ra wesiló ekkewe ränin ar öörüni fäniten ar repwe kechiw me letipeta.

9Iwe iei, Joshua nöün Nun we mwän a ur ren ewe ngünün tipächchem, pün Moses a fen isettä pöün kana wón äteei. Ina minne, ekkewe aramasen Israel ra älleasochisi i o föri iteiten ekkewe mettóch usun chök minne ewe SAMOL a fen öllük ngeni Moses.

10Nge seni ewe fansoun, esap wor pwal emön soufós me lón Israel mi wewe ngeni Moses, iei i ätewe ewe SAMOL a silei pün ra nennefengen. 11Esap wor emön a wewe ngeni Moses fäniten ekkewe esissil mi manaman me ekkewe föfför mi amwaraar ewe SAMOL a ökkünöw ngeni pwe epwe föri me lón ewe fönü Egypt pwe epwe efeiengawa Farao me nöün kewe chón angang meinisin me unusen fönüwen Farao, 12pwal fäniten ekkewe manaman mi pöchökkül meinisin me ekkewe föfförün eniweniw mi lapalaap meinisin Moses a föri me fän mesen ekkewe chón Israel meinisin.