2 John

John ewe souakkomw a kapwong ngeni ewe finesamol

1Ei taropwe seniei ngang John ewe souakkomw. Ngang üwa mak ngeni ewe finesamol mi fil me nöün kana ngang üwa tongeer lón ewe let. Nge esap ngang chök üwa tongeer, nge i pwal iir meinisin ekkewe mi silei än Kot we let, 2iei ewe let mi chök chüen nónnóm looch, o epwe nónnóm rech tori feilfeilló chök.

3Ümöümöch, chen, me kinamwe seni Kot Samach pwal seni Jesus Kraist, i Nöün ewe Saam we repwe nónnóm reech lón let me tong.

Manaw lón än Kraist kewe öllük

4Ngang üwa fókkun pwapwa chapwür pün üwa küna ekkóch leiin noum kewe semiriit ra fätäl lón ewe let, usun chök minne ewe Saam a öllük ngeni kich pwe sipwe föri. 5Iwe iei, ngang üwa tungór ngenuk en enan fefin mi ächengicheng pwe öüsipwe sópweló le tong fengen lefiilach. Esap wewen pwe ngang üwa mak ngenuk ew öllük mi fö, nge i ewe chök ew sia fen äkkääni seni chök lepoputän. 6Iwe, iei ei tong, pwe sipwe fätäl lón ach älleasochis ngeni än Kot kewe öllük. Iwe, an we öllük pwe sipwe fätäl lón tong, usun öüwa fen rong seni lepoputän.

Sipwe äfälli kich ren ekkewe chón otupwutup

7Pün chómmóng chón otupwutup ra fen fätäl feil lón fönüfan, chókana resap pwärätä pwe Jesus Kraist a war lón fituk. Ei sókkun aramas i emön chón otupwutup me chón üüngeni Kraist. 8Öüpwe pwisin tümwünüfichi kemi pwe ete fen pöütüló seni kemi meet ämi öüwa angang weires fänitan. Nge öüpwe chök likiitü tori lesópwólón pwe öüpwe tongeni willeni ew liiwin mi unus. 9Iteiten emön me emön esap sópweló le nónnóm lón ekkewe käit usun Kraist pwe a fen toowu lükür, esap ääni Kot. Nge iö mi likiitü le nónnóm lón ekkewe käit usun Kraist, a ääni ewe Saam me ewe Naaw. 10Are emön epwe feitto reemi, nge esap uweato ei käit mi let usun Kraist, öüsap etiwalóng i lón imwemi, öüsap pwal kapwong ngeni. 11Pun iö a kapwong ngeni, a fiti i lón an kewe föfför mi ingaw.

Än John kapwongen kósópw

12Iwe, inamwo are mi wor chómmóng mettóch itä ngang üpwe makewow ngeni kemi, nge üsap mochen üpwe nöünöü taropwe me ingk. Nge i ngang üwa apilükülükü pwe üpwe feilló reemi pwe sipwe pwisin nennefengen o kapas fengen pwe ach pwapwa epwe unus.

13Ekkewe semiriit nöün pwiimw we fefin mi fil ra tiinawow ar kapwong. Amen.